目的地介紹

[泰國曼谷] 大皇宮 Grand Palace

曼谷一直都係熱門嘅旅遊目的地,今年嘅Mastercard全球旅遊目的地城市指數就由曼谷蟬聯冠軍位置,估算有約2000萬過夜旅客到訪!泰國除咗以美食同購物俘虜大家之外,相信都有唔少人被佢嘅文化所吸引,試問有邊個未見過嗰啲金碧輝煌嘅宣傳照?雖然交通唔多方便,但大皇宮依然極受歡迎,無論咩時間去都好多人,今日就一於帶大家睇睇呢個昔日嘅皇室居所~

大皇宮由1782年起興建,經過約3年嘅工程之後於1785年竣工,拉瑪一世成為第一位遷入嘅國王。當時泰國仍然用緊舊名暹羅,所以皇宮屬暹羅王國。皇宮最初嘅規模較小,擴建後要去到拉瑪四世嘅時代先開始叫做大皇宮~呢度除咗曾經係皇室嘅住所外,舊時亦曾作為行政及宗教用途,集多項功能於一身。

今次去大皇宮嘅時候選搭的士,沿路就真係體驗到曼谷有幾咁塞車啦~建議大家都係盡量搭公共交通工具啦,除非火車都好多人啦!碼頭出嚟之後一路直行就會去到安檢入口。而安檢入口旁嘅街道有唔少篤篤車,當中有啲人會同你搭訕,可能會同你講皇宮無開呀,又可能提議你去第二度睇下接住晏啲先返嚟睇皇宮諸如此類。佢哋甚至會好好咁畫晒地圖教你,以至叫埋篤篤車嚟接你。呢度請你務必繼續行,唔需要同佢哋有咩交流,佢哋未至於會追住你幾條街唔放。我唔肯定係咪每一個都立心不良,但至少網上不斷有人分享中伏嘅經驗,所以大家最好就提高警覺。

經過安檢之後向前行會有一列店舖,除咗可以喺呢度休息食啲嘢或者飲杯嘢之外,更加多嘅舖頭係賣或者租衫褲。咁係因為入皇宮有嚴格嘅衣著規定,唔可以著背心、短褲或拖鞋等等,即使係穿窿牛仔褲都會被門口嘅守衛捉㗎~所以計劃去皇宮嗰日點都要預備定適合嘅服飾,熱嘅話頂多去到門口著上身,咁就唔使即場買衫褲啦。再過埋門口守衛呢關,先至係入咗大皇宮嘅範圍,再入就係要買飛入場嘅地方啦。沿路會遇到非常多嘅遊人同旅行團,所以小心同屋企人或者朋友失散,亦都要小心財物呀。

入場後會首先入到玉佛寺建築群。圍繞住外圍係長長嘅畫廊,唔好彩落雨嘅話固之然係避雨嘅好地方,其餘時間都值得你睇睇㗎~呢啲壁畫係基於泰國史詩《拉瑪堅》(Ramakien),呢部史詩係由印度史詩《羅摩衍那》(Ramayana) 而衍生出嚟,屬泰國文學重要嘅一章。建築群由唔同嘅舍利塔,以及藏經閣同埋最重要嘅大殿組成。建議大家由左面開始順時針行,行完一圈啱啱好就可以通過去啲宮殿啦。入大殿必須要除鞋入內,裡面亦都唔可以影相,所以只能夠喺外面影。

宮殿一則嘅大部份建築都唔開放參觀,不過當睇建築特色唔錯。呢邊嘅建築係泰西混合而成,所以值得大家慢慢駐足欣賞。呢度四周都有衛兵站崗,雖然唔少遊客都會企佢哋旁邊影相,但其實唔建議大家咁做,一來佢哋作為守衛嘅職責唔係同大家影相,二來應該要尊重佢哋嘅工作。大家影相咁啱影到就無咩問題嘅,但係特登合照就唔好啦。大家如果好彩嘅話可以睇到守衛交更嘅儀式,從未睇過嘅話值得睇睇。

親身去過之後,絕對唔意外點解大皇宮咁受歡迎!睇相嘅時候的確好靚,但去到嘅時候嗰種宏偉嘅感覺,的而且確要去親身感受。如果你有任何關於旅遊嘅問題,歡迎您Inbox我哋或者留言問㗎~

大皇宮日曆表:www.brh.thaigov.net/webboard/index.php?topic=15
開放時間:08:30 至 16:30 (最後入場時間:15:30)
入場費:每人500泰銖,泰國國民免入場費

地址:Na Phra Lan Road, Phra Borom Maha Ratchawang, Phra Nakhon, Bangkok
交通:
乘搭BTS 是隆線 (Silom Line) 前往鄭皇橋站 (Saphan Taksin),出站後往昭拍耶河碼頭 (Sathorn Pier) 搭乘橙色船到N8號碼頭 (Chang Pier),直行約5分鐘即達。

0 個留言於 “[泰國曼谷] 大皇宮 Grand Palace

發佈留言

發佈留言必須填寫的電子郵件地址不會公開。 必填欄位標示為 *