Flyerlog 筆記

Flyerlog 三年記

Flyerlog

三年前嘅八月九號,Flyerlog 正式成立。

初成立嘅時候,每日讀者數目唔多,亦都無太多嘅資源可以用,所以網站嘅速度都比較慢一啲。不過都好滿足,因為喺我一切由零開始嘅時候,都慢慢做出一啲嘅成績,開始有一定數量嘅讀者。

第二年,網站換咗伺服器、又換咗現時嘅新版面,仲增加咗唔少內容。多咗讀者又多咗資源,係進步相當快嘅一年。

不過接住落嚟嘅十二個月卻偏偏係網站經營裡面最困難嘅時候。唔單單係香港有翻天覆地的變化,就連成個世界都變得不太一樣。又有邊個會諗到國際旅遊會喺霎時間完全停頓?

畢竟呢個只係我嘅副業,所以我比好多從事旅遊業嘅人都要幸運,對生活都無太大影響。疫情啱啱開始嘅時候,都有唔少人預測受影響行業會喺下半年嚟個急速反彈,不過依家睇嚟都唔太可能。喺無咩新消息嘅情況下(大家都睇得夠多裁員清盤破產等嘅負面消息啦),難免會少咗更新,但係 Flyerlog 都會繼續同大家一齊~就係因為隔咗一排無更新,所以特登上嚟同大家打過招呼~

我哋未知幾時可以再次翱翔天際,不過大家要相信呢一日一定會嚟,正如「黑暗盡頭就是光明」嘅道理一樣。

We Will Fly Again.

Flyerlog
2020.08.09

0 個留言於 “Flyerlog 三年記

發表回覆

你的電郵地址並不會被公開。 必要欄位標記為 *