目的地介紹

[日本東京] 2020年精選新酒店巡禮-淺草 新宿 上野 東京各區

日本 東京

更新:2020年5月28日(修訂各間酒店開業日期)

注意:
因應武漢肺炎(新型冠狀病毒 COVID-19)疫情,全球多國仍然維持出入境限制及人流管理措施。有關措施可能隨時有所更改,故此預訂前應先留意有關更改或取消的條款及細則。除此之外,酒店亦可能因防疫或營運需要,更改開業日期,或修訂提供的服務及設施,文章內容只供參考。

東京無論幾時都好受大家歡迎,單係睇吓大家有幾掛住日本就知道啦~
既然大家都咁掛住呢個東瀛大都會,今次為大家帶嚟歷來最豐富嘅新酒店巡禮,一一介紹二十間2020年喺東京開幕嘅新酒店!佢哋各有特色,橫跨不同集團、價位、區域。
嚟緊仲會加入更多今年開幕嘅酒店,有興趣就記得密切留意我哋嘅更新啦~事不宜遲,先睇睇二十間 2020 年東京開幕嘅新酒店!

重溫
2018年東京精選新酒店巡禮:1月 至 3月 | 4月 至 6月 | 7月 至 12月
2019年東京精選新酒店巡禮:1月 至 6月 | 7月 至 12月



2020年1月9日開業
MIMARU 東京上野御徒町
MIMARU TOKYO UENO OKACHIMACHI

近嚟好受歡迎嘅 MIMARU 公寓,今年會再開多兩間,分別喺上野同新宿~位於上野御徒町嘅會率先喺1月開幕,5分鐘路程內就已經有齊地鐵站同 JR 站!
酒店有齊西式公寓同日式公寓,不過想集中介紹日式公寓,皆因佢有兩大特色房型!有個廳好闊落嘅忍者房,又有配備壽司吧檯嘅豪華公寓~後者試問可以去邊度搵得到呀?不過睇怕都要先搵到個壽司師傅嚟做壽司啦!四人公寓面積由377呎,六人公寓面積由527呎起,八人公寓面積就係807呎。

地址:東京都台東區上野一丁目 17-1
鄰近車站:JR 御徒町站 及
東京Metro 地鐵銀座線 上野廣小路站、都營地鐵大江戶線 上野御徒町站
電話:+81 03-5444-3600 (預訂專用)
立即訂房:Agoda / Booking.com / 酒店官網
參考價錢:連稅每晚約港幣 1,726 元

2020年1月24日開業
三井花園酒店六本木普米爾
Mitsui Garden Hotel Roppongi Tokyo Premier

之前兩年都分別各有一間 Premier 嘅三井花園酒店喺東京開幕,今年亦都唔例外,繼續有 Premier 登場!今次開喺繁華嘅六本木,離開地鐵站大約五分鐘路程左右~
外觀以摺紙同屏風為主題,內在配合木材以及日式塗料,令到酒店由外到內都充滿日系特色㗎!齋係睇佢啲相就已經覺得佢好靚好吸引啦~雖然呢間 Premier 無大浴場,但就有健身室~
房型分成四個等級,當中包括唯一一間嘅小型套房~除咗入門級別嘅普通房無雙床配置之外,其他都能夠選擇雙人床或者雙床~客房面積由221呎起。

地址:東京都港區六本木三丁目 15-17
鄰近車站:東京Metro 地鐵日比谷線、都營地鐵大江戶線 六本木站 及 地鐵南北線 六本木一丁目站
電話:+81 03-5545-1431
立即訂房:Agoda / Booking.com / 酒店官網
參考價錢:連稅每晚約港幣 1,176 元

2020年2月1日開業
Tokyo East Side Hotel KAIE

東京灣一帶繼續有唔少新酒店登場,今次輪到京葉線潮見站旁邊嘅 Hotel KAIE 加入~喺正車站對面,步行1分鐘就到!京葉線可以輕鬆往返東京站、迪士尼所在嘅舞濱,同埋Outlet 所在嘅海濱幕張,都幾方便㗎~
日系設計造就酒店喺中庭部份興建咗個竹林,優雅得嚟又唔會太浮誇~酒店提供七種不同房型,當中包括套房。除咗西式客房之外,亦有提供和洋室~兩者均有家庭房,適合一家大細入住。客房面積由226呎起。

