[韓國首爾] 梨花洞壁畫村 이화 벽화마을

之前連續三個星期介紹咗唔同嘅首爾美食，今日又轉下口味，同大家講講首爾梨花洞嘅壁畫村～韓國嘅壁畫村一直都幾出名，除咗首爾之外，仁川、釜山同水原等地都有壁畫村㗎～梨花洞嘅壁畫村交通都算方便，可以串連附近其他地方，例如東大門等做一日嘅行程！

講起呢個壁畫村嘅誕生，就要回帶返到去2006年。2006年嘅時候，韓國政府推出「駱山梨花洞公共藝術計劃」，透過壁畫以及裝置藝術活化呢一帶嘅社區。70名藝術家用咗大概半年時間為梨花洞嘅街道、建築物、樓梯、地下道等添上顏色，之後亦都不時有新嘅創作加入，所以每次嚟呢度睇到嘅作品都可能會唔一樣。

隨住遊客人數增加，唔少問題亦都接踵而來，最明顯就係多咗遊客出入，同埋唔多唔少會熱鬧咗嘈咗。居民雖然唔會直接同遊客衝突，但就會選擇抹走壁畫表達不滿。雖然咁樣做犯法，但新聞不下一次報導呢啲消息，可見居民嘅怨氣都幾大。嗰度始終都係一個住宅區，大家去到嘅時候就記得收細聲浪，做個好遊客啦～

其中一幅最出名嘅，相信就係呢對天使翼啦～幾乎每個人嚟到呢度都會影！不過呢幅天使翼同當年上電視嗰幅已經唔同咗，呢一幅係2013年重畫嘅，而原先嗰幅就已經唔存在啦。壁畫村裡面其實仲有好多唔同嘅壁畫值得大家睇，四圍行下慢慢探索都係一個幾好嘅選擇嚟，唔需要特登計劃點樣行～

大家又有無去過梨花洞壁畫村呢？有嘅話歡迎你喺留言度同大家分享下你喺嗰度嘅所見所聞㗎～正如我剛才咁講，每次去睇嘅壁畫都唔同，話唔定你睇過嘅同我睇過嘅並唔一樣。除此之外，若果你有任何關於旅遊或者行程上嘅問題，請隨便留言或者Inbox問，我會盡力解答㗎～

地址：서울특별시 종로구 이화동 (首爾特別市鐘路區梨花洞)
交通：乘搭首爾地鐵4號線前往惠化站 (420)，經2號出口出站後步行約15分鐘左右。