目的地介紹

[新加坡] 新加坡國家美術館 National Gallery Singapore

上星期同大家介紹過Gardens by the Bay 濱海灣花園,今個星期繼續同大家介紹下新加坡嘅景點~不過今次就轉一轉風格,由室外轉去室內!今日介紹大家去新加坡國家美術館,欣賞一下新加坡以及東南亞嘅美術品,悠閒地渡過一個充滿藝術氣息嘅上晝~

重溫上回:[新加坡] 濱海灣花園 華僑銀行空中走道

新加坡國家美術館喺2015年尾先開幕,都算係比較年輕嘅美術館。不過組成美術館嘅兩座建築物就大有來頭,兩座都係法定嘅國家古蹟嚟!佢哋分別係前最高法院大樓以及市政大樓~恰巧兩座建築物一同喺1992年嘅情人節被列為古蹟,所以難怪有報紙喺介紹國家美術館嘅時候,戲稱兩座建築物「有情人終成眷屬」~

新加坡國家美術館-市政大廈一則
新加坡國家美術館-市政大廈一則

相鄰大半個世紀嘅前最高法院大樓以及市政大樓,由新興建嘅玻璃頂蓋以及天橋連接起嚟。另外亦都新開闢咗個地庫,設立售票處以及展覽廳等。無論大家係即場買飛,或者上網買飛,都要嚟到售票處呢度攞飛,因為除咗入場券之外,呢度係靠貼紙嚟辨別入場人士嘅。

點解係用貼紙呢?皆因呢度嘅公共空間係唔需要買飛㗎~如果你唔係諗住入展覽廳欣賞藝術品,只係想參觀下古蹟嘅話,可以隨便行~我參觀嘅時候都見到有唔少當地市民喺裡面歇息,亦都有學生嚟影畢業相~不過當然一切都要守規矩,靜靜咁進行啦~

新加坡國家美術館-舊最高法院走廊
新加坡國家美術館-舊最高法院走廊

展覽廳方面,主要有兩個常設展覽,而其他館就會不時轉換唔同嘅主題。上次介紹嘅濱海灣花園空中走道就由新加坡嘅華僑銀行贊助,而美術館呢度就由另外兩間當地大行-星展銀行以及大華銀行贊助。前者贊助新加坡藝廊,而後者就贊助東南亞藝廊。兩邊都各有油畫、雕塑、裝置藝術等,一樣咁精彩㗎。

大家除咗室內空間之外,記得唔好錯過美術館頂層平台吖~美術館前面係大草地,所以景色可以話冇遮冇擋,可以飽覽濱海灣周邊嘅景色!呢度附近仲有魚尾獅、新加坡國家博物館等嘅地標,一場嚟到附近可以順便去埋~

美術館嘅工作人員都好熱情,如果大家對藝術特別有興趣嘅話,可以同佢哋傾多兩句交流下,佢哋好詳細咁介紹各種展品㗎~話唔定同佢哋傾完偈之後,你會有另外一番理解~

如果你有任何關於旅遊嘅問題,歡迎您Inbox或者留言問,我會盡量幫助您解決疑難!

新加坡國家美術館官網:www.nationalgallery.sg
開放時間:
星期六 至 星期四:10:00 至 19:00 (最後入場時間: 18:30)
星期五:10:00 至 21:00 (最後入場時間: 20:30)

地址:1 St. Andrew’s Rd, Singapore
交通:乘搭新加坡地鐵 MRT 東西線南北線前往政府大廈站 (City Hall, EW13/NS25),經B出口出站後沿有蓋行人路步行約5分鐘即達。

0 個留言於 “[新加坡] 新加坡國家美術館 National Gallery Singapore

發表回覆

你的電郵地址並不會被公開。 必要欄位標記為 *