地址:東京都江東區潮見二丁目 8-10
鄰近車站:JR 京葉線 潮見站
電話:+81 03-3699-0403
立即訂房:Agoda / Booking.com / 酒店官網 (日文)
參考價錢:連稅每晚約港幣 1,425 元

2020年3月26日開業
JR東日本五反田METS酒店
JR-EAST HOTEL METS GOTANDA

五反田站周邊近嚟多咗唔少酒店,今次輪到五反田站上蓋有 JR 嘅酒店開業~呢度有淺草線又有山手線,去好多地方都唔使轉車~而且酒店樓下有商店,仲連接住傍邊嘅商場,齊備超市、百円店、無印等等~
三個級別嘅客房分別在細分成雙人房同雙床房,指定房型可以加床變成三人房~無論大房細房都一樣有浴缸添~最細嘅客房面積由183呎起。

地址:東京都品川區東五反田一丁目 26-3
鄰近車站:JR、東急池上線、都營地鐵淺草線 五反田站
電話:+81 03-6408-0011
立即訂房:Agoda / 酒店官網 (日文)
參考價錢:連稅每晚約港幣 1,008 元

2020年3月26日開業
MIMARU 東京西新宿
MIMARU TOKYO SHINJUKU WEST

另一間今年開幕嘅 MIMARU 公寓位於西新宿,喺東京都廳嗰邊,亦係酒店林立嘅區域,六月份開幕嘅金普頓 (Kimpton) 就喺附近啦~MIMARU 西新宿離開新宿車站稍為遠少少,需要步行大約14分鐘左右。
酒店提供三種不同房型,兩種西式房型以及一種日式房型,全部都係適合四人入住~至於客房面積方面,分別由431呎同452呎起~因為佢係公寓酒店嘅關係,每間房都有廚房,同時有提供投幣式洗衣機俾住客使用,尤其適合 Long Stay 嘅朋友~

地址:東京都新宿區西新宿三丁目 3−11
鄰近車站:JR、都營地鐵大江戶線 新宿站
電話:+81 03-5444-3600 (預訂專用)
立即訂房:Agoda / Booking.com / 酒店官網
參考價錢:連稅每晚約港幣 1,893 元

2020年4月7日開業
京急 EX Inn 東京日本橋
Keikyu EX Inn Tokyo Nihombashi

住喺東京站附近唔單止可以享受交通便利,仲有琳琅滿目嘅美食~京急 EX Inn 今次就去到茅場町開業,一來近地鐵站,二來毗鄰日本橋,三來步行十五分鐘就去到東京站~行街食飯都好方便!
酒店雖然有五種房型,但就全部都係配備雙人床,並無提供雙床房。佢哋特別強調適合女性住客,因為佢哋提供多元化嘅備品~最細嘅客房面積由140呎起。

地址:東京都中央區日本橋茅場町2丁目 4-8
鄰近車站:東京Metro 地鐵日比谷線、東西線 茅場町站 及 JR、地鐵日比谷線 八丁堀站
電話:+81 045-307-5311
立即訂房:Agoda / Booking.com / 酒店官網 (日文)
參考價錢:連稅每晚約港幣 926 元

2020年4月27日開業
mesm 東京, 傲途格精選酒店
mesm Tokyo, Autograph Collection

萬豪嘅傲途格精選系列雲集唔少優質嘅精品酒店,不過喺日本就一直都只得一間酒店~今年就終於擴充規模,同 JR 東日本聯手推出位於竹芝嘅 mesm Tokyo!
酒店名取自英文 mesmerize 一詞,表達酒店希望能夠從唔同嘅感官迷住客人~所以酒店採用職人咖啡品牌「猿田彥珈琲」嘅咖啡,又喺每間房配置Casio 嘅電子鋼琴,另外仲起用當地品牌 BULK HOMME 嘅備品~既重視質量,亦都重視本土品牌。
265間客房分佈喺17至26樓,四種房型裡面包括咗兩款套房。部分客房可以俯瞰前方嘅濱離宮恩賜庭園,又或者係欣賞東京灣嘅景色~至於客房面積就由431呎起。

地址:東京都港區海岸一丁目 10-30
鄰近車站:JR、東京單軌電車 濱松町站 及 百合海鷗線 竹芝站
電話:+81 03-5777-1111
立即訂房:Agoda / Booking.com / 酒店官網 (英文)
參考價錢:連稅每晚約港幣 4,822 元

