目的地介紹

[日本中部] 2019年精選新酒店巡禮-金澤、名古屋

2019年精選新酒店巡禮-金澤、名古屋

今個星期繼續為大家帶嚟新酒店巡禮系列~今次我哋由東京向西邊出發,嚟到日本嘅中部!
名古屋一直係日本中部嘅門戶,幾乎係大家開展昇龍道行程必經嘅城市。再加上由今年嘅春天起,國泰會開辦直航往返小松,相信會越嚟越多人對中部地方感興趣。所以今次特登介紹名古屋以及金澤嘅新酒店俾大家!
名古屋同金澤今年都有唔少新酒店開張㗎,而且唔少都係初次進駐當地添!今次分別為大家帶嚟6間名古屋酒店,同埋2間金澤酒店嘅介紹!事不宜遲,我哋即刻睇睇2019年兩地有咩新酒店登場啦~

2019年1月11日開業
三井花園酒店金澤 Mitsui Garden Hotel Kanazawa

三井集團今年首次進入北陸地區嘅巿場,喺1月就會有三井花園酒店金澤開幕~
酒店選擇靠近金澤城,離開金澤站大概20分鐘路程。車站嗰邊有巴士服務,由小松機場過嚟亦都有機場巴士去到附近嘅近江町市場,行5分鐘左右就到。
三井花園酒店金澤一共有8種房型,當中以雙床房為主,亦都設有雙人房以及三人房。設計方面亦都融合咗當地嘅傳統藝術㗎,睇睇牆上嘅裝飾就知道~酒店頂層13樓設有大浴場,可以一邊浸浴,一邊欣賞金澤城公園嘅景色!房間面積方面,雙人房同雙床房都由226呎起。

地址:石川県金沢市上堤町1番22号
鄰近車站:JR 金澤站 (步行約17分鐘)
電話:+81 076-263-5531
立即訂房:Agoda / Booking.com / 酒店官網
參考價錢:每晚約港幣862元(連稅)

2019年1月18日開業
名古屋錦日航都市酒店 Hotel JAL City Nagoya Nishiki

日航都市酒店嘅規模比起屬同一集團嘅大倉同日航酒店都要細,今年就一口氣會開兩間新酒店,年初先有位於名古屋嘅呢間開張~
酒店位於伏見地鐵站附近,去返名古屋站或者榮一帶吃喝玩樂都幾方便~周邊社區雖然比較舊,不過都有唔少食肆,大約200米路程左右就有個商場添!
酒店提供9種房型,雙人房有3款而雙床房有6款,其中一款雙人房可以加床供3人入住。酒店喺設備方面幾揼本㗎,每間房都配備4K電視,就連牙刷都提供好幾款俾客人揀~雙人房由237呎起,而雙床房就由258呎起。

地址:愛知県名古屋市中区錦1丁目16番36号
鄰近車站:名古屋地鐵 東山線、鶴舞線 伏見站
電話:+81 052-204-2580
立即訂房:Agoda / Booking.com / 酒店官網
參考價錢:每晚約港幣630元(連稅)

2019年1月30日開業
西鐵酒店Croom名古屋 Nishitetsu Hotel Croom Nagoya

西鐵Croom將會喺2019年衝出九州,嚟到名古屋開酒店,開喺購物旺區榮附近,離久屋大通地鐵站更加只係1分鐘路程咋~附近要食要買都非常就腳,一定多姿多彩!
Croom喺博多嘅評價非常優秀,質素相信有一定保證!Croom嘅酒店全部都設有溫泉,而名古屋呢間就將溫泉放上頂樓,環境更加好~
酒店每間房都配備handy電話一部,可以攞出街上網同打長途電話~房型方面以雙人房為主,一共有三款,另加一款雙床房。雙人房面積有161呎左右,雙床房面積就大約226呎。

地址:愛知県名古屋市中区錦3丁目4番3号
鄰近車站:名古屋地鐵 名城線、櫻通線 久屋大通站
電話: +81 052-963-5959
立即訂房:Agoda / Booking.com / 酒店官網
參考價錢:每晚約港幣720元(連稅)

2019年2月24日開業
At Inn 酒店名古屋站 At Inn Hotel Nagoya Station

At Inn係東海地區嘅公寓公司,今次佢哋就進軍酒店業,喺名古屋站附近開酒店~
酒店近名鐵、近鐵名古屋站一則,由地下街出口到酒店大約2分鐘路程左右。附近有唔少餐廳可以開餐,行返入名古屋站裡頭嘅商場就更多選擇~
同一般酒店唔同,呢度採用混合式設計,既有房間,亦都有膠囊~單人匹馬去旅行就最啱住啦,可惜膠囊只限女性入住,未設有男性膠囊。單人房由140呎起,雙人房由161呎起,雙床房則由178呎起。膠囊未有提供俾訂房網站代理,大家需要經官網訂~

