紐約地鐵巴士全線啟用非接觸式OMNY系統 用信用卡直接搭車

由紐約大都會運輸署（MTA）牽頭嘅非接觸式支付系統 OMNY，日前正式完成全部安裝工作，啱啱好趕及於新一年覆蓋全市嘅地鐵站同巴士！

紐約公共交通工具現時使用嘅支付系統 MetroCards 採用磁帶技術，並且早於1993年已經啟用。隨住科技日漸進步，有更多新方案出現，令磁帶車票嘅不足之處更加明顯，尤其係喺感應方面就經常出問題。於是 MTA 引進咗今次介紹嘅 OMNY ，方便大眾利用自己嘅信用卡、扣帳卡同埋個人裝置嚟支付車費。

連同布魯克林區以及皇后區巴士服務在內，OMNY 嘅服務範圍已經擴展到紐約市嘅 472 個地鐵站、5,800 架巴士同埋史丹頓島鐵路～喺服務範圍內就可以用支援非接觸式支付嘅信用卡或者扣賬卡（Debit Card）*，又或者係智能裝置內嘅支付功能（Apple Pay、Fitbit Pay、Google Pay 及 Samsung Pay 等等）支付車費！

OMNY 嚟緊仲計劃將服務範圍擴展至大都會北方鐵路（Metro-North Railroad）以及長島鐵路（LIRR）上，相信之後要係紐約嘅公共交通網絡上穿梭一定會越嚟越方便～只要拎住自己嘅信用卡或者電話，就可以輕鬆搭車四圍去！

備註
* OMNY 現時不支援 (1) 於消費時具密碼保護功能的扣賬卡 或 (2) 不能增值的預付扣賬卡。

資料來源：紐約大都會運輸署（MTA）新聞稿、OMNY 網站
圖片來源：紐約大都會運輸署（MTA），根據 CC BY 2.0 規定轉載