2020年6月8日開業 (原定2020年5月12日開業)
SORANO HOTEL

立川站係JR 中央線嘅其中一個大站,雖然同新宿等旺區有至少25分鐘車程嘅距離,但就相對地近一啲富士山,以及銀杏勝地昭和記念公園~呢邊嘅新發展項目裡面都有新酒店登場- SORANO HOTEL!離開車站大約8分鐘路程~
酒店以遠離都市煩囂,為都市人叉叉電作為理念~室內設計由法籍設計師 Gwenaël Nicolas 操刀,以大地色系為主軸,裝飾就仿照帳幕。頂層十樓同十一樓係浴池、健身室同無邊際泳池~至於酒店房就分為四級,全部面向昭和記念公園之餘,面積由560呎起兼且有露台!

地址:東京都立川市綠町3-1 W1
鄰近車站:JR 中央本線、青梅線、南武線 立川站
電話:容後補上
立即訂房:酒店官網 (英文)
參考價錢:連稅每晚約港幣 3,796 元

2020年7月1日開業 (原定2020年6月1日開業)
上野 Resol 酒店
Hotel Resol Ueno

Resol 系列繼舊年喺秋葉原之後,今年喺東京再開新酒店,今次去到上野站前,距離上野車站只係1分鐘!行過少少仲係 SKYLINER 總站,一程車直達成田機場~
呢個位置除咗四通八達之外,仲好方便觀光同開餐~附近就已經係上野之森美術館同上野動物園啦!行落啲就係阿美橫町,食嘢買嘢都啱~
酒店設有115間房,分別由106間雙人房,以及9間雙床房組成。前者面積有161呎,而後者就有215呎。

地址:東京都台東區上野七丁目2-9
鄰近車站:JR、東京Metro地鐵日比谷線 及 銀座線 上野站
電話:容後補上
立即訂房:Agoda / 酒店官網 (日文)
參考價錢:連稅每晚約港幣 874 元

2020年7月3日開業 (原定2020年5月30日開業)
東京田町靜鐵 PREZIO 酒店
Shizutetsu Hotel PREZIO Tokyo Tamachi

東京嘅第一間靜鐵 PREZIO 酒店,將會喺田町站附近開幕~田町係山手線嘅車站之一,所以無論係要穿梭東京各區,抑或接駁其他列車往返近郊同機場都好適合!
酒店餐廳設喺向河嘅方向,除咗自助早餐時段外,其餘大部份時間都開放俾住客作休息室,可以免費享用飲品~
酒店合共提供四種房型,大部分屬單人房 (小型雙人床),另外仲有雙人房同雙床房。單人房嘅面積由188呎起。每間房都配備書枱,方便出差嘅朋友,唔使喺張床度趕工~

地址:東京都港區芝浦三丁目 6-18
鄰近車站:JR 山手線、京濱東北線 田町站
電話:+81 03-6722-0711 (開業籌備辦公室)
立即訂房:Agoda / 酒店官網 (日文)
參考價錢:預計1月14日起開放預訂

2020年7月6日開業 (原定2020年4月開業)
八重翠東京酒店

Hotel Yaenomidori Tokyo

阪急阪神酒店喺東京都開唔少酒店,例如係舊年年尾嘅 remm~而今年會喺八丁堀開新酒店,用上新品牌「八重翠」!酒店離開東京站大約12分鐘路程,近少少附近仲有其他地鐵站~
八重翠呢個名,代表住佢哋嘅八種待客之道,包括「香」、「景」、「心」、「綠」等等~每個範疇都各自透過酒店嘅不同部份反映出嚟,例如係天空花園就係「綠」嘅代表~
酒店提供五種房型,包括單人房、雙人房、雙床房以及三人房,全部採用乾濕分離設計~最細小嘅房型,房間面積由183呎起。

地址:東京都中央區八丁堀二丁目 13-8
鄰近車站:東京Metro地鐵日比谷線 八丁掘站
電話:+81 03-6263-2020
立即訂房:Agoda / Booking.com / 酒店官網 (日文)
參考價錢:連稅每晚約港幣 1,050 元

