目的地介紹

[新加坡] 福康寧公園 Fort Canning Park

上星期為大家介紹過新加坡植物園,今個星期為大家介紹另一個城市中嘅綠洲~比起新加坡植物園,福康寧公園 (Fort Canning Park) 嘅位置可以話喺正市中心,毗鄰烏節路 (Orchard Road) 同克拉碼頭 (Clarke Quay),仲要有至少3個地鐵站圍住,要上嚟呢度睇睇新加坡嘅歷史同感受藝術氣息一啲都唔難!

相傳福康寧公園所在嘅福康寧山 (Fort Canning Hill),自14世紀就已經係新加坡政經中心,地位崇高。到殖民地時代就先後興建總督府、炮台以及軍營等等嘅設施,成為新加坡當時其中一個重要嘅軍事據點。點解要起喺福康寧山而唔係第二度呢?前者因為福康寧山喺正昔日,以至係今日嘅市中心。而後者就因為新加坡地理位置靠海,而呢座山離當時嘅海邊唔遠,所以極具戰略價值。到後來周邊不斷發展,福康寧山就被改劃成公園,亦即係今日要介紹嘅福康寧公園啦!

喺福康寧公園內,唔少建築物已經被賦予新嘅任務,例如公園內嘅福康寧酒店 (Hotel Fort Canning),就係由殖民地時代興建嘅建築改建而成㗎~至於昔日地下室,現時就用作博物館,介紹新加坡戰爭歷史,需要收費參加導賞團入場。至於另一座昔日嘅軍營建築 Fort Canning Centre,稍早前曾經被用作藝術館,現時就正進行翻新工程。另外仲有唔少設施都仲有保留,大家可以四圍睇四圍影。

即使你唔係特別熱愛歷史建築,嚟呢度嘅步行徑行下都令人心曠神怡㗎~步行徑環繞整座福康寧山,沿住嚟行亦都能夠輕鬆上到山頂。大家可以喺福康寧公園嘅網站睇睇唔同嘅建議路線,預先計劃定步行路線,亦都能夠知道更多關於唔同植物嘅資料㗎~尤其係同小朋友去嘅話,可以順便學下嘢添!

福康寧公園預計喺出年2019年開始大型工程,復修更多部份俾公眾參觀~希望大家都對福康寧公園有興趣,嚟新加坡嘅時候可以順便嚟睇睇!如果你曾經去過福康寧公園,不妨留言同大家分享下你嘅體驗㗎~大家如果有任何關於旅遊、行程等等嘅問題,亦都歡迎您留言或者Inbox問㗎~

福康寧公園官網官網 (英文):www.nparks.gov.sg
開放時間:24小時開放

地址:River Valley Rd, Singapore
交通:
乘搭新加坡地鐵 MRT 濱海市區線 (Downtown Line) 前往福康寧站 (Fort Canning – DT20),經B出口到地面後即達入口。

亦可乘搭新加坡地鐵 MRT 南北線 (North South Line)、東北線 (North East Line)、環線 (Circle Line) 前往多美歌站 (Dhoby Ghaut – NS24/NE6/CC1),經B出口到地面後橫過Penang Road後向左轉再前行,透過地下隧道穿入公園。

另外可利用新加坡地鐵 MRT 東北線 (North East Line) 前往克拉碼頭站 (Clarke Quay – NE5),經E出口到地面後向左轉及過河,再左轉,經Xtreme Swing旁天橋即可抵達公園。​

0 個留言於 “[新加坡] 福康寧公園 Fort Canning Park

發表回覆

你的電郵地址並不會被公開。 必要欄位標記為 *