目的地介紹

[日本福岡] 福岡博多站東方酒店 Oriental Hotel Fukuoka Hakata Station

福岡博多站東方酒店 Oriental Hotel Fukuoka Hakata Station

年頭嘅時候為大家介紹咗五間今年上半年開幕嘅福岡新酒店,所以最近去福岡嘅時候揀咗其中一間嚟試一試~今日就同大家介紹下福岡博多站東方酒店!佢嘅位置一定係最大嘅賣點,因為佢實在太近博多站,太方便!

大家喺Google呢間酒店嘅時候,話唔定仲會見到佢哋嘅舊名-博多中央酒店 (Hotel Centraza Hakata)。佢哋由舊年年尾開始改裝,經過近半年嘅大工程之後,今年四月先重新開業。新裝修之後摩登咗唔少,而且價錢仲幾實惠,今次連埋稅之後都唔使700蚊一晚!所以齋靠出入嘅時候觀察,估計都真係有好多人住~

論方便程度就真係完全無得輸!酒店地庫直通地鐵站,路面嘅正門同 JR 站嘅距離先得100米~酒店內仲有24小時便利店以及 Coffee Shop ,生活機能都相當出色~附近當然仲有好多好嘢食,例如之前介紹過嘅華味鳥都喺左近!喺附近買嘢食嘢都好方便,隨時返上房唞唞都得~

低層部份係唔同嘅宴會廳以及餐廳,所以房間位處嘅樓層都唔算低,5樓已經係最低。大堂設喺2樓,由正門搭扶手電梯就直到,拎住行李都唔會麻煩。Check Out 之後擺行李就喺接待處側邊。比較特別嘅係,呢度可以自助寄存行李,好似火車咁用密碼鎖自己鎖住~咁樣時間上就比較具彈性,早少少或者晏少少都唔怕~不過要留意位置唔算好多,遲咗嘅話就可能要勞煩職員幫你保管啦~

福岡博多站東方酒店 自助行李寄存
福岡博多站東方酒店 自助行李寄存

今次住嘅係最平嘅雙人房A,面積大約161呎左右。雖然係偏細嘅 Size ,但係實際空間都算闊落,因為夠位將大喼鋪平~而且床都唔係 Semi Double 咁細,應該有 Queen Size 咁上下闊,所以瞓得幾舒服㗎~佢哋嘅夾萬都好大,成部電腦放落去都仲得!

福岡博多站東方酒店 雙人房A
福岡博多站東方酒店 雙人房A

不過有好處亦都有壞處,為咗騰出多啲空間,房裡面無枱同衣櫃,只有洗手盆旁邊嘅櫃面可以擺嘢。如果你慣咗喺房裡面食下宵夜,又或者需要張枱仔工作嘅話,咁我絕對會建議你補多一百幾十,要雙人房B會好啲,起碼有返張枱先!隔音方面亦都遜色少少,其他人經過走廊嘅時候都比較應聲。

福岡博多站東方酒店 雙人房A
福岡博多站東方酒店 雙人房A

呢度嘅洗手間無跟住潮流用乾濕分離設計,維持返比較傳統嘅擺法,所以私隱度會好啲,同朋友一間房會無咁尷尬。備品方面亦都唔錯,用返本土 DHC 㗎~要挑剔嘅話就可能要講講佢哋嘅 Housekeeping ,呢度打掃嘅服務比較基本,不過又未至於去到求其嘅程度,起碼基本清垃圾同補充備品都做足。

福岡博多站東方酒店 大堂
福岡博多站東方酒店 大堂

以呢個價錢同位置,即使佢有些少甩漏我都覺得佢係一間相當唔錯嘅酒店,值得推介俾大家~而且我覺得佢哋嘅弱點都無傷大雅,話唔定多一兩位客人指出嚟之後,下次就會有改善,所以呢間酒店下次會繼續喺我考慮嘅名單裡面~

今次介紹暫告一段落,大家如果你有任何關於旅遊嘅問題,歡迎您留言或者Inbox問㗎~

福岡博多站東方酒店官網:www.oriental-hotels.com
電話:+81 092-461-0170

參考價錢:連稅每晚港幣699元

地址:福岡県福岡市博多区博多駅中央街4-23
交通:由 JR 博多站筑紫口步行約1分鐘即達,酒店同時直通地鐵博多站筑紫口東4號出口。

0 個留言於 “[日本福岡] 福岡博多站東方酒店 Oriental Hotel Fukuoka Hakata Station

發佈留言

發佈留言必須填寫的電子郵件地址不會公開。 必填欄位標示為 *