目的地介紹

[日本福岡] 博多站美食推介 遊食豚彩 いちにいさん

了解九州物產豐富嘅話,相信對聞名嘅鹿兒島黑豚一啲都唔陌生~不過要食鹿兒島黑豚,就唔一定要去到鹿兒島先有嘅,去福岡一樣有得食~承上星期繼續為大家介紹博多站AMU內嘅美食,而今次嘅主角就係專食黑豚嘅「遊食豚彩 いちにいさん」!

遊食豚彩 いちにいさん由鹿兒島起家,到依家已經喺全日本有十一間分店~呢間餐廳同位於東京嘅鹿兒島物產館有住莫大嘅關係,皆因物產館開幕之時,就係鹿兒島縣邀請老闆推廣鹿兒島美食嘅契機~慢慢做落就一路擴張,到依家連北海道都有分店啦!另外,有傳名字後半部分-いちにいさん (一二三)係取自東京同鹿兒島之間嘅國道號碼,因為由東京出發,順次序經過國道1號、2號同3號,終點就係鹿兒島啦!

餐牌有三大類別,分別係蒸鍋、涮涮鍋同埋鐵板,另外仲有唔同嘅小食同單點美食可以叫~侍應好好招呼,上菜後會幫你打點好晒,跟住佢哋教學烚就OK!健康啲嘅話就首選蒸鍋,一來蒸比較健康,二來豚肉下鋪咗唔少蔬菜喺度㗎~唔需要擔心唔夠味,因為枱面有胡椒柚子調味。

另外亦都試咗涮涮鍋,除咗豚肉之外,亦都包咗蔬菜盤同蕎麥麵~沾汁係沾蕎麥麵汁,食完豬肉食麵嘅時候都係用呢碗汁,鍾意蔥花嘅朋友可以自己加多啲!蔬菜盤裡面仲有手工雞肉丸,同樣美味!不過呢度掛住食唔記得咗影相,只係影低咗碟黑豚肉就食個唔停啦~呢度嘅套餐之所以係配蕎麥麵而唔係拉麵或者白飯等主食,係因為老闆原本係開蕎麥麵店,所以就順理成章開新舖嘅時候都繼續賣蕎麥麵。

大家有無食過呢間黑豚涮涮鍋吖?定抑或大家喺其他舖頭食過鹿兒島黑豚呢?歡迎大家分享下你哋嘅食評,一齊交流下啦~嚟緊仲有其他福岡美食介紹俾大家㗎,大家記得千祈唔好錯過啦!大家如果你有任何關於旅遊嘅問題,亦都歡迎您留言或者Inbox問㗎~

遊食豚彩 いちにいさん 官網 (日文):ichiniisan.jp
營業時間:11:00 至 23:00 (截單時間:22:00)

地址:福岡県福岡市博多区博多駅中央街1-1 アミュプラザ博多 (AMU Hakata) 10/F
交通:乘搭JR 或 福岡地鐵空港線前往 博多站 (K11),AMU位於博多站内靠近博多口一側。​

0 個留言於 “[日本福岡] 博多站美食推介 遊食豚彩 いちにいさん

發表回覆

你的電郵地址並不會被公開。 必要欄位標記為 *