[日本福岡] たんや HAKATA 博多站牛舌早餐

上次為大家介紹過博多站内嘅生撈雞蛋飯早餐，今次就為大家推介另一款博多站内嘅特色早餐，就係炭燒牛脷飯啦！雖然無雞蛋飯平得咁緊要（其實都只不過500日圓加稅啫），不過水準亦都非常出色，而且配搭亦都比較多元化，成日都要排隊等入座㗎！

たんや HAKATA 受盡國內外嘅食客歡迎，你Google佢個名嘅時候，除咗會見到有唔少港台嘅Blog推介過之外，亦都有為數不少嘅日本網民推薦㗎～我當初都係上網搵資料先發現到呢間餐廳嘅早餐，所以上網做足功課先出發，真係好重要！

早餐除咗炭燒牛脷飯定食之外，仲有另外4款配菜可以加配，分別係明太子、海藻麵條、山藥泥以及納豆，以上四款配菜組合另外包咗生雞蛋一隻或者紫菜，你亦都可以選擇單點配菜。生雞蛋呢樣嘢的確見仁見智，唔係人人接受到，唔肯定自己食唔食到就唔好加，免得嘥嘢。若果唔想食炭燒牛脷，佢哋亦都有供應咖喱牛脷飯。我到訪嘅時候，定食收費500日圓另加稅，不過價錢應該持續上漲緊，價錢要以餐牌為準了。

定食除咗炭燒牛脷同飯之外，仲包咗一碗牛脷湯，另外包咗自助添飲咖啡～薄切牛脷經過炭燒後已經相當美味，落唔落檸檬汁就真係睇你自己習慣啦，我個人覺得唔落夠味。碗飯都唔係純白飯嚟，加咗燕麥更加健康有益！飯唔夠可以再添，咁大胃王就唔需要擔心一碗飯唔夠飽啦～

當然大家唔一定要早餐嚟食牛脷飯嘅，不過附近嘅食肆選擇實在太多，既然呢度有早餐供應，咁梗係把握早餐嘅時間嚟試多樣嘢啦！唔知道大家又有無食過呢間舖頭嘅炭燒牛脷飯呢？有嘅朋友不妨留言同大家分享下呀～如果你有任何關於旅遊嘅問題，亦都歡迎您留言或者Inbox問㗎～

博多1番街店舖介紹資料：www.hakata-1bangai.com
營業時間：07:00 至 23:00 (截單時間：22:00)
早餐時段：
星期一至五：07:00 至 10:30
星期六、日及公眾假期：07:00 至 10:00

地址：福岡縣福岡市博多區博多站中央街1-1 博多1番街內
交通：乘搭JR 或 福岡地鐵空港線前往 博多站 (K11)，商店位於博多站内靠近博多口一側。​