目的地介紹

[日本福岡] 2018年精選新酒店巡禮

近排睇過一單新聞,講到福岡酒店房數量不足,令到入住率長期高企,係全日本最難搵酒店住嘅城市之一。不過嚟緊幾年將會迎接福岡歷來最大規模嘅酒店開業潮!
今次為大家介紹7間福岡2018年新開嘅酒店,佢哋都係日本嘅本土牌子,而且價錢實惠,住耐啲玩耐少少都唔肉赤~另外仲會介紹1間翻新完嘅酒店~
酒店主要分佈喺博多站以及中洲附近,搵食同掃貨都非常方便,即刻睇睇有咩酒店開張啦!

更新:[日本福岡] 2019年精選新酒店巡禮

2018年2月9日開業
福岡西中洲大和ROYNET 酒店 Daiwa Roynet Hotel Fukuoka Nishinakasu

大和系喺福岡嘅第二間酒店選址西中洲,比祗園嘅嗰一間近天神多啲,距離運河城亦都係步行距離,適合鍾意購物朋友!唔想拖住行李由地鐵站行一段距離去酒店嘅話,可以考慮喺博多站搭巴士過嚟都OK㗎~
周邊環境幾旺場,尤其係有唔少出名嘅餐廳喺附近,例如之前曾經介紹過嘅牛腸鍋,或者係蟹通等都係同一條街,再行過啲就到中洲屋台嘅橫町啦。
基本房連稅後每晚先五百幾蚊,再加上大集團品牌,呢個價錢相當實惠~最細嘅雙人房大約161呎,雙床房就大約226呎。

這個slideshow需要JavaScript。

地址:福岡縣福岡市中央區西中洲1-9
鄰近車站:福岡地下鐵空港線-天神站 或 福岡地下鐵七隈線-天神南站
電話:+81 092-409-3155
立即訂房:www.agoda.com / 酒店官網
參考價錢:每晚約港幣538元

2018年3月28日開業
博多S-Peria 酒店 S-Peria Hotel Hakata

博多S-Peria 酒店位於博多站博多口一側,由博多口行過酒店只係短短五分鐘左右路程咋,而且大部份路段都可以行地下隧道~另一間介紹嘅博多站NEST酒店就係佢嘅鄰居,兩者都好近博多站,買嘢食嘢都大把選擇!
房間採用乾濕分離嘅設計,去廁所同沖涼嘅地方係分開嘅,不過洗手盆就設係書枱旁邊,可能無咁方便。另外每間房都配備Handy電話,可以用嚟免費上網同打電話㗎~
最細嘅雙人房大約161呎,雙床房就大約172呎,前者屬一般商務酒店嘅大細,而後者就相對上比較細。

這個slideshow需要JavaScript。

地址:福岡縣福岡市博多區博多駅前2-11‐4
鄰近車站:JR、福岡地下鐵空港線-博多站
電話: +81 092-412-7272
立即訂房:www.agoda.com / 酒店官網
參考價錢:每晚約港幣517元

2018年4月1日開業
博多站NEST酒店 Nest Hotel Hakata Station

喺剛才介紹嘅博多S-Peria酒店旁邊嘅,仲有差唔多時間開業嘅博多站NEST酒店~位於博多站附近去邊都好方便,要四圍去其他縣玩早去晚歸都OK~
NEST係「巢」嘅意思,所以酒店設計融合唔少木嘅元素。佢哋所採用嘅暖色系亦都相當受歡迎,網上唔少評價都稱讚酒店嘅設計㗎!另外酒店每間房有獨立冷氣機,冷暖氣自己調較,唔怕太熱太凍~
酒店設有三人房,三張單人床適合朋友一齊去旅行~至於最細嘅經濟雙人房就偏細,得129呎大,雙床房則有約194呎~雖然經濟雙人房較細,但每晚價錢亦都更平,最平457蚊就可以住一晚啦。

這個slideshow需要JavaScript。

地址:福岡縣福岡市博多區博多駅前2-11-27
鄰近車站:JR、福岡地下鐵空港線-博多站
電話:+81 092-260-1695
立即訂房:www.agoda.com / 酒店官網
參考價錢:每晚約港幣457元

2018年4月1日裝修完畢
西鐵Inn福岡 Nishitetsu Inn Fukuoka

西鐵Inn福岡近期啱啱裝修完,所以都為大家介紹下~佢位處於兩個地鐵站之間,無論行去中洲川端站抑或天神站都只係5分鐘內嘅路程。咁就無論去食嘢抑或買嘢都同樣咁方便啦!
除咗幫原有嘅房裝修同加入空氣清新機之外,佢哋亦都加入咗兩款新房型。新房型分別係,有6間嘅頂級雙人房,同埋12間嘅頂級雙床房。想試新嘢嘅話就記得揀呢兩種房~
新嘅頂級雙人房有183呎大,每晚大約790蚊左右,而頂級雙床房就去到258呎大,每晚都只係826蚊左右咋!朋友去旅行要分床瞓嘅話,呢個就好適合啦!

