目的地介紹

[日本東京] 東京站尋味地圖-Freminar 小岩井農場

東京站尋味地圖-小岩井農場

[日本東京] 東京站尋味地圖-前言
[日本東京] 東京站尋味地圖-POINT ET LIGNE
[日本東京] 東京站尋味地圖-Freminar 小岩井農場
[日本東京] 東京站尋味地圖-豚捨
[日本東京] 東京站尋味地圖-金華豚料理 平田牧場 極
[日本東京] 東京站尋味地圖-Sarabeth’s Tokyo
[日本東京] 東京站尋味地圖-牛たんねぎし

今個星期繼續係東京站尋味地圖系列~上星期為大家介紹過新丸之內大樓嘅麵包店 POINT ET LIGNE ,今次要介紹嘅餐廳就係位於佢旁邊嘅丸之內大樓入面!大家既可以嚟呢度食晏,亦可以嚟呢度食夜晚飯~事不宜遲為大家介紹 Freminar 小岩井農場~

擁有超過120年歷史嘅小岩井農場,佢哋嘅農場位於岩手縣,一般遊客亦都可以去參觀㗎~除咗營運 Freminar 呢間西餐廳之外,小岩井農場仲分別有喺東洋文庫同東京站內營運咖啡館同埋菓子店~至於今日要介紹嘅 Freminar ,話晒都係佢哋嘅餐廳品牌,所以自自然然梗係用返佢哋自家農場出產嘅食材嚟炮製美食~位於丸之內大樓嘅佢,景觀亦都唔差㗎,窗外嘅景色就係東京站嘅丸之內口啦!

Freminar 小岩井農場-蛋包飯
Freminar 小岩井農場-蛋包飯

分別試過佢哋嘅午餐以及晚餐之後,我覺得兩者都值得推介比大家~先講午餐,絕大部分嘅套餐都唔過2000円!套餐已經包咗沙律同餐湯㗎啦,另加甜品或者餐飲都唔貴~佢哋仲有每個星期輪換嘅精選,大家可以預先上佢哋嘅網站睇定有咩食㗎~漢堡扒、蛋包飯、燉牛肉等都非常有水準,絕對對得住佢嘅價錢~下次有機會一定要試試佢哋嘅海鮮,睇下水準係咪同樣咁高!以東京站呢啲市中心嘅黃金地段,再加上佢哋嘅質素,相信呢個價錢都幾難可以喺香港搵到!

Freminar 小岩井農場-漢堡扒
Freminar 小岩井農場-漢堡扒

至於晚餐方面,價錢就相對地高唔少,4道菜連餐茶盛惠5800円,大約四百幾蚊一位。大家當然仲可以選擇散叫啦,因為套餐未必適合所有人㗎嘛~例如我食嘅時候,頭盤係蔬菜凍,之後上網再八卦下個餐單嘅時候就變咗開胃酒啦,所以唔係下下都啱食~餐湯以及主菜都比起午餐時段再升級,例如湯就係松茸清湯,而主菜亦係小岩井農場嘅牛扒!雖然甜品唔係佢嘅強項,而且賣相已經算唔錯,但味道卻比起賣相更出色~一份套餐加散叫一份湯、主菜以及餐茶,埋單兩位都唔使一萬円,物有所值~

Freminar 小岩井農場-晚市套餐
Freminar 小岩井農場-晚市套餐

雖然日本菜非常出色,但我敢講日本嘅西餐一啲都唔輸俾日本料理!唔單止佢哋本身出產嘅食材上乘,佢哋烹調方面亦都有一手~所以去日本除咗食各式各樣嘅日本菜,亦都要抽返啲時間嘆下佢哋嘅西餐~自從發掘咗佢哋嘅西餐係咁出色之後,我諗之後排行程都應該會試更多嘅西餐廳啦~

大家如果你有任何關於旅遊嘅問題,歡迎您留言或者Inbox問㗎,我會盡力為您解疑難~傾偈交流下心得亦都可以~

Freminar 小岩井農場 官網 (日文)www.koiwai.co.jp

營業時間:
午市時段:11:00 至 16:00 (截單時間:14:00)
茶市時段:14:00 至 16:00 (截單時間:15:30)
晚市時段:17:30 至 23:00 (截單時間:22:00)
週日晚市打烊時間及截單時間分別提早1小時

地址:東京都千代田区丸の内2-4-1 丸の内ビルディング5F
交通:由JR 東京站丸之內南口步行約2分鐘即達,由地下鐵丸之内線 東京站 及 地下鐵千代田線 二重橋前站 出發則分別步行1分鐘及3分鐘。

0 個留言於 “[日本東京] 東京站尋味地圖-Freminar 小岩井農場

發表回覆

你的電郵地址並不會被公開。 必要欄位標記為 *