目的地介紹

[日本福岡] 海之中道海濱公園 | 国営海の中道海浜公園

JR 香椎線 (海之中道線)-西戶崎站

上星期為大家介紹過今次旅程住嘅新酒店,今個星期就同大家分享下我嘅行程~喺無專登排行程嘅情況之下,今次去嘅地方都比較隨心所欲,諗到去邊度就去~雖然係咁,不過都發掘到唔少值得去嘅地方,例如係今日要分享嘅海之中道海濱公園!

海之中道係一個將九州本島以及志賀島連接嘅沙洲,喺近代被發展成福岡嘅休閒用地,除咗海濱公園之外,亦都有棒球場以及哥爾夫球場等等嘅設施~要去海之中島都好方便㗎,既可以搭JR火車,亦都可以選擇搭船!不過渡輪未必人人都啱搭,始終容易暈船浪,所以穩陣啲都會建議大家搭火車~況且車程唔算長,大約35至45分鐘就到~

海之中道海濱公園面積唔細,所以一共有兩個火車站服務公園嘅兩側~大家可以好似我今次咁樣,選擇去程喺海之中道站落車,回程由西戶崎站上車,咁就可以順路搭車,而唔使行回頭路~想喺度租單車玩嘅亦都唔使擔心,因為兩邊出入口都有得租單車~就算唔租單車,就咁行唔會辛苦,再唔係亦都有收費嘅穿梭巴士,所以大家按照最適合自己嘅方式遊覽就啱㗎啦~

海之中道海濱公園 - 粉蝶花
海之中道海濱公園 - 粉蝶花

今次去到嘅時候,粉蝶花嘅花期啱啱過咗,所以只係得返少量嘅粉蝶花繼續盛開~粉蝶花花海可以話係呢度嘅一大賣點嚟,所以四月係其中一個最適合嚟行嘅月份!至於今次五月份去,就有玫瑰花展~可以賞花之餘,仲有唔少特登整嘅影相位添!想唞一唞嘅話,四圍都有好多空間可以休息,亦都可以喺大草地上面享受下喺城市難以搵得到嘅休閒時光~

海之中道海濱公園 - 玫瑰花展
海之中道海濱公園 - 玫瑰花展

同小朋友去亦都好適合,因為公園裡面有齊水族館同動物園~怕佢哋睇花花草草會悶嘅話,睇動物嘅興趣應該會大少少~要放電嘅話亦都有唔少選擇,除咗係啱先提到嘅踩單車之外,裡面有各類遊樂設施,甚至係水上樂園!難怪會有啲網上文章介紹大家喺附近住返晚,嚟個兩日一夜嘅小旅行~

海之中道海濱公園 - 遠眺水上樂園
海之中道海濱公園 - 遠眺水上樂園

順帶一提,服務海之中道嘅香椎線,沿線車站都係屬於無人車站,無車站職員看管同提供服務之餘,而且仲連閘機都無㗎~出入閘要靠大家自律,呢個都算係一個特別嘅體驗嚟!如果大家唔一定要去水族館嘅話,唔買JR 嘅海之中道套票亦都無問題,因為以上車站都可以用各種智能卡出入閘~

整體嚟講,海之中道海濱公園係一個老少咸宜嘅景點~相信無論大家屬於邊個年齡層或者性別,無論係同邊個去都好,都應該會喺公園搵到令你消閒嘅好方法~

如果您有任何關於旅遊或者行程上嘅問題,請隨便留言或者Inbox問,我會盡力解答㗎~

海之中道海濱公園官網:uminaka-park.jp

開放時間:
3月至10月:09:30 至 17:30
11月至2月:09:30 至 17:00
休園日:除夕及新年 (12月31日、1月1日) 、2月首個個星期日及翌日

入場費:
成人 (15歲或以上):450日圓
長者 (65歲或以上):210日圓
14歲或以下小童免費入場

地址:福岡縣福岡市東區大字西戸崎18-25
交通:由博多站出發,乘搭 JR 鹿兒島本線前往 香椎站 (JA04),再轉乘 JR 香椎線前往 海之中道站 (JD02) 或 西戶崎站 (JD01)。全程需時約35至45分鐘。

0 個留言於 “[日本福岡] 海之中道海濱公園 | 国営海の中道海浜公園

發表回覆

你的電郵地址並不會被公開。 必要欄位標記為 *