目的地介紹

[泰國曼谷] Rua Thong Noodle 勝利紀念碑船麵店

上星期為大家介紹過曼谷嘅大皇宮,今個星期就講講曼谷嘅美食啦~嚟到曼谷點都要食價廉物美嘅船麵!每碗講緊只係12泰銖,即係3蚊港紙有找!細細碗嗌多幾碗,試盡唔同嘅味先係皇道!今次呢間麵店喺網上都有唔少其他Blogger推介過,大家對佢嘅評價都讚不絕口,而我都唔例外~

船麵相傳係因為以前泰國有好多人都喺船上居住同做生意,麵家為咗方便大家喺船上食麵就將啲麵整細碗啲,是為船麵。不過隨住生活方式改變,船麵就上岸入舖,除咗街舖之外,呢款傳統美食已經登陸百貨公司,甚至衝出泰國去到世界各地~

喺勝利紀念碑附近,除咗今次介紹嘅Rua Thong Noodle之外,仲有幾間其他船麵喺同一條街㗎~睇過每間嘅價錢都幾乎一樣,大概係口味有些少唔同啦~即使係咁,有啲船麵都真係幾辣,未必人人受得到,所以唔太食得辣嘅朋友,唔好睇佢湯底隻色啡啡哋諗住唔辣呀!

舖頭分室內室外兩部分,唔受得熱坐室內涼冷氣就好啦,想有特色啲又唔怕熱就建議坐戶外~Menu有齊泰文同英文,而且明碼實價,一定睇得明。唔同款除咗配料唔同之外,湯底亦都有啲唔同,亦都有款式係乾撈。枱面有魚露同醋等等唔同嘅調味料,可以自己調配啱你嘅口味。至於餐牌嘅另一面就有大碗麵同小食,試過魚蛋都唔錯㗎,50泰銖一碟係抵食嘅~

嚟到2017年最後一日,先預祝各位新年快樂,Happy New Year!同以往一樣,如果你有任何關於旅遊嘅問題,歡迎您Inbox我哋或者留言問㗎~

Rua Thong Noodle 官網:ruathongnoodle.com
營業時間:09:00 至 21:00 (逢星期一休息)
參考消費:每碗船麵12泰銖

地址:1/7 Ratchawithi Rd, Khwaeng Samsen Nai, Khet Phaya Thai, Bangkok
交通:
乘搭BTS 素坤逸線 (Sukhumvit Line) 前往勝利紀念碑站 (Victory Monument),出站後沿3號/4號出口天橋一直行,繞過勝利紀念碑直至見7-11便利店先落地面,沿旁邊小路直入即達。

0 個留言於 “[泰國曼谷] Rua Thong Noodle 勝利紀念碑船麵店

發表回覆

你的電郵地址並不會被公開。 必要欄位標記為 *