[日本東京] 三井花園酒店大手町 Mitsui Garden Hotel Otemachi

今年喺新酒店巡禮系列裡面為大家都介紹咗夾夾埋埋成14間東京新酒店，唔知道大家去東京玩嘅時候有無去住過呢？最近去東京嘅時候我就喺裡面揀咗一間嚟試啦～點都唔可以齋講但係連自己都唔去住㗎嘛！今日就等我同大家分享下喺三井花園酒店大手町嘅住宿體驗！

重溫新酒店巡禮：[日本東京] 2018精選新酒店巡禮
1月-3月 | 4月-6月 | 下半年 (7月-12月)

三井集團今年喺東京開咗3間酒店，除咗大手町之外，另外亦開咗喺五反田以及日本橋。今次行程比較多要搭JR去近郊地方玩，所以就揀咗近東京站嘅大手町～今次已經係我第二次住三井旗下嘅酒店，上次係喺名古屋。雖然三井嘅酒店定位比較類近商務酒店，房會細啲，設施會少啲，不過我覺得佢哋嘅服務同裝潢都好出色，對佢哋嘅印象非常好，所以今次揀酒店嘅時候都幾乎只係三間新開嘅三井酒店。

呢度唔係淨係搭JR先方便，地鐵出入亦都好方便！離酒店近啲嘅大手町站有成5條地鐵線，去好多地方都唔使再轉車～酒店房嘅價錢仲相當合理，除返開每晚連稅之後都只係九百幾蚊咋，比當初介紹嘅時候見到嘅價錢再低咗唔少。所以如果大家係搵緊近大車站嘅住宿，呢度係一個唔錯嘅選擇！

1樓係酒店大堂同餐廳，自助早餐係以三文治為主題，大家有興趣都可以試下～綜合幾日嘅觀察，發現呢間酒店都有唔少外國人住，就算上網睇評價都有唔少係歐美國家嘅遊客嚟。比起旺區接待旅行團嘅酒店，要寧靜嘅居住環境就應該揀呢度～

全酒店191間房分為7種房型，最基本嘅普通房有194呎大。房內設計方面有少少復古味，不過設備方面就新舊混合。一方面有藍芽喇叭、Handy電話同空氣清新機呢啲小電器，另一方面燈掣卻唔係插卡自動開關。為咗營造空間感，房裡面除咗一套枱櫈同一個層櫃之外，都無咩其他擺設，所以開喼執嘢都幾輕鬆～雖然個櫃裡面有雪櫃有熱水煲，不過設計方面就比較複雜。若果打開個頂煲水又會少咗好多位擺嘢，唔打開個頂又唔方便煲水，對呢個櫃簡直又愛又恨。

開首嘅時候我就讚過三井酒店服務好，咁到底好喺邊呢？咁就要講下落雨天啦～落雨嘅時候，酒店竟然預備咗一大批遮放喺大堂俾住客攞去用！你可能會覺得平日酒店房裡面都有遮，覺得呢樣嘢一啲都唔特別，但我就覺得呢個服務先係為客人著想～起碼用完返到嚟，唔使拎住把滴水嘅遮入房，唔知擺邊度先好。

三井花園酒店大手町無可置疑係一間值得推介酒店，實惠嘅價錢、平實嘅硬件、出色嘅服務，都係佢嘅優點。可能佢唔及附近五星酒店嘅奢華，亦都唔及其他三星酒店嘅低價，但我確信佢係一間面面俱到嘅好酒店。

大家如果你有任何關於旅遊嘅問題，亦都歡迎您留言或者Inbox問㗎～

三井花園酒店大手町官網：www.gardenhotels.co.jp
電話：+81 03-3254-3131
參考價錢：每晚連稅港幣 951 元

地址： 東京都千代田區內神田2-1-2
交通：由JR 東京站丸之內北口步行約10分鐘即達，地面及地下街均可到達酒店附近，返回路面後的路段建議行經酒店旁邊的鎌倉橋。