目的地介紹

[新加坡] 牛車水原貌館 Chinatown Heritage Centre

去到世界各地,我都鐘意抽啲時間去下博物館睇展覽。參觀博物館可以幫到我去認識一個地方嘅歷史文化背景,尤其係參觀關於文化或者藝術嘅博物館。去到新加坡想認識當地華人文化,我就介紹大家去牛車水原貌館啦~

牛車水原貌館喺牛車水嘅寶塔街(Pagoda Street),亦即係由牛車水地鐵站出嚟最旺嘅嗰條街~呢一帶都係由一排排嘅店屋所組成,而原貌館就由三間相連傳統店屋改裝而成,經翻新後喺2016年開放比公眾參觀。

大家知唔知道「牛車水」呢個名嘅由來呢?喺原貌館有介紹㗎~據歷史記載,喺19世紀嘅時候,新加坡仲未有自來水供應,居住喺現時牛車水一帶嘅居民要用牛車由附近嘅水井運水自用,就係因為咁樣就得名「牛車水」啦!

由地下嘅裁縫店開始,到裁縫店後欄嘅工場,你會逐步逐步走入呢一幢大廈每一戶人嘅生活裡面。入場費所包括嘅多媒體導覽會一路為你介紹每一間房或者擺設,所以全程帶住嚟聽先至能夠詳盡啲咁了解當中嘅故事同細節,唔能夠單靠旁邊相對上簡略嘅文字介紹去理解。小細節亦都值得大家留意,例如捕鼠器同小昆蟲等亦都一一還原喺場景當中!

親身走過昔日嘅商店同住宅之後,後半部分會比較似典型嘅展覽,由不同嘅展板以及精品簡介新加坡嘅華人歷史文化,當中除咗風光嘅一面,亦都會介紹陰暗嘅一面,並無刻意去隱藏唔光彩嘅部份。大家睇完某部份嘅歷史,話唔定會覺得同香港歷史有啲似曾相識㗎~

若果大家聽足介紹,逐個部分欣賞嘅話,需要預返大約一個鐘至兩個鐘左右,所以嚟呢度真係無得急。建議大家有充足時間先嚟呢度放慢腳步慢慢睇~可以考慮朝早喺附近食完肉骨茶早餐再嚟 (睇返之前嘅介紹) ~大家如果你有任何關於旅遊嘅問題,亦都歡迎您留言或者Inbox問㗎~

牛車水原貌館官網:chinatownheritagecentre.com.sg
營業時間:09:00 至 20:00 (每月首個星期一休館)

入場費 (連多媒體導覽):
成人:新加坡幣15元
小童 (7至12歲) :新加坡幣11元

地址:48 Pagoda Street, Singapore
交通:乘搭新加坡地鐵 MRT 東北線或濱海市區線前往牛車水站 (Chinatown, NE4/DT19),經A出口前往Pagoda Street,到地面後前行即達。​

0 個留言於 “[新加坡] 牛車水原貌館 Chinatown Heritage Centre

發佈留言

發佈留言必須填寫的電子郵件地址不會公開。 必填欄位標示為 *