[加拿大溫哥華] 白石市 White Rock

呢期加拿大機票咁平，絕對係去加拿大玩嘅好時機！先前分別為大家介紹過市中心嘅 固蘭湖島 Granville Island ，以及位於北面嘅 卡皮拉諾吊橋公園 Capilano Suspension Bridge，今個星期一於為大家介紹南面沿海小鎮－白石市～

白石市雖然同溫哥華同屬卑詩省，亦係大溫哥華區嘅一部分，不過佢比起溫哥華市區，更加近美國，事關小鎮距離美國邊境只係大約10分鐘車程咋！由溫哥華市區揸車嚟就大約45分鐘，如果搭火車再轉巴士去白石市，就要接近個半鐘啦。

雖然白石市有火車服務，不過就唔係客運火車，而係用作跨境貨運服務。路軌沿住白石嘅海濱長廊而建，所以當大家去到海邊享受悠閒日子嘅時候，都可以喺無火車經過嘅時候影下路軌相～記得一定要留意四周情況呀，因為火車周不時都會駛過，唔係半夜三更先有車