呢篇係狗年第一篇文章，先同大家拜個年～祝各位出入平安、萬事如意、如意吉祥！希望大家新一年繼續周圍去周圍玩～
今日為大家介紹新年相關嘅景點，就係寺廟啦！太宰府相信係唔少人去福岡必去嘅景點之一，話晒唔係離市區好遠咋嘛～而且參道仲有間靚靚嘅Starbucks分店，不過呢個都唔係重點，最重要嘅一定係太宰府天滿宮！
天滿宮係日本指定嘅國家重要文化財，呢啲重要嘅文化遺產受法律保護，相當珍貴。太宰府天滿宮，同時係日本萬幾座天滿宮嘅總本宮，地位毋庸置疑。呢度本殿所供奉嘅係學問之神－菅原道真，所以前來參拜嘅人唔少都係祈求得到學業同智慧方面嘅保佑。
經參道進入天滿宮範圍後，會先經過心字池。池上有三條橋，兩條拱橋（太鼓橋）分別代表過去同將來，而唯一嘅一條平橋就代表現在。傳說行過呢條橋會洗滌心靈㗎～至於本殿，雖然喺10世紀時創立，但後來經過戰爭等唔同事件而燒毀，所以本殿，以至外面嘅門樓都曾經重建過。
呢度仲有個「梅花傳說」㗎～相傳道真公喜愛梅花，所以當佢去世後，梅花一夜間由京都飛到嚟太宰府呢度落地生根，是為日本第一梅樹，樹齡過千年。後來呢度種植咗唔少梅樹，前前後後夾埋超過200個品種，大約6000棵梅樹！每年2月頭到3月頭都係賞梅嘅好時節，所以而家已經開咗花啦！喺呢度放張相俾大家睇下先～
太宰府作為昔日九州政府所在地，文化歷史固然深遠，除咗太宰府天滿宮外，周邊仲有唔少美食添！大家行參道嘅時候記得唔好錯過啦～如果你有任何關於旅遊嘅問題，亦都歡迎您Inbox我哋或者留言問㗎！
太宰府天滿宮官網：www.dazaifutenmangu.or.jp
開放時間：
開門時間：
春分至秋分前夕：06:00
其餘時間：06:30
關門時間：
1月至3月 及 12月：18:30
4月、5月、9月、10月 及 11月：19:00
6月至8月：19:30
備註：
逢星期五及六會因應九州國立博物館夜間開館而調整開放時間
每年12月31日至1月4日，將有特別開放時間，部分日子24小時開放。
地址：福岡県太宰府市宰府4丁目7番1号
交通：
博多地區：由博多巴士總站可乘搭西鐵巴士前往西鐵太宰府站，車程約45分鐘，落車後經參道步行約5分鐘即達。
天神地區：由西鐵福岡（天神）站搭乘西鐵天神大牟田線特急或急行列車前往西鐵二日市站，轉乘西鐵太宰府線前往太宰府站，車程需時約20分鐘。落車後經參道步行約5分鐘即達。
0 個留言於 “[日本福岡] 太宰府天滿宮”