台中捷運12月正式通車 11月16號起開始免費試搭

台中捷運籌備多時，嚟到今年年底將會正式通車！台中嘅第一條捷運線－綠線，已經喺本月初獲得營運許可，將會由11月16號起試運一個月，試運期間使用電子票證嘅話就可以免費試搭～

台中捷運綠線由三個部份組成，今次率先啟用嘅係往來北屯總站至高鐵台中站嘅部份，一共十八個車站，全長接近17公里。沿線除咗能夠轉乘台鐵同高鐵之外，亦有途經文心森林公園及台中歌劇院等景點～

試運期分為兩個階段，11月16日到12月6日為第一階段，每日服務時間由 07:00 到 20:00 為止。至於班次方面，平日繁忙時間每5分鐘一班車，平日非繁忙時間以及假期就每8分鐘一班車。第二階段由12月7日至12月15日為止，會仿照正式通車後嘅時間表，將服務時間會延長至 06:00 到 00:00。新增嘅深夜時段（23:00 – 00:00）會維持每15分鐘一班車。

試運期間，只要用電子票證（悠遊卡、一卡通及愛金卡）就可以喺全線18個車站自由出入閘，搭足全程都係免費～如果無帶電子票證就需要去到車站旅客詢問處買飛，5公里內車程收費20台幣，按距離遞增，並以50台幣為上限。

試運期完結後，捷運將會關閉三日作檢查，然後喺 2020 年 12 月 19 日正式通車！喺呢度預祝捷運通車一切順利～

資料來源：台中捷運、台中市政府交通局