嚟到2018年第一個星期，一於回顧下舊年嘅旅途先～
新加坡係唯一一個今年重複到訪嘅地方，每次排嘅行程都有些少分別，亦都試咗唔同嘅酒店，所以一直都有新鮮感，唔會覺得悶。希望嚟緊呢一年可以再去探索呢個島國，再加深對呢個地方嘅了解。新加坡附近亦都有其他地方值得去，或者下次我可以考慮下一票兩地！
今年係我第一次到訪台灣同泰國。呢兩個國家雖然一直都係香港人熱門嘅旅遊目的地，不過我就一直都無去過，直到今年先第一次去。台灣泰國各有特色，而且飛行時間短，再加上物價較香港低，難怪佢哋咁受歡迎嘅～
台灣同泰國，我都只係去咗佢哋嘅首都，台北同曼谷，未有機會去佢哋嘅其他城市。有機會希望可以進一步探索，例如高雄同布吉等等，或者會有另一番體會～
喺日本亦都去咗新嘅地方，分別係名古屋同福岡。即使同樣係日本嘅城市，比到我嘅感覺都有啲分別。雖然唔及得東京大阪咁，每一個角落都咁繁華，但吃喝玩樂都唔輸蝕。要食勻佢哋嘅美食，唔係三兩日可以做得到嘅事。搞到開始有啲心思思想學日文，等我可以深入二三線城市添～
雖然香港有購物天堂同美食天堂嘅美譽，好似唔需要特登出門去玩咁。不過我覺得其他城市，其實全部都唔差，去到都有大把美食同好嘢值得大家買。只要大家出發之前做足功課，而且願意去試新嘢，相信任何一個城市都會比到一個美好嘅回憶你！
今年我飛咗兩萬幾公里，不過喺我嘅願望清單上仲有好多地方想去，但係又似乎無咩可能一年內去哂，話晒都橫跨天南地北！希望嚟緊呢一年可以再去多啲地方，認識多啲呢個世界，順便可以同大家做多啲分享～唔知你哋今年有啲咩旅遊計劃呢？可以留言同我分享下㗎～
0 個留言於 “Flyerlog 2017年回顧”