這個slideshow需要JavaScript。

地址:福岡縣福岡市中央區天神1-16-1
鄰近車站:福岡地下鐵空港線-中洲川端站 及 天神站
電話:+81 092-712-5858
立即訂房:www.agoda.com / 酒店官網
參考價錢:每晚約港幣790元 (頂級雙人房)

2018年6月26日開業
東急Stay博多 Tokyu Stay Hakata

東急嘅酒店相信唔少朋友都住過,不過除咗東急酒店嘅三個品牌,另外仲有一個系列-東急Stay,同樣值得大家留意㗎~今次喺博多新開嘅呢間東急Stay係佢哋喺九州地區嘅第一間酒店~
酒店離博多站筑紫口大約10分鐘路程,唔算太遠。而房內設施就比較似服務式住宅,有齊洗衣機同微波爐等電器,要洗衫或者整宵夜食都無問題~有啲房甚至有電磁爐添!
最細嘅雙人房有194呎大,而雙床房就有大約258呎,係眾多酒店之中比較闊落嘅一間。價錢亦都幾親民,700蚊有找住一晚~

這個slideshow需要JavaScript。

地址:福岡縣福岡市博多區博多駅南1-11-11
鄰近車站:JR、福岡地下鐵空港線-博多站
電話:+81 092-431-1091
立即訂房:www.agoda.com / 酒店官網
參考價錢:每晚約港幣677元

2018年7月1日開業
福岡中洲WBF 酒店 Hotel WBF Fukuoka Nakasu

WBF酒店近年積極咁擴張版圖,喺福岡亦都唔例外,繼天神南嘅一間之後,今次喺中洲再開一間。酒店離中洲川端站大約3分鐘路程,附近亦有唔少美食,包括之前介紹過嘅鰻魚飯以及Bills!除咗呢間中洲WBF之外,佢哋亦有喺博多站附近新開多一間嘅WBF,大家亦都可以睇睇~
酒店全日都提供免費飲品,行完一日街都可以嘆杯茶先返房~另外每間房都有Handy電話一部,打長途電話同上網都好方便㗎~
雙人房最細就只有129呎,雙床房就151呎,而價錢亦都非常平,大約四百幾蚊就可以住一晚啦!

這個slideshow需要JavaScript。

地址:福岡縣福岡市博多區中洲3-6-19
鄰近車站:福岡地下鐵空港線-中洲川端站
電話:+81 092-291-4193
立即訂房:www.agoda.com / 酒店官網
參考價錢:每晚約港幣464元

2018年8月27日開業
博多站前靜鐵Prezio酒店 Shizutetsu Hotel Prezio Hakata-Ekimae

你無睇錯,我亦都無打錯字,呢個靜鐵係靜岡鐵路嚟~靜岡鐵路旗下嘅酒店業務第一次衝出靜岡縣,嚟到福岡博多呢邊開酒店~選址位於博多站博多口一側,行大概6分鐘左右就到酒店。
房間分類非常簡單,只有雙人房同雙床房兩種房型,無再分唔同級別。由於酒店位於火車軌旁邊,所以部份房特別設有隔音嘅雙層玻璃窗,大家應該可以放心唔怕火車噪音!
雙人房最細大約161呎,而雙床房就有237呎,兩者都偏大些少,而且價錢亦都幾優惠,每晚都唔使600蚊~

這個slideshow需要JavaScript。

地址:福岡縣福岡市博多區博多駅前4-17-6
鄰近車站:JR、福岡地下鐵空港線-博多站
電話:+81 092-451-2800
立即訂房:www.agoda.com / 酒店官網
參考價錢:每晚約港幣568元

2018年9月19日開業
博多站博多口UNIZO 酒店 HOTEL UNIZO Hakataeki Hakataguchi

同樣地,UNIZO近期亦都動作多多,上次介紹大阪新酒店嘅時候都有佢嘅蹤影,今次博多亦都唔例外,落戶博多站附近,步行就大約10分鐘左右嘅路程。
酒店設有女士樓層,如果你係獨遊福岡嘅話就非常適合啦~女士樓層仲特別設有Ladies Lounge,唔使特登俾錢就有個空間Hea吓!
雙人房有151呎大,而雙床房就有194呎大,比起另外幾間酒店都唔算細。截稿呢刻較少見到有優惠,平均價錢比較貴,大約九百幾蚊一晚。

這個slideshow需要JavaScript。

地址:福岡縣福岡市博多區博多駅前3-6-7
最鄰近車站:JR、福岡地下鐵空港線-博多站
電話:+81 092-433-6172
立即訂房:www.agoda.com / 酒店官網
參考價錢:每晚約港幣934元

嚟緊我哋仲會繼續為大家介紹世界各地唔同嘅新酒店,大家記得千祈唔好錯過啦!

0 個留言於 “[日本福岡] 2018年精選新酒店巡禮

發表回覆

你的電郵地址並不會被公開。 必要欄位標記為 *