目的地介紹

[韓國首爾] 美食推介 - 風川鰻魚 풍천장어

嚟到七月最後一個星期,繼續介紹下首爾有咩好食~之前兩個星期分別同大家分享過燒肉以及西餐廳,唔知道大家鍾唔鍾意呢?今日為大家介紹樣又有營養又好食嘅正嘢,佢就係鰻魚啦!就算專程去搵食都值㗎,何況佢仲要同燒肉舖一樣只係喺弘大附近?

韓國同日本一樣,都相當鍾意食鰻魚㗎~鰻魚有豐富嘅營養,亦都有好多唔同嘅養生功效!喺韓國,出名嘅燒鰻魚有兩種,分別嚟自風川同埋坡州,而今次介紹嘅呢間燒鰻魚店就顧名思義係賣風川嘅鰻魚啦~京畿道嘅風川係一個海水同江水交匯嘅地方,所以出產嘅鰻魚特別美味!燒鰻魚主要有兩種口味,分別係醬燒同鹽燒,前者一般比較辣,而後者食落就更加鮮味,各有捧場客~

喺風川鰻魚,當你嗌咗嘢食之後,佢哋就會即刻喺門口嗰魚缸度撈上嚟準備。另外亦都會上一系列嘅配菜同埋醬汁,泡菜、洋蔥、薑絲、芝麻葉等等都有~仲有大醬湯同埋成籃菜添~基本上所有嘢都好齊備,完全唔需要擔心!記得要影配菜嘅時候已經用咗啲,原先唔止咁少嘅~

呢度係按人數嗌嘢食嘅,最少要叫2條鰻魚,之後就可以逐條叫,唔一定要係雙數咁上,就算三五成群去食都OK。燒鰻魚並唔需要自己燒,阿姐上鰻魚嘅時候會幫大家燒,剪成適合食嘅大細,而且燒到金黃色之後會晾喺側邊等您慢慢食。你唯一要做嘅嘢兩件事,就係包菜同埋食啦!每個人鍾意嘅食法都唔同,雖然蘸汁都好食,不過我會更加鍾意原汁原味啦~一條鰻魚28000韓圜,兩條就56000韓圜,埋單兩個人食就平均每人200蚊港紙左右,以鰻魚嚟講並唔算貴!

今個七月連續五個星期為大家介紹咗我最近韓國之旅嘅所見所聞,希望大家鍾意我嘅推介~下星期就踏入八月份,到時再同大家講過第二樣嘢!一如既往,如果你有任何關於旅遊嘅問題,歡迎您Inbox我或者留言問,我會盡我全力解答你嘅疑難㗎~

營業時間:每日 11:00 至 15:00 及 16:00 至 23:30
電話號碼:+82 2-332-8361

地址:서울특별시 마포구 연남동 568-25 (首爾特別市麻浦區延南洞568-25)
交通:乘搭首爾地鐵2號線前往弘大入口站 (239),經2號出口出站,步行約10分鐘即達。

0 個留言於 “[韓國首爾] 美食推介 - 風川鰻魚 풍천장어

發佈留言

發佈留言必須填寫的電子郵件地址不會公開。 必填欄位標示為 *