[日本福岡] 福岡城 teamLab 城堡遺址燈光祭典

teamLab自2000年成立以嚟，一直喺各地舉辦唔同光影展覽，最近除咗登陸澳門之外，亦都分別喺墨爾本同福岡有展覽！福岡城嘅展覽去到今個月28號就會完結，嚟緊會去福岡玩嘅朋友就千祈唔好錯過啦～

2008年起開放參觀嘅福岡城係日本國家指定史跡，始建於1601年，至今已經有大約400多年嘅歷史。同其他大家熟悉嘅城跡唔同，福岡城遺址並無天守。至於福岡城以前有無天守，到而家仍然未有一個確切嘅結論。故此，福岡城遺跡以門及櫓為主。

展覽分為5個部分，如果你較早前睇過預告片嘅話，應該對一粒粒發光嘅蛋唔陌生。呢個展區係「呼応する、たちつづけるものたちと木々」。雖然每粒蛋係一個個嘅個體，但就可以透過推一推令到啲蛋互動～當你推郁啲蛋嘅時候，佢就會產生連鎖反應，令到周圍其他蛋一齊變色，直至傳到公園嘅另一邊！所以你一路行嘅時候，啲光可能四方八面咁傳嚟傳去㗎～

天守台嘅石牆亦都搖身一變成為展品～以花瓣組成嘅動物，一隻隻咁被投射喺牆上。你以為呢度齋睇無得玩？咁就錯啦，每當有人掂啲動物嘅時候，佢哋身上嘅花瓣就會開始凋落，當身上嘅花瓣全部凋落，動物就會隨之消失㗎啦～

剩低其餘展品雖然無互動嘅成份喺裡面，不過同樣令人嘆為觀止，不得不佩服 teamLab 團隊嘅創意以及科技所帶嚟嘅無限可能。唔知道大家有無去過呢個展覽呢？又或者大家又有無去過 teamLab 嘅其它展覽呢？大家不妨留言分享下～如果你有任何關於旅遊嘅問題，亦都歡迎您Inbox我哋或者留言問㗎～

福岡城 teamLab 城堡遺址燈光祭典官網：www.teamlab.art
開放時間：18:00 至 22:00 (最後入場時間：21:30)
入場費：成人1000日圓，中學生600日圓，小童(3歲以上) 300日圓

地址：福岡縣福岡市中央區城内 舞鶴公園 福岡城址
交通：乘搭福岡地鐵空港線前往 大壕公園站 (K06)，經5號出口步行約10分鐘即達。你亦可以前往 赤坂站 (K07)，經2號出口步行約15分鐘即達。