目的地介紹

[泰國曼谷] CentralWorld 美食推介 - Nara 泰國菜餐廳

去得曼谷當然唔可以錯過各樣美食啦~之前就介紹過船麵檔同中菜廳,今次為大家介紹下泰國菜餐廳!Nara係一間幾熱門食泰國菜嘅餐廳,無論係事前上網做功課,亦或去到餐廳現場都同樣睇得出佢哋嘅人氣㗎!事關除咗有唔少Blogger介紹之外,去到仲見到有唔少當地人排隊等位添~

「Nara」一詞喺梵語裡面嘅意思,係指泰國嘅女性。餐廳之所以會揀呢個名,就正正因為餐廳係由一班泰國女士夾份開嘅,仲要咁啱其中一位創辦人嘅名入邊有「Nara」呢個字~Nara已經進駐咗唔少曼谷嘅商場,Central Embassy、EmQuartier同埋Siam Paragon等都會見到佢嘅蹤影㗎,行街Shopping完之後應該總有一間方便就腳!

CentralWorld分店位於7樓,同層仲有好多其他餐廳,就算係食泰國菜嘅都有好幾間,Nara嘅位置都好當眼,所以一啲都唔難搵。餐廳分內外兩部份,但係兩部份都係喺商場裏面,而唔係出咗室外露天,一樣可以嘆冷氣,所以我覺得坐裡面同外面分別應該唔大~至於餐牌方面有相有英文,圖文並茂,相信大家唔使攞中文餐牌都無問題。

唔計飲品一共叫咗7樣餸,當中包括有小食拼盤、白魚蛋、炸鱸魚同炒通菜等等。涵蓋嘅範圍都算叫做齊晒咁多個類別。其實佢仲有好多名菜我未試㗎,例如佢哋嘅冬蔭功同咖喱蟹都幾出名嘅,不過叫咗咁多唯有下次先再試。總括嚟講,呢度的確樣樣都好出色,而且味道啱啱好,唔會話太濃烈,所以都好適合一家大細嚟食。另外,雖然Menu頭兩版嘅精選推介好正,不過後面有唔少非推介嘅菜式都好值得大家試㗎,好似白魚蛋咁,所以一定要揭多兩頁睇下~

提一提大家,喺泰國唔少餐廳即使飲水亦都要另外收費㗎,所以有時直接叫嘢飲仲好~你哋又有無食過Nara呢?有嘅話歡迎大家留言分享下你嘅心水推介㗎~

如果你有任何關於旅遊嘅問題,歡迎您Inbox或者留言問,我會盡量幫助您解決疑難!

Nara 餐飲集團官網:www.naracuisine.com
CentralWorld 分店電話:+66-2-613-1658
CentralWorld 分店營業時間:10:00 至 22:00 (截單時間:21:30)

Nara CentralWorld 分店地址:7/F, Beacon Zone, CentralWorld, Pathumwan, Pathumwan, Bangkok 10330
交通:乘搭BTS 素坤逸線 (Sukhumvit Line) 前往Chit Lom站 (E1),出站後沿6號出口的Skywalk天橋前行約400米即達。

0 個留言於 “[泰國曼谷] CentralWorld 美食推介 - Nara 泰國菜餐廳

發表回覆

你的電郵地址並不會被公開。 必要欄位標記為 *