目的地介紹

[韓國首爾] 東大門設計廣場 Dongdaemun Design Plaza DDP

要數首爾地標嘅話,相信東大門設計廣場 DDP 一定榜上有名!開幕後已經旋即成為Instagram 首爾打卡熱點之一,又曾經有多部韓劇取景,人氣程度毋庸置疑~嚟緊星期三就會係DDP開幕4週年紀念啦~一於趁今個星期為大家介紹下呢個地標!

東大門設計廣場原址係東大門運動場,於1925年落成,喺新嘅運動場建成後關閉,繼而喺2008年正式拆卸。東大門設計廣場就隨即展開歷時大約5年嘅建築工程,並且喺2014年3月21號揭幕。DDP除咗係Dongdaemun Design Plaza嘅縮寫,同時代表Dream, Design, Play嘅設計理念。

Zaha Hadid係東大門設計廣場嘅設計師,佢係其中一位世界上最出名嘅設計師。佢喺呢個項目融合咗首爾嘅歷史、文化、都市、社會以及經濟元素喺當中。「歷史」部份透過歷史文化公園展現出嚟。因為DDP喺興建過程中發現地底有唔少古蹟文物,所以設計作出咗修改,於公園展出有關嘅歷史及文物。而「文化」及「經濟」,相信就係由室內嘅文化空間以及設計市集所代表。至於「都市」,應該就係講緊DDP前衛嘅設計啦!

主體建築一共分為三個中心,分別係藝術中心、文化中心以及設計中心。每個中心另外再分為唔同嘅展館,用作舉辦各種活動同展覽。有啲展覽要另外收入場費,需要買飛入場,有興趣嘅話建議大家預先上官網睇定活動詳情。公共空間例如設計小徑同埋屋頂草地,大家都可以盡情享受,盡情影相~

創意市集位於設計中心內,喺呢度開舖嘅,好多都係當地嘅設計師或者品牌嚟㗎~你亦都可以喺度搵到各式各樣嘅紀念品同明信片,買嚟俾朋友都係唔錯嘅選擇!有興趣嘅不妨喺度尋寶,睇下有無嘢啱你心水~除咗創意市集外,DDP有時仲會有夜市添,不過我今次日頭去,未有機會見識。

附近仲有商場同百貨可以行,所以喺DDP附近都可以消磨唔少時間㗎!大家唔趕嘅話不妨可以擺多少許時間喺呢度,唔使行得咁趕可以慢慢嚟~大家如果你有任何關於旅遊嘅問題,亦都歡迎您留言或者Inbox問㗎~

東大門設計廣場官網:www.ddp.or.kr
開放時間:
和諧廣場 及 東大門歷史文化公園:24 小時開放
各中心及展廳:10:00起開放,關門時間及例休各有不同

地址:서울시 중구 을지로 281 (首爾市中區乙支路 281(乙支路7街))
交通:乘搭首爾地鐵2號線4號線5號線前往東大門歷史文化公園站 (205/422/536),經1號出口直達東大門設計廣場。​

0 個留言於 “[韓國首爾] 東大門設計廣場 Dongdaemun Design Plaza DDP

發表回覆

你的電郵地址並不會被公開。 必要欄位標記為 *