[新加坡] 松發肉骨茶 Song Fa Bak Kut Teh

之前為大家介紹過喜園咖啡店嘅咖椰多士做早餐，今次就為大家帶嚟好飲嘅肉骨茶啦！新加坡嘅肉骨茶寶號非常多，幾乎成行成市周圍都有，當中較為出名嘅有黃亞細、松發、發起人等等，呢次要介紹嘅就係松發肉骨茶啦～

肉骨茶喺東南亞主要分兩派，分別係福建派同潮州派。福建派較常見喺馬來西亞，呢一款肉骨茶比較深色，因為用上豉油調味，同時亦都加咗比較多嘅藥材喺裡面。而新加坡就主要係潮州派肉骨茶當道，以蒜頭同胡椒調味，顏色會相對上清啲。兩款各有特色，無話邊一款先係好或者唔好，大家不妨試下邊款啱自己多啲㗎！

雖然松發已經進駐幾個商場開分店，不過依然推薦大家去到佢哋位於New Bridge Road嘅分店，一來店舖比較貼近原始嘅裝潢佈局，另一方面呢間係獲得米芝蓮推介嘅分店，所以相對上質素會比較穩陣。

肉骨茶方面，除咗可以揀排骨同貴啲嘅龍骨之外，仲有豬內臟可以揀，例如豬腰、豬潤、豬肚同豬尾。另外亦都有魚片同肉片，適合唔鍾意有骨嘅朋友。大家仲可以揀雙拼，唔駛局限於一種料，一次試幾款都無問題。即使松發唔係以鹵水而出名，佢嘅鹵水同樣值得試！今次食嘅鹵粉腸，陣味非常吸引，完全食唔停口，一個人食一碟都唔誇張！你仲可以嗌白飯或者油炸鬼，甚至係麵線嚟配肉骨茶，輕輕鬆鬆食飽肚。喺呢度嘅肉骨茶仲有得添湯，唔怕太快飲晒啲湯水，去到Food Court嘅肉骨茶檔又點會有呢啲服務呀？

如果你飲完之後上癮嘅話，可以買湯包返屋企煲㗎，鍾意幾時飲，喺邊度飲，同邊個飲都得！送俾朋友做手信都唔錯㗎！每間分店都有得買，所以就算趕唔切喺分店裡面飲都可以隨便行入一間買～順帶一提，呢款湯包唔係即沖湯粉，要買材料(排骨同蒜頭等等) 煲先得㗎，無得就咁開水～

新加坡美食多的是，遲啲再為大家介紹其他新加坡美食，寫定張清單預備遲啲四圍食啦！

營業時間：星期二至日及公眾假期：09:00 至 21:15 (逢星期一休息)
網站：www.songfa.com.sg

地址：11 New Bridge Road #01-01, Singapore
交通：乘搭新加坡地鐵 MRT 東北線：前往克拉碼頭站 (Clarke Quay, NE5)，經E出口抵達路面後，過馬路到對面後即達。