日本東京羽田機場由3月14號起，將原本嘅「國際航站樓 (International Terminal)」更名為「三號航站樓 (Terminal 3)」！
今次係為咗配合「二號航站樓 (Terminal 2)」開始營運國際線航班而改動客運大樓嘅稱號，以免乘客混淆～因應客運大樓嘅命名有變，京急鐵路以及東京單軌電車兩間公司服務羽田機場嘅車站亦會改名！
| 鐵路公司 | 車站編號 | 舊車站名字 | 新車站名字 |
| 京急鐵路 | KK16 | 羽田機場國際線航廈站 | 羽田機場第3航廈站 |
| KK17 | 羽田機場國內線航廈站 | 羽田機場第1・第2航廈站 | |
| 東京單軌電車 | MO08 | 羽田機場國際線大樓站 | 羽田機場第3航廈站 |
| MO10 | 羽田機場第1大樓站 | 羽田機場第1航廈站 | |
| MO11 | 羽田機場第2大樓站 | 羽田機場第2航廈站 |
原有嘅「國際航站樓停車場」就會被編成「五號停車場 (P5)」，前往各個客運大樓嘅路牌都會因此而有所更改。詳情可以參考以下呢張由羽田機場發佈嘅地圖～
京急電鐵同日仲會更改另外四個車站嘅名字，配合公司創立 120 週年！連同羽田機場兩個車站，京急將會一日內更改六個車站嘅名～佢哋嘅發言人接受川崎經濟新聞訪問時表示，希望站名能夠得到當地市民嘅喜愛，並且追上時代嘅步伐。
| 路線 | 車站編號 | 舊車站名字 | 新車站名字 |
| 大師線 | KK25 | 產業道路站 | 大師橋站 |
| 本線 | KK30 | 花月園前站 | 花月總持寺站 |
| KK35 | 仲木戶站 | 京急東神奈川站 | |
| KK53 | 新逗子站 | 逗子·葉山站 |
大家之後再去東京、橫濱一帶玩嘅時候，就記得要留意呢啲改動啦！尤其係要出入羽田機場搭飛機嘅朋友，小心唔好去錯客運大樓～
封面圖片由 Marcus Ng 拍攝，特此鳴謝。
0 個留言於 “羽田機場客運大樓及京急多個車站3月14日起改名”