[新加坡] 美食推介 － 結霜橋叻沙 Sungei Road Laksa

講起新加坡嘅美食，唔知大家第一樣諗起嘅會係邊樣呢？海南雞飯？咖椰多士？肉骨茶？呢啲我都曾經介紹過一間心水推介俾大家，不過有一樣美食我就仲未介紹過啦，講緊嘅係叻沙 (Laksa) ～今次同大家介紹「結霜橋叻沙」，特別在於佢哋仲堅持用炭爐煮叻沙㗎！

有留意開唔同美食 Blog 嘅朋友，話唔定都聽過「結霜橋叻沙」呢個大名～早年就算要由勞明達地鐵站 (Lavender) 行十幾廿分鐘過嚟，都有唔少人特登嚟朝聖㗎！不過早兩年附近就開咗個新嘅地鐵站－惹蘭勿剎站 (Jalan Besar)，要嚟食叻沙就方便好多啦，五分鐘路程就到！

「結霜橋叻沙」位於一個叫「伙食街」嘅地方，亦即係該處組屋嘅美食中心嚟，所以係呢度除咗有叻沙之外，大家仲可以試到其他美食～不得不承認嘅係，大部份人嚟到都係食叻沙，所以大家幾乎咩時間嚟都會見到有條小小嘅人龍係鋪頭前！

叻沙無分大細，無價錢之分，每碗劃一都係三蚊坡紙，所以落單只係需要講你想要幾多碗。一碗份量唔係大，所以一個人食兩碗都應該唔係問題～記得留意呢度唔係用筷子食㗎，要用匙羹食～雖然用開筷子會覺得佢唔方便，但咁樣食就可以啖啖都有湯！湯底本身椰漿味好濃郁，至於辣味就要靠自己調整，因為佢嘅辣醬會係搽喺碗邊等你自己撈落湯。

唔好睇少佢碗仔細細，裡面都好足料下～面頭有喇沙葉碎提味，配料方面就有獅蚶、魚片同肉碎。獅蚶都係一樣幾有爭議性嘅配料，鐘意嘅朋友會覺得佢鮮甜，唔鐘意嘅就會覺得佢又腥又鹹，唔知你又係邊一類呢？我就覺得佢係不可或缺嘅配料啦！

咁多年嚟，「結霜橋叻沙」經常都係人龍不絕嘅旺店，皆因佢用炭爐煮確實係一大特色。另一方面，店家一直都好低調，就連舖面都係禁止攝錄！或者就係因為以上呢兩個原因，佢哋咁耐以嚟都無開分店，繼續留守喺惹蘭勿剎呢度。所以如果大家都想一嘗炭爐叻沙嘅美味，就要行多兩步路去搵佢啦！

今次嘅介紹暫告一段落啦，如果你有任何關於旅遊嘅問題，例如係揀酒店、行程規劃等等，都歡迎您 Inbox 我哋或者留言問，我會盡全力解答你有嘅疑難～

營業時間：09:30 – 16:00 (逢星期三休息，售完即止)
電話：+81 052-566-2111
地址：Blk 27, Jalan Berseh #01-100, Singapore 200027
交通：
乘搭新加坡地鐵濱海市區線前往惹蘭勿剎站 (Jalan Besar, DT22)，經 A 出口離站後沿 Jalan Besar 前行，於 Berseh Food Centre 後路口右轉前行即達，全程約需五分鐘。