旅遊新聞

[酒店消息] 8月開始 萬豪合併後全新獎勵計劃 全新兌換表格

若果大家有留意開旅遊新聞嘅話,萬豪 (Marriott) 、喜達屋 (Starwood) 以及Ritz-Carlton早就已經一家親,不過旗下嘅獎勵計劃就仲未合為一體。嚟緊八月就會正式三合一成為一個統一嘅獎勵計劃,想知道到底新嘅兌換表格係點樣?依家即刻同你拆解~

圖片來源:萬豪酒店官網

酒店級別

未合併之前,萬豪會將旗下酒店分為9級,喜達屋嘅SPG就將酒店分成7個級別,Ritz-Carlton 就分成最少嘅5個級別。三個計劃都係以第一級為最低級,及後逐層遞增。
合併後嘅獎勵計劃會統一將酒店分成八個級別,令到有部份酒店會比起以前嘅級別有所升跌,連帶佢哋每晚免費住宿所需嘅分數都跟住升跌!倘若你有興趣嘅酒店嚟緊會加價,就要快快手手趁新兌換表格未實施前換咗先啦!
第8級,亦即係最高嘅酒店級別,會延至2019年先開始實施,喺8月到12月呢段過渡期會當成第7級計算,所以如果你心儀換第8級酒店嘅獎勵住宿就記得把握機會啦!

淡季旺季

同樣會喺過渡期後實施嘅,仲有淡旺季兌換表格。除咗SPG之外,另外兩個獎勵計劃都係全年均一價,無話淡季平啲,旺季貴啲咁。
2019年起嘅成個獎勵表格都會根據酒店嘅淡旺季而有唔同嘅分數要求,喺淡季換房就俾少啲分,喺旺季換房就要俾多啲分。旅遊旺季先去玩嘅朋友,應該會覺得好肉痛!如果遇著酒店級別上升嘅話,簡直係雪上加霜。

想知道你心水嘅酒店加價定減價就快啲撳呢度去萬豪網站睇睇啦!下邊就同大家睇睇部分國家同酒店嘅級別以及分數上嘅變動~

升跌焦點
日本

東京喜來登都酒店 Sheraton Miyako Hotel Tokyo

呢間係其中一間升幅強勁嘅酒店,原屬SPG第5級,每晚免費住宿需要12000 至 16000 Starpoints。根據每1 Starpoints 兌換 3 Marriott Reward Points,即係每晚需要36000 至 48000分。
新表格將佢分為第6級,每晚需要50000分先換到,即係話八月起加價成14000分!以分數計係全日本升幅第3高,僅次於東京同京都兩間Ritz-Carlton嘅升幅,分別各加15000分。

南韓

首爾南大門萬怡酒店 Courtyard by Marriott Seoul Namdaemun

錄得減幅嘅酒店比較多,上升嘅酒店比較多屬Design Hotels系列,而且加幅比其他地區都尚算溫和。萬怡系列 (Courtyard) 就全線減至17500分一晚,令到原先較貴嘅南大門萬怡酒店減幅冠絕全韓國,如果你咁啱係諗住換佢嘅話就不妨等等先啦!

台灣

臺北中和福朋喜來登酒店 Four Points By Sheraton Taipei, Zhonghe

台灣嘅酒店喺轉換後所需嘅分數幾乎一致下跌,唯獨上面呢間。呢間Four Points 不跌反升,原先需要9000 至 12000 Marriott Reward Points (3000 至 4000 Starpoints),新兌換表格就要17500分一晚,以百分比嚟計都唔少。
其餘台灣酒店就齊齊減價,由減1000分到減成10000分都有,唔趕換免費房嘅話就可以稍等一陣啦!

泰國

泰國升跌比較混亂,每個城市每個牌子都有變動,呢個大家要查清楚每間酒店嘅級別,整體嚟講係跌嘅比較多。表格內有個亮點,就係預計年尾開業嘅The Bangkok EDITION 榜上有名啦!暫定屬新表格內嘅第5級,同曼谷St. Regis以及Terminal 21對面嘅喜來登同級,換言之估計價位接近2000蚊一晚。

新加坡

新加坡南岸JW萬豪酒店 JW Marriott Hotel Singapore South Beach

新加坡啲酒店級別相對上集中喺第4級至第6級,除咗瑞吉 (St. Regis)獨自喺第7級之外。而比較有趣嘅係升跌似乎同個品牌有關係,因為大部份原屬SPG嘅酒店都減價,而萬豪自己嘅品牌就加價。倘若你係諗住住Singapore Marriott Tang Plaza Hotel,或者JW Marriott Hotel Singapore South Beach,就要將啲分兌換過去萬豪嘅計劃嗰邊,把握機會換咗先啦!可以慳到每晚10000分咁多!

同場加映:全球升幅第一名

全世界加得最犀利嘅就係呢間位於希臘嘅臨海度假村,本身已經喺萬豪裡面屬第9級嘅酒店,要45000分先換到。去到合併後嘅計劃亦都繼續係頂級嘅第8級,但分數要求就飆升近一倍去到85000分一晚!就算喺過渡期嘅時候當第7級計,亦都要60000分一晚,升幅一啲都唔惹少。

同場加映:全球跌幅第一名

 峇里島水明漾W 酒店 W Bali – Seminyak

全球跌得最犀利嘅有3間酒店,分別有兩間喺美國,一間喺印尼。佢哋所需嘅分數由每晚90000分減三分一去到每晚60000分咋!有計劃住呢3間嘅話就千祈唔好咁傻豬用依家嘅兌換表格換佢哋啦,蝕咗嘅分數隨時夠你住多幾晚其他酒店!
除咗圖中嘅峇里島W酒店,仲有Las Alcobas, a Luxury Collection Hotel, Napa Valley 同埋The St. Regis San Francisco!

0 個留言於 “[酒店消息] 8月開始 萬豪合併後全新獎勵計劃 全新兌換表格

發表回覆

你的電郵地址並不會被公開。 必要欄位標記為 *