目的地介紹

[泰國曼谷] 河畔新地標-ICONSIAM 暹羅天地

ICONSIAM

介紹過今次住宿嘅酒店之後,今日同大家分享下今次旅程去咗邊度玩~有留意開曼谷最新發展嘅朋友可能已經聽過 ICONSIAM (暹羅天地) 呢個名,佢係舊年年尾先開幕嘅新商場嚟,位處於河畔一帶。雖然位置唔夠喺 BTS 沿線嘅商場咁方便,但都好值得大家去行下㗎~

要去 ICONSIAM 行街,要先搭 BTS 去到河邊嘅 Saphan Taksin (鄭皇橋站-S6) 或者 Krung Thonburi (恭吞武里站-S7),再轉乘接駁船,或者接駁巴士就可以去到啦。嫌巴士等得耐嘅話行路亦都可以,路途唔算太遠,大約15分鐘左右。如果大家本身係住河邊啲酒店就仲方便,有起碼4間酒店都有船往返呢個新地標㗎~

暹羅高島屋 Siam Takashimaya
暹羅高島屋 Siam Takashimaya

ICONSIAM 面積相當大,所以佢哋將商場細分咗為唔同部份,包括有各大名牌所在嘅ICONLUXE、水上市場 SookSiam (幸福暹羅)、以及百貨公司高島屋等等。呢度有唔少初次去到泰國開舖嘅品牌,例如蘋果同高島屋都係第一次進駐泰國㗎咋,所以暹羅天地同其他曼谷嘅商場都有唔少分別!

幸福暹羅 SookSiam
幸福暹羅 SookSiam

成個商場裡面,最值得推介嘅部份就係 SookSiam 啦!SookSiam 儼如一個迷你版嘅泰國,大家喺呢度可以搵到嚟自泰國77個縣嘅文化~喺呢度除咗可以搵到各式美食之外,亦都有唔少手工藝同農產品,更加有文化體驗活動㗎!SookSiam 仲仿照水上市場嘅設計,將部分攤檔置於船上。即使唔能夠好似其他水上市場咁搭船遊覽,都可以舒服地體驗一下水上市場嘅樂趣~據講同 SookSiam 合作嘅小生意數量多達3000間,所以攤檔會定期輪換,話唔定下次去又會有第二啲嘢睇~

ICONSIAM 外望
ICONSIAM 外望

商場除咗室內做得有聲有色之外,戶外嘅部份亦都做得唔錯。開放嘅戶外空間俾大家欣賞河邊景色,行到攰嘅時候順便出嚟抖抖氣。河邊夜晚仲有水舞間表演可以睇,不過今次我就無留低睇埋先走,下次應該會留夜少少睇!喺規劃上,我覺得佢同新加坡嘅 Marina Bay Sands (濱海灣金沙) 有幾分相似~

喺 ICONSIAM 行街都真係幾開心,尤其係 SookSiam 嘅部份氣氛非常好,有好濃厚嘅泰國氣息!時間許可的話,值得放多少少時間喺呢度行街。如果要趕行程嘅話,就算錯過其他部份,都要行下 SookSiam,因為呢部份係幾精彩㗎!

如果您有任何關於旅遊或者行程上嘅問題,請隨便留言或者Inbox問,我會盡力解答㗎~

ICONSIAM 暹羅天地官網 (英文):www.iconsiam.com

地址:299 Charoen Nakhon Soi 5 , Charoen Nakhon Road, Khlong Ton Sai Sub District, Khlong San District, Bangkok 10600
交通:乘搭BTS 是隆線 (Silom Line) 前往 鄭皇橋站 (Saphan Taksin, S6) ,於2號出口碼頭轉乘免費接駁船,或前往 恭吞武里站 (Krung Thonburi, S7),於1號出口轉乘免費接駁巴士。

0 個留言於 “[泰國曼谷] 河畔新地標-ICONSIAM 暹羅天地

發表回覆

你的電郵地址並不會被公開。 必要欄位標記為 *