目的地介紹

[日本岐阜] 飛驒古川半日遊 - 漫步古色古香街道

飛驒古川站

之前簡述我今次立山黑部之旅嘅時候就同大家介紹過張周遊券啦,既然係用 JR Pass,咁就當然順便睇吓可以點樣善用佢~因為今次行程係搭JR特急飛驒號往返名古屋同富山,所以就選擇咗喺中途站 - 飛驒古川 短暫停留幾個鐘,嚟返個半日遊。

飛驒古川半日遊 - 交通

乘搭JR特急「飛驒」號嘅話,由富山站出發搭四個站就到,車程大約係75分鐘左右。每日每個方向大約有四至五班「飛驒」號列車喺度停站,相對全線嘅十對往返班次為少,所以編排行程時一定要就住火車時間表。不過如果大家係喺高山住嘅話,往返飛驒古川嘅火車數量就多好多,平均每個鐘頭都有一班,方便唔少!

以我今次嘅行程為例,我就揀搭大約十點鐘由富山開出嘅飛驒8號,大約十一點三就到。接住後續就搭約莫兩點半出發嘅飛驒14號,五點鐘返到去名古屋。全程有三個鐘時間探索飛驒古川!雖然時間唔算多,不過起碼都夠散步同食個晏~

飛驒古川站只有一個出入口同客戶服務處,只會喺列車埋站時間前後先開放。除非你係搭自由席唔需要劃位,如果唔係會建議你先喺其他比較大型嘅車站訂飛,會比較方便。

飛驒古川半日遊 - 行程

飛驒古川面積唔算大,單靠步行遊覽都已經好足夠。車站旁邊嘅遊客中心外有儲物櫃可以存放行李,就算係大喼都擺得落,唔使拖住隻喼四圍行。喺遊客中心仲有各種語言嘅資料可以攞,拎埋地圖就可以出發啦。

為咗方便食晏,今次行程選擇先遊覽外圍嘅景點。唔講唔知,古川喺上世紀60年代曾經遭遇大火,燒毀唔少建築,當中就包括今次參觀嘅本光寺。現存嘅本光寺已經係重建而成嘅,而佢就係飛驒一帶最大型嘅木製建築。另外喺一啲街角會有屋台展出,屋台係飛驒嘅標記之一,喺每年嘅古川祭都必定會有屋台巡遊嘅環節,而且仲係聯合國教科文組織的非物質文化遺產嚟添。

飛驒古川半日遊 - 本光寺
飛驒古川半日遊 - 本光寺

瀨戶川和白壁土藏街相信係成個古川裡面最熱鬧嘅地方~熱鬧在於呢度有成千條鯉魚遊嚟遊去!大家可以喺指定嘅位置搵到賣飼料嘅箱,放低100円就可以自己攞一袋去餵魚~份量都唔少,起碼我哋一行人幾乎餵足成條街先餵完!飼料箱下低會收集返大家用完嘅袋,減少垃圾。提提大家,喺冬天 (12月至3月) 嘅時候鯉魚會被遷移至其他地方暫住,所以冬天到訪就無得探鯉魚啦~

瀨戶川啲鯉魚其實都同樣有段故仔解釋佢哋嘅因由~話說瀨戶川起初係一條非常乾淨嘅河流,街坊連平日洗菜都係用呢度嘅水,不過後來因為垃圾問題而令河流嚴重污染。好彩居民一齊同心協力整理河道,仲以「乾淨到鯉魚都可以生活」為目標~鯉魚只能夠喺乾淨嘅水域生活,所以有鯉魚嘅河道,一定唔會污糟得去邊!當大家見到有咁多鯉魚嘅時候就知道,居民嘅共同努力一啲都無白費到~

飛驒古川半日遊 - 瀨戶川和白壁土藏街
飛驒古川半日遊 - 瀨戶川和白壁土藏街

飛驒古川半日遊 - 彩蛋

去之前雖然有做過吓功課,但都無留意到飛驒古川站嘅特點~喺車站旁邊嘅天橋係必到嘅景點嚟,因為呢度係「你的名字」取材嘅景點之一~

電影裡面其中一幕嘅車站就係以飛驒古川站為藍本,而且戲裡面嘅場景仲每一日都會喺呢度上映添!呢度好貼心咁喺天橋上張貼火車時間表,等大家可以揀啱時間影相~但要完全還原嗰一幕嘅話,據知就只有朝早9點鐘左右嘅一次機會,要捕捉到一啲都唔易!

飛驒古川站 - 「你的名字」取材地之一
飛驒古川站 - 「你的名字」取材地之一

今日先介紹住喺飛驒古川嘅所見所聞,下次為大家介紹飛驒古川嘅美食,大家千祈唔好錯過呀!今次時間差唔多啦~如果大家有任何關於行程或者旅行嘅問題,歡迎您留言或者Inbox問~

參考資料:飛驒市觀光協會網站

延伸閱讀:
[日本富山] 富山站前大和ROYNET 酒店 Daiwa Roynet Hotel Toyama-Ekimae
[日本富山] 立山黑部阿爾卑斯山脈行程規劃-票券、交通、路線
[日本富山] 立山黑部阿爾卑斯山脈行程-旅程記錄

0 個留言於 “[日本岐阜] 飛驒古川半日遊 - 漫步古色古香街道

發表回覆

你的電郵地址並不會被公開。 必要欄位標記為 *