目的地介紹

[韓國坡州] 普羅旺斯村 Provence Town 프로방스 마을

上星期為大家介紹過COMMON GROUND,的而且確係一個影相嘅好地方。今日為大家介紹另一個影相嘅好去處,就係位於坡州嘅普羅旺斯村啦!講起坡州,大家可能第一樣諗到嘅係坡州Outlet,不過除咗Outlet之外,普羅旺斯村同埋幾出名嘅Heyri藝術村都係喺坡州㗎!

普羅旺斯村喺1996年嘅時候就已經建立,屈指一算到依家已經有二十幾年歷史。由起初嘅法國餐廳,到現時開咗三十幾間商店,橫跨飲食、時裝、文化及生活雜貨等範疇~雖然坡州離首爾有一段距離,不過喺普羅旺斯村附近仲有剛才提到嘅Heyri藝術村同埋坡州英文村,一次過去埋嘅話,時間就化算得多啦!另外仲可以搭巴士去埋Outlet,只係5個站距離左右。

「普羅旺斯」係法國南部一個地區嘅名,所以呢度嘅建築風格理所當然地同韓國唔同,每間小屋都七彩繽紛,有啲仲好大膽咁用上粉紅色添。法國嘅普羅旺斯出名色彩繽紛嘅花海,所以呢度無論係戶外嘅休憩區,抑或係商店室內都有好多好靚嘅花草等緊大家欣賞同影相!

普羅旺斯村裡面有各式各樣嘅餐廳同咖啡店,喺呢度推薦大家去到村內較入嘅Verrocchio Coffee嘆返杯咖啡~咖啡店闊落坐得舒服之餘,亦因為佢略高於村內其他建築,所以可以喺落地大玻璃窗嗰度一覽整個普羅旺斯村嘅景色㗎~行到有啲攰嘅話就嚟呢度抖抖涼,嘆返杯咖啡先繼續行程啦!

介紹完普羅旺斯村之後,你又有無興趣去返個坡州一日遊呢?去過嘅朋友不妨喺下低留言同大家分享下你遊歷嘅時候所影嘅靚相㗎!除此之外,若果你有任何關於旅遊或者行程上嘅問題,請隨便留言或者Inbox問,我會盡力解答㗎~

普羅旺斯村官網 (韓文):provence.town
地址:경기도 파주시 탄현면 새오리로 69 (京畿道坡州市炭縣面新鴨路69號)
交通:乘搭首爾地鐵2號線6號線前往合井站 (238/622),經1號出口出站,於巴士站轉乘2200號巴士,城東里交界 (성동리사거리) 站落車後步行約15至20分鐘即達。

0 個留言於 “[韓國坡州] 普羅旺斯村 Provence Town 프로방스 마을

發佈留言

發佈留言必須填寫的電子郵件地址不會公開。 必填欄位標示為 *