目的地介紹

[法國巴黎] 羅浮宮 Musée du Louvre

法國羅浮宮除咗係世界四大博物館之一,亦都係首都巴黎嘅地標。就係因為人人都知,所以人人去到巴黎都一定會去朝聖,但係你又知唔知道羅浮宮嘅歷史呢?今日就一齊嚟探索吓羅浮宮少啲人知嘅一面啦!

羅浮宮始建於12世紀,屈指一算已經係超過900年前嘅事啦!原先只係一座防禦入侵嘅城堡,其後被改成皇室嘅住所,去到大約17世紀末,藝術家等得以進駐羅浮宮。再過多一個世紀法國大革命嘅時候,羅浮宮就再次轉型,成為博物館直到而家啦~羅浮宮嘅變遷,可以話係隨住法國歷史而走~

羅浮宮現時都保持住唔少世界第一嘅紀錄,例如全球入場人次最高嘅博物館同全球最大嘅藝術博物館,佢亦都係Instagram上面最多人打卡嘅地點嚟㗎~即使舊年嘅入場人次下跌咗唔少,但佢依然受大眾所喜愛,繼續做第一,領先第二位嘅紐約大都會藝術博物館40幾萬人次~

位於宮內中央廣場嘅透明金字塔,係博物館嘅入口。金字塔除咗係修葺羅浮宮工程嘅一部分之外,同時亦係紀念法國大革命200週年嘅重點工程嚟。設計師並唔係法國人,而係美籍華裔建築師貝聿銘,佢亦係香港中銀大廈嘅設計師。雖然設計及興建過程都飽受爭議,不過起碼而家佢都係巴黎嘅地標,羅浮宮嘅一部分。

羅浮宮常年展出接近4萬件展品,涵蓋多個範疇同風格,不論東方西方,雕塑畫像裝置都一應俱全。講到最有名氣嘅,當然唔少得達文西嘅蒙羅麗莎的微笑啦,另外仲有嚟自古希臘嘅雕像等等,全部都好有特色,要睇勻全世界,尤其係歐洲嘅文藝展品就肯定要嚟羅浮宮啦!呢度要特別提到,羅浮宮之前參與咗聯合國教科文組職嘅歸還文化遺產計劃,有部份展品已經歸還返俾其他國家,例如埃及。由此可見博物館其實都會顧及其他國家嘅文化,唔係一尾為自己㗎~

羅浮宮最近喺阿布扎比開咗佢哋海外嘅第一分館,此前亦喺法國北部城市朗斯 (Lens) 開咗國內分館。兩個分館走嘅都係現代路線,所以想體驗最原汁原味嘅經歷,就要親身嚟到巴黎嘅羅浮宮博物館啦!

羅浮宮官網:www.louvre.fr/en

開放時間:
星期一、四、六及日:09:00 至 18:00
星期三及星期五:09:00 至 21:45
逢星期二休息,部分法國公眾假期休館。出入口開放時間各有不同,而各展覽廳會於閉館前30分鐘陸續關閉。

入場費:
成人 (18歲或以上):15歐元
小童 (18歲以下) :免費入場
逢星期五18:00後,25歲或以下人士可免費入場。
由十月到三月期間,每月第一個星期日可免費入場。7月14日法國國慶日亦可免費入場。

地址:法國巴黎里沃利街 (Rue de Rivoli, 75001 Paris, France)
交通:乘搭巴黎地鐵1號線前往王宮-羅浮宮站 (Palais-Royal–Musée du Louvre),經1號出口即達。

0 個留言於 “[法國巴黎] 羅浮宮 Musée du Louvre

發表回覆

你的電郵地址並不會被公開。 必要欄位標記為 *