地址:愛知県名古屋市中村区名駅4丁目22番21号
鄰近車站:JR 名古屋站、名鐵 名鐵名古屋站 及 近鐵 近鐵名古屋站
電話: +81 052-756-4321
立即訂房:Agoda / Booking.com / 酒店官網
參考價錢:每晚約港幣864元(連稅)

2019年3月16日開業
金澤因特蓋特酒店 Hotel Intergate Kanazawa

喺剛才介紹嘅三井花園酒店金澤對面,仲有多一間新開嘅酒店,講緊嘅就係屬於Granvista集團嘅金澤因特蓋特酒店!Intergate嘅酒店由2018年起先至陸續登場,繼京都、東京同廣島後,今次第四間嚟到金澤。
Intergate酒店每一間都設有住客休息室,有飲品免費供應,亦都有各式小食同酒類供應,大家可以得閒去坐下傾下偈~佢哋仲有大浴場比大家浸浴㗎~
酒店一共有8種房型,唔單止有雙人房、雙床房以及三人房,亦都設有套房~雙人房最細有183呎,而雙床房就由237呎起。

地址:石川県金沢市高岡町2番5号
鄰近車站:JR 金澤站 (步行約19分鐘)
電話:+81 076-260-7200
立即訂房:Agoda / Booking.com / 酒店官網
參考價錢:每晚約港幣690元(連稅)

2019年4月1日開業
大和皇家酒店D-City – 名古屋伏見 Daiwa Royal Hotel D-City Nagoya Fushimi

大和集團旗下嘅D-City系列舊年連續開業後,今年亦都繼續有新酒店開幕。佢哋將會喺名古屋再開多一間,選址伏見附近~
酒店以竹為主題,由大堂裝飾到房內佈置,甚至喺大浴場都會見到竹嘅蹤影~竹配上暖色調嘅顏色唔單止無令酒店顯得唔入流,反而望落覺得更加舒服。
每間客房都配備有按摩靠墊同埋handy電話~單人房、雙人房以及雙床房都有提供,豪華雙床房可以加床,而酒店亦有編配女士樓層。面積方面,雙人房由152呎起,而雙床房就由215呎起。

地址:愛知県愛知県名古屋市中区栄1丁目5番21號
鄰近車站:名古屋地鐵東山線、鶴舞線 伏見站
電話:+81 052-211-6186
立即訂房:Agoda / Booking.com / 酒店官網
參考價錢:每晚約港幣600元(連稅)

2019年4月25日開業
名古屋伏見安住睦世酒店 hotel androoms Nagoya Fushimi

同樣會喺名古屋再下一城嘅,仲有安住睦世酒店!第一間開喺榮商圈,今次呢間就開喺伏見,無咁近多姿多采嘅商場同百貨公司~
雖然位置唔及榮嗰邊咁旺,但交通就非常方便啦~酒店附近一共有兩個地鐵站,合共三條地鐵線,基本上已經覆蓋咗大半個名古屋嘅景點!就算有一兩日要搭JR或者長途巴士,入返名古屋站亦都只係一兩個站嘅距離。
酒店共有四種房型,配備雙人房以及雙床房~雙床房數量比較少,只係得18間。面積方面,雙人房由161呎起,而雙床房就有大約183呎。

地址:愛知県名古屋市中区錦2丁目8番28號
鄰近車站:名古屋地鐵東山線、鶴舞線 伏見站 及 櫻通線、鶴舞線 丸之內站
電話:+81 052-218-3611
立即訂房:Agoda / 酒店官網
參考價錢:每晚約港幣583元(連稅)

2019年6月11日開業
名古屋站前 UNIZO 酒店 Hotel UNIZO Nagoya Ekimae

最後介紹嘅名古屋站前 UNIZO 酒店,係今次介紹咁多間酒店之中最近大型車站嘅一間!酒店離開名古屋站5分鐘路程左右咋~
UNIZO集團之前兩間位於名古屋嘅酒店都係位於榮商圈內,而且兩間都只係屬於UNIZO Inn嘅等級,所以今次呢間唔單止位置更好,質素亦都應該會更好,話晒都係高一級嘅Hotel UNIZO嘛!
房型方面就同普遍嘅UNIZO酒店一樣,分為單人房、雙人房以及雙床房,一共三種房型。部份單人房特別劃為女性專用㗎~雙人房有大約151呎,而雙床房就有大約194呎。

地址:愛知県名古屋市中村区名駅3丁目16番8号
鄰近車站:JR、名古屋地鐵東山線、櫻通線 名古屋站、名鐵 名鐵名古屋站 及 近鐵 近鐵名古屋站
電話:+81 052-589-2281
立即訂房:Agoda / Booking.com / 酒店官網
參考價錢:每晚約港幣920元(連稅)

今次介紹住咁多先,下次再為大家介紹另一啲新酒店,大家記得留意啦~

0 個留言於 “[日本中部] 2019年精選新酒店巡禮-金澤、名古屋

發表回覆

你的電郵地址並不會被公開。 必要欄位標記為 *