[日本東京] 東京站尋味地圖－前言

之前試過一連四個星期為大家介紹東京近郊有咩玩，分別同大家分享過新潟、茨城、靜岡以及長野嘅景點～嚟緊幾個星期就等我哋一齊集中研究下東京有咩好食啦！若然大家仲想重溫返之前嘅遊記，可以撳一撳以下嘅連結～

重溫：
[日本東京] 三井花園酒店大手町 Mitsui Garden Hotel Otemachi
[日本新潟] 上越新幹線一日遊 新潟市内遊記
[日本茨城] 國營常陸海濱公園 (国営ひたち海浜公園)
[日本靜岡] 三島Skywalk大吊橋 (三島スカイウォーク)
[日本長野] 輕井澤一日遊 星野度假區 及 王子購物廣場

東京話晒都係全球第二大城市，美食實多到數唔晒啦！所以嚟緊嘅主題只係集中喺「東京站」週邊已經足夠做個專題。東京站嘅地位舉足輕重，周邊地區又繁華，連帶美食亦都相當多㗎～唔單止喺大廈裡面有好嘢食，地面、地下街亦都不容大家錯過！

如果之前有睇過酒店介紹嘅話，可能都知道我今次嘅旅程住宿喺三井花園酒店大手町。正正係因為酒店非常近東京站，所以我先可以每一日都試到一兩間餐廳～喺試咗唔少餐廳之後，有幾間係我特別鐘意嘅，希望可以同大家介紹下，順便為自己做個記錄。

今次為大家預備咗一幅東京站尋味地圖，精選咗五間值得一試嘅餐廳推介俾大家～有適合食早餐或者Brunch嘅咖啡店，有啱食晏晝嘅日式餐廳，仲有浪漫迷人嘅西餐廳晚飯～接住落嚟嘅幾個星期，就等我哋一齊喺呢個百年車站嘅週邊探索唔同嘅美食，嚟一趟味覺之旅～

東京站嘅兩側分別係八重洲以及丸之內，兩個都係重要嘅區份。啱啱好今次要介紹嘅餐廳就係遍佈喺佢哋兩區之內。好多人都會覺得東京站設計得非常複雜，好容易蕩失路。其實要分清楚自己身在何方並唔係想像之中咁難，因為兩個出口嘅設計大為不同～八重洲一邊比較摩登前衛，而丸之內一邊就古色古香得多啦！分清方向之後，要去搵好嘢食就唔再係難事～

由1月13日起，逢星期日更新：
[日本東京] 東京站尋味地圖－POINT ET LIGNE
[日本東京] 東京站尋味地圖－Freminar 小岩井農場
[日本東京] 東京站尋味地圖－豚捨
[日本東京] 東京站尋味地圖－金華豚料理 平田牧場 極 (特別篇)
[日本東京] 東京站尋味地圖－Sarabeth’s Tokyo
[日本東京] 東京站尋味地圖－牛たんねぎし

大家如果你有任何關於旅遊嘅問題，歡迎您留言或者Inbox問㗎，我會盡力為您解疑難～傾偈交流下心得亦都可以㗎～