目的地介紹

[泰國曼谷] 曼谷暹羅凱賓斯基酒店 Siam Kempinski Hotel Bangkok

曼谷暹羅凱賓斯基酒店 園景

不經不覺前前後後都介紹咗三間唔同嘅曼谷酒店,而我今次去曼谷玩又住多咗另一間酒店啦~雖然暹羅凱賓斯基酒店 (Siam Kempinski) 都開咗一段時間,唔算特別新,不過一直都留意到佢有唔少好評,而且上次食自助餐嘅體驗都幾好,所以今次就決定試一試佢!

Siam Kempinski 嘅位置喺正暹羅百麗宮 (Siam Paragon) 後面,兩者透過天橋接駁埋一齊。搭BTS到暹羅站 (Siam) 之後,穿過商場就到酒店,非常方便~而且本身 Siam Paragon 都幾多舖頭,淨係喺返酒店附近食同買都唔會悶!因為有個商場隔開咗酒店同大街,加上酒店屬於低密度設計,所以環境算清靜幽雅,唔係見到高樓大廈都唔覺得自己身在大城市之內~

曼谷暹羅凱賓斯基酒店 大堂
曼谷暹羅凱賓斯基酒店 大堂

今次透過官網訂房揀咗一款叫做 Winter Escapes 嘅優惠,除咗包自助早餐同房內迷你吧之外,仲另外包咗一餐喺 Niche 食嘅三道菜午餐或者晚餐~唔知點解經 Hotelscombined 入官網訂房,比起直接入官網訂房略平少少,所以大家訂房之前真係要認真格吓價先吖!

曼谷暹羅凱賓斯基酒店 Premier King Room
曼谷暹羅凱賓斯基酒店 Premier King Room

Siam Kempinski 一共提供9種房型以及11種套房,今次住宿嘅 Premier King Room 屬於第三級嘅客房,平均有45平方米 (484呎) 大,部份客房,好似今次呢一間仲設有露台添。雖然景觀只係園景,不過望返池畔同綠樹都幾寫意,同其他曼谷酒店都好唔同。有啲房就會望返街景,有種房型甚至係直通泳池㗎!

縱使酒店已經開業8年有多,佢哋都保養得好好,唔多察覺到佢嘅實際年齡~房間嘅間隔就無咁摩登,因為廁所仲未採用乾濕分離設計,仍然係比較傳統一間過嘅廁所。設備方面無咁多花巧嘢,不過飲食方面就好闊綽!免費嘅迷你吧有四款飲品,就連泰國啤酒都有,小食方面亦都有成三款,菠蘿乾、芒果乾同椰子蛋卷~仲未完㗎,每日執房都仲會補返果盤裡面嘅生果,周不時仲日日唔同~

曼谷暹羅凱賓斯基酒店 Premier King Room
曼谷暹羅凱賓斯基酒店 Premier King Room

剛才提到今次嘅優惠送咗一個三道菜嘅晚餐,呢個指明咗喺西餐廳 Niche 裡面享用。即使係送嘅,都有幾多款式揀,質素亦都相當不錯,無將貨就價~至於早餐,除咗可以去 Niche 之外,另外可以去返專做自助餐嘅 Brasserie Europa !兩個食嘅嘢就差唔多,但用餐環境就唔一樣,各有所好。餐廳嘅員工都好熱情,唔單止會推介唔同嘅食物同飲品,仲會同你傾下偈~順帶一提,Brasserie Europa 喺 eatigo 上有優惠,午市同晚市自助餐都有優惠,間中仲會有半價,以呢個質素嘅餐廳真係相當抵食!

設施方面都好完善,泳池同 Gym 房呢啲基本設施唔多講,我覺得佢哋特別在設有小朋友專屬嘅遊樂空間,幾適合帶住小朋友旅行嘅家庭㗎。唔單止係咁,酒店喺好多位置都設有自助嘅飲品角落,有啲係香茅茶,有啲係班蘭茶,包你唔會口渴~我諗會稱呢度為一個渡假村,多過一間酒店!

曼谷暹羅凱賓斯基酒店 Siam Kempinski Hotel Bangkok
曼谷暹羅凱賓斯基酒店 Siam Kempinski Hotel Bangkok

Siam Kempinski 交通方便之餘又有渡假嘅感覺,的確係一個放假叉叉電嘅好選擇。喺曼谷云云嘅酒店當中,佢固然唔係超值爆平嘅選擇,不過我相信佢一定係其中一間最優質嘅酒店。

大家如果你有任何關於旅遊嘅問題,亦都歡迎您留言或者Inbox問㗎~

曼谷暹羅凱賓斯基酒店官網:www.kempinski.com
電話:+66 (0) 2162 9000

參考價錢:Premier King 客房連自助早餐及全包迷你吧 每晚9100泰銖 (連稅及服務費,折合約港幣2258元)

地址:Rama 1 Road 991/9, Pathum Wan, Bangkok 10330
交通:乘搭BTS 素坤逸線 (Sukhumvit Line) 前往 Siam 站 (CEN),出站後可通過暹羅百麗宮 (Siam Paragon) M層直達酒店2樓。

0 個留言於 “[泰國曼谷] 曼谷暹羅凱賓斯基酒店 Siam Kempinski Hotel Bangkok

發佈留言

發佈留言必須填寫的電子郵件地址不會公開。 必填欄位標示為 *