目的地介紹

[日本福岡] 水都柳川美食推介 元祖本吉屋鰻魚飯

上星期同大家介紹咗柳川呢個水都,大家又有無被佢吸引到呢?一場嚟到柳川,當然唔可以錯過柳川嘅美食啦!呢度嘅鰻魚飯非常出名,而且出名嘅鰻魚飯店仲唔止一間添~今次為大家介紹其中一間老字號-元祖本吉屋!佢有唔止一間分店,所以大家可以就住自己嘅行程嚟揀去邊間,方便自己~

重溫遊記:[日本福岡] 西鐵沿線一日遊 水都柳川遊記

元祖本吉屋歷史可以追溯到去天和元年,亦即係1681年,時至今日已經超過300年歷史㗎啦!柳川一共有兩間舖,分別係本店以及我今次去嘅沖端店。本店離西鐵柳川站比較近,而沖端點就離落船嘅地方近啲,視乎你嘅行程,相信總有一間方便你去嘅~佢哋另外仲喺天神都有分店,不過就未必有柳川呢度咁有風味啦~

點解我話無咁有風味呢?因為沖端店喺正河邊,靠窗嘅位可以好好咁欣賞河邊景色,睇住小船喺出面駛過~舖頭比較細小,喺外面睇就好似一間普通嘅屋仔。入到裡面亦只係有大概十張檯左右,慶幸到訪嘅時候唔算特別旺場,所以可以直接坐底開餐。遇著多人嘅話,話唔定要等返咁上下耐先有位坐。店舖裝修都幾傳統,而且地下仲係鋪榻榻米嘅,所以要除鞋入座~

蒸籠鰻魚飯同平日常見嘅鰻魚飯頗為唔一樣。一般嘅鰻魚飯都係先蒸後燒,而蒸籠鰻魚飯就會先燒後蒸,等啲飯可以喺蒸嘅過程吸收鰻魚嘅精華,同啲鰻魚一樣咁香咁美味!蒸籠鰻魚飯亦會配有鰻魚肝湯同埋漬物~雖然唔夠蒸籠鰻魚飯咁出名,但係蒲燒鰻魚亦都好好食~叫定食嘅話會比頭先講嘅湯同漬物,再多一碟醡物。醡物係燒鰻魚淋上些少醋汁,非常開胃,用回味無窮嚟形容都唔過份~

呢度嘅鰻魚飯,同先前介紹過嘅名代吉塚うなぎ屋比又係另一番風味,我唔會話試咗邊一款就唔使試另外嗰款,因為兩者都非常優秀!有時間去柳川同太宰府一日遊嘅話,就記得留時間喺柳川嘆返個鰻魚飯啦~如果你有任何關於旅遊嘅問題,歡迎您Inbox我哋或者留言問㗎~

元祖本吉屋官網:motoyoshiya.jp
沖端店營業時間:10:30 至 17:00 (截單時間:16:30,逢星期一休息)

沖端店地址:福岡県柳川市沖端町12
交通:從西鐵福岡(天神)站乘搭天神大牟田線特急列車前往西鐵柳川站,約需時50分鐘。前往元祖本吉屋沖端店需步行約40分鐘,離遊船落船處則約5分鐘左右。

0 個留言於 “[日本福岡] 水都柳川美食推介 元祖本吉屋鰻魚飯

發表回覆

你的電郵地址並不會被公開。 必要欄位標記為 *