2020年7月15日開業 (原定2020年6月15日開業)
Hotel TAVINOS 淺草

Hotel TAVINOS Asakusa

藤田觀光旗下有華盛頓 (Washington)、格拉斯麗 (Gracery) 兩大酒店品牌,最近就推出新品牌 TAVINOS 主攻年輕市場~第一間2019年中已經喺濱松町開幕,今年就有第二間喺淺草開業!位置比較近筑波快線嘅淺草站,同其他地鐵站有大約10分鐘距離。
科技固然係吸引年輕住客嘅元素之一,大堂設有配備 AI 嘅大型觸控螢幕提供資訊~另外,酒店房間以「漫畫」為主題,由被鋪到壁畫都緊扣呢個主題㗎~除此之外,交誼廳每日都有輕食同飲品提供!房間面積由129呎起。

地址:東京都台東區淺草二丁目 8-1 (地番)
鄰近車站:筑波快線 淺草站
電話:容後補上
立即訂房:Agoda / Booking.com / 酒店官網
參考價錢:連稅每晚約港幣 609 元

2020年7月開業 (預計,原定2020年4月開業)
東京淺草曼迪設計酒店
hotel MONday Asakusa

hotel MONday 係比較新嘅品牌,之前喺東京只有兩間酒店,不過今年就會接連喺東京開三間酒店,率先開幕嘅會係位於淺草嘅 hotel MONday Asakusa!酒店離開筑波快線嘅車站大約3分鐘路程,地鐵站就大約11分鐘路程。
全部124間房都係屬於雙床房,部分客房配備梳化床,能夠做到三人一房,甚至係三位大人加一位小朋友都可以~客房面積由191呎起。

地址:東京都台東區淺草二丁目26
鄰近車站:筑波快線 淺草站
電話:+81 03-6453-0960 
立即訂房:Agoda / Booking.com / 酒店官網
參考價錢:連稅每晚約港幣 804 元

2020年7月開業 (預計,原定2020年5月開業)
東京淺草橋曼迪設計酒店
hotel MONday Asakusabashi

至於第二間登場嘅 hotel MONday,就會同月喺淺草橋附近登場~唔講唔知,其實三間全部都位於同一區,不過就各自靠近唔同嘅車站~位於淺草橋嘅呢間離開車站只係1分鐘路程,唔使行好遠就有車搭~
淺草橋呢間有94間房,分別有雙人房、雙床房、三人房以及四人房。四人房比較特別,係由兩張單人床加一張碌架床組成~因為有雙人房嘅緣故,所以最細嘅房只有138呎大。

地址:東京都台東區淺草橋二丁目29-12
鄰近車站:JR 總武線、都營地鐵淺草線 淺草橋站
電話:+81 03-6453-0960 
立即訂房:Agoda / Booking.com / 酒店官網
參考價錢:連稅每晚約港幣 857 元

2020年7月開業 (預計,原定2020年6月開業)
東京御徒町曼迪設計酒店
hotel MONday Okachimachi

第三間今年開業嘅 hotel MONday 落戶御徒町,酒店周邊繁華些少,交通亦比剛才淺草嗰間方便啲,五分鐘內就有齊JR車站同地鐵站~就算要步行去上野或者秋葉原都OK~
呢度有會議室有大浴場,出差或者歎世界都可以~酒店有124間房,全部都係採用單人床,再分成雙床房、家庭房等~家庭房可以容納最多四位成人加一位小朋友添!房間面積由198呎起。

地址:東京都台東區台東三丁目41
鄰近車站:東京Metro 地鐵日比谷線 仲御徒町站
電話:+81 03-3532-8141
立即訂房:Agoda / Booking.com / 酒店官網
參考價錢:連稅每晚約港幣 880 元

2020年8月1日開業 (預計,原定2020年5月1日開業)
東京赤坂最佳西方 Fino 酒店
Best Western Hotel Fino Tokyo Akasaka

雖然日本有唔少本土嘅連鎖品牌,不過嚟自西方嘅 Best Western 喺日本都不斷擴張~今年奧運年就喺東京開新酒店,進駐比較寧靜嘅赤阪,離開地鐵站大約3分鐘路程。由呢度出發可以輕鬆往返澀谷、新宿同銀座等等!
呢間 Best Western 嘅規模比較細,只係設有87間房,但都提供三種不同房型,分別有兩級別嘅雙人房,以及雙床房。房間面積由140呎起。

地址:東京都港區赤坂三丁目 7-12
鄰近車站:東京Metro地鐵千代田線 赤坂站 及 銀座線、丸之內線 赤坂見附站
電話:+81 03-5575-3711 (開業籌備辦公室)
立即訂房:Agoda / Booking.com / 酒店官網 (日文)
參考價錢:連稅每晚約港幣 700 元

