目的地介紹

[日本福岡] 博多站美食推介 水炊き博多華味鳥

除咗上星期介紹嘅もつ鍋 (內臟鍋) 之外,福岡仲有另外一款鍋物都係相當出名㗎~佢就係水炊き-水炊雞肉火鍋啦!今次為大家介紹水炊き博多華味鳥位於博多站筑紫口一側嘅分店,因為呢間係其中一間有做雞肉火鍋午市嘅分店嚟~午餐時段嘅價錢更加親民,唔駛擔心肉赤!

華味鳥雖然唔係最早賣水炊雞肉火鍋嘅舖頭之一,不過佢哋經過多年嘅發展之後已經成為名牌之一,呢幾年仲開到台北、大連同吉隆坡添!華味鳥嘅創辦人透過飼養雞隻起家,後來先開辦華味鳥呢個品牌,亦因為係呢個原因,餐廳用嘅雞隻都係由佢哋自家位於九州嘅農場所出產㗎~雞肉火鍋既然係以雞作為主要材料,雞隻嘅質素自然就係關鍵,所以華味鳥憑著之前多年養雞嘅經驗先能夠咁成功。

午餐餐牌豐儉由人,由最平唔過1000円,去到4千幾円不等都有。不過最平嘅定食就唔係雞肉火鍋,只係炸雞同親子丼等嘅雞肉料理。雞肉火鍋嘅定食雖然貴啲,但亦都多款式啲㗎~兩款雞肉火鍋定食嘅分別主要在於炸物,平啲嘅一款只有炸雞,而貴啲嘅一款就會變成天婦羅盛合~至於揀邊款好,就真係隨你鍾意,無話邊款一定好過另外嗰款。

火鍋定食上之前會先有三小碟前菜,每期都會輪替。接住就會有越來越多雞肉,再嚟有煙燻雞肉同炭烤雞肉。成套定食仲有剛才提過嘅天婦羅、雞肉刺身、醃菜、白飯。另外仲有一杯清雞湯俾你飲~火鍋裡頭唔止有雞肉同雜菜等嘅常見材料,裡面仲有雞肝㗎!至於炸雞,大家唔好諗住佢只係一般貨色呀,雖然華味鳥嘅專門係雞肉火鍋,但佢嘅炸雞鬆脆多汁,一啲都唔惹少!食完都應該唔會話唔飽㗎啦,而且餐後仲有甜品,成餐飯完美謝幕。

雖然侍應生嘅英文能力有限,但佢哋都好盡力咁解釋正宗嘅雞肉火鍋食法,務求令到我哋明白。正正係因為優秀嘅員工,我相信下次去到福岡都應該會去返同一間分店,再食過雞肉火鍋㗎!唔知道大家又有無食過華味鳥,以至係其他餐廳嘅雞肉火鍋呢?有嘅話不妨留言同大家分享下㗎!如果你有任何關於旅遊嘅問題,亦都歡迎您留言或者Inbox問㗎~

水炊き博多華味鳥 官網 (日文):www.hanamidori.net
營業時間:
午市時段:11:30 至 15:00 (截單時間:14:00)
晚市時段:17:00 至 00:00 (截單時間:22:30)
每年大除夕 (12月31日) 及新年 (1月1日) 休息

博多駅筑紫口店地址:福岡県福岡市博多区博多駅東1-13-31 駅東サンシティビル1F
交通:乘搭JR 或 福岡地鐵空港線前往 博多站 (K11),由筑紫口一側步行約5分鐘即達。​

0 個留言於 “[日本福岡] 博多站美食推介 水炊き博多華味鳥

發表回覆

你的電郵地址並不會被公開。 必要欄位標記為 *