目的地介紹

[泰國曼谷] 曼谷大倉新頤酒店 The Okura Prestige Bangkok

曼谷真係好多五星級酒店,喺當中有平有貴,平有平住,貴有貴住。今次去到就選擇咗住宿曼谷大倉新頤酒店。佢嘅定價喺曼谷嚟講唔算親民,比起一部分嘅大牌子都貴一截。今日為大家推介呢間酒店,當然係因為我覺得佢值呢個價錢啦!

曼谷嘅大倉位於Park Venture Ecoplex內,樓下十幾廿層係辦公室,24樓就係酒店大堂同餐廳,25樓係無邊際泳池,而酒店房就位於26樓以上。如果你係過斜對面Central Embassy 嘅話,經正門行樓梯上天橋可能會快些少。倘若你拎住大包細包行李,又或者天氣唔好嘅話,就搭扶手電梯行返直通BTS站嘅天橋啦~

「大倉」相信大家都知道係日本牌子,佢哋喺全球有25間「大倉」品牌嘅酒店,嚟緊幾年會再加多7間添~佢哋每一個項目都秉承住「三最」嘅經營哲學,最佳嘅住宿、最好嘅美食料理同埋最優質嘅服務。大家如果睇睇TripAdvisor曼谷酒店排行榜嘅話,大倉係云云899間酒店裡面排第6,係頭嗰1%嚟㗎!

酒店計埋套房一共有十款房型,最基本嘅豪華房都有43至47平方米(463至506呎)大~景觀方面就無咩大驚喜,雖然附近都有唔少建築物,但係距離都有返咁上下,所以唔使擔心個人私隱。房內比較多間隔,皆因除咗廁所採用乾濕分離(如廁同沖涼分開)設計之外,房內仲設有Walk-in Closet!房內有齊梳化同工作枱,無論你趕著做嘢定只係想Hea下都有啱你嘅位坐~

房內設備同樣齊全㗎~Mini Bar 同咖啡機幾乎係基本,唔多介紹啦。大倉貴為日式酒店又點止係咁多呢?除咗普通茶包同咖啡之外,佢哋仲有日本茶葉同日式茶具!有酒店浴袍之餘仲有日式浴衣!上一段提過有工作枱適合辦公,呢度補充多少少,佢哋櫃桶內有齊LAN線、信封信紙同各式文具,基本嘢一定處理得好~

酒店嘅小細節亦都不容忽略,亦都正正係因為呢啲小細節,更加能夠彰顯大倉優勝嘅地方。五星級酒店一般都會提供開床服務 (Turndown Service),呢度都會,不過佢哋仲會放隻手摺嘅千紙鶴祝你瞓個靚覺~仲未完,佢哋仲好貼心咁有埋教學以及折紙俾你自己摺~另一樣貼心嘅,就係廁所備品有細細樽嘅漱口水,平日邊度有呀~齋刷牙唔夠㗎嘛,尤其係食完濃味嘢之後,有漱口水就好得多啦!

最後講講酒店嘅早餐~你可以選擇去食自助早餐,又或者入「山里」食日式早餐都得。自助早餐每日都會換唔同嘅款式,所以我試咗幾日都無去到食日式早餐…自助早餐範圍雖然唔算特別大,但款式齊備,日式、泰式、西式以至中式都有照顧到~煎蛋炒蛋等等要落單等師傅即煮,同侍應生講就可以㗎啦!呢度放其中幾款蛋俾大家睇睇~

曼谷大倉各方面都做得非常出色,貴過其他同級酒店亦都不為過。若果你想追求一趟享受嘅旅程,相信將會係一個不二之選。有機會再去曼谷嘅話,我都可能要認真考慮下仲係咪要去試其他酒店!大家如果你有任何關於旅遊嘅問題,亦都歡迎您留言或者Inbox問㗎~

曼谷大倉新頤酒店官網:www.okurabangkok.com
電話:+66-2-687-9000

參考價錢:連稅後每晚7900泰銖 (折合約港幣1965元)

地址:57 Wireless Road, Lumpini, Pathumwan, Bangkok 10330
交通:乘搭BTS 素坤逸線 (Sukhumvit Line) 前往Phloen Chit站 (E2),出站後經2號出口直通入Park Ventures Ecoplex大樓內,透過扶手電梯前往地下,經側門即達酒店。酒店大堂位於24樓。​

0 個留言於 “[泰國曼谷] 曼谷大倉新頤酒店 The Okura Prestige Bangkok

發表回覆

你的電郵地址並不會被公開。 必要欄位標記為 *