2020年夏季開業 (預計,原定2020年4月開業)
Hotel Villa Fontaine Premier Haneda Airport 及 Hotel Villa Fontaine Grand Haneda Airport

羽田機場新建成嘅複合設施-「羽田機場花園」會喺春季開幕~佢唔單止有商場同巴士站,仲有 Hotel Villa Fontaine 嘅兩間酒店以及頂樓露天溫泉,足足有成千七間房!
酒店所在嘅大樓連接住國際線客運大樓 (三號客運大樓),啱晒大家搭凌晨機前後去唞唞~
項目分別由兩間同屬 Hotel Villa Fontaine 品牌嘅酒店組成,佢哋分別屬 Premier 以及 Grand 嘅級別。前者定位較高級,只係設有160間房,而且就連最細嘅房都有344呎~後者就比較大眾化,提供十二個不同房型,包括三人房同四人房,合共有成一千五百幾間房,至於面積就由194呎起~

地址:東京都大田區羽田空港2丁目 8-5、8-6 
鄰近車站:京急電鐵、東京單軌電車 羽田機場國際線航站樓站
電話:+81 03-6459-9770 (預約專用)
立即訂房 (Premier):Agoda / Booking.com / 酒店官網
參考價錢:連稅每晚約港幣 3,413 元
立即訂房 (Grand):Agoda / Booking.com / 酒店官網
參考價錢:連稅每晚約港幣 1,713 元

2020年9月1日開業 (預計,原定2020年6月開業)
東京新宿金普頓酒店
Kimpton Shinjuku Tokyo

洲際旗下嘅金普頓 (Kimpton),2018年先第一次嚟到亞洲喺台北開業~嚟到2020年,佢哋就會先後喺東京同埋曼谷開業!東京嘅 Kimpton 落戶新宿區,離開新宿站大約10分鐘路程,靠近東京都廳。
Kimpton 嘅品牌特色,喺呢度通通有齊~有免費單車租借,有傍晚 Social Hour,仲有瑜伽班等~
秉承佢嘅精品奢華路線,新宿金普頓只係有162間客房同套房~與此同時,佢哋係一啲小細節裡面入鄉隨俗,毛巾標明使用愛媛縣嘅今治毛巾。話唔定仲有更多當地元素等緊大家發掘!入門級別嘅客房面積由258呎起。

地址:東京都新宿區西新宿三丁目 4-7
鄰近車站:JR、都營地鐵大江戶線 新宿站
電話:+81 03-5783-1262
立即訂房:Agoda / Booking.com / 酒店官網 (英文)
參考價錢:連稅每晚約港幣 2,940 元

2020年9月1日開業 (原定2020年6月25日開業)
三井花園酒店豐洲BAYSIDE CROSS東京
Mitsui Garden Hotel Toyosu BAYSIDE CROSS Tokyo

上半年另一間開業嘅三井花園酒店,就係位於三井花園酒店豐洲 BAYSIDE CROSS 東京~酒店喺連接豐州站嘅複合型建築內,並且只係佔據大樓頂部嘅33樓到36樓~
正因為酒店位處高層,所以餐廳同大堂都設喺36樓。大浴場亦設喺36樓,居高臨下之餘,有齊內湯外湯添~
酒店提供八種不同房型,大致可以分成五個級別,大部份級別都同時配備雙人房同雙床房兩個選項。勝在酒店夠晒高,所以每間房都能夠飽覽東京灣嘅靚景~房間都算闊落,入門級別嘅客房面積由208呎起。

地址:東京都江東區豐洲二丁目 2-1
鄰近車站:東京Metro地鐵有樂町線、百合海鷗線 豐洲站
電話:+81 03-3534-3931
立即訂房:Agoda / Booking.com / 酒店官網
參考價錢:連稅每晚約港幣 929 元


先為大家介紹住咁多先,想知更多東京新酒店嘅話就記得 Bookmark 定呢版,留意我哋之後嘅更新啦~


相關文章:
[日本東京] 2019年下半年精選新酒店巡禮
[日本] 2019年東京近郊精選新酒店巡禮
[日本東京] 2019年上半年精選新酒店巡禮

封面圖片由 t-mizo 拍攝,並根據 CC BY-SA 2.0 許可協議於本篇文章內使用,特此鳴謝。

0 個留言於 “[日本東京] 2020年精選新酒店巡禮-淺草 新宿 上野 東京各區

發表回覆

你的電郵地址並不會被公開。 必要欄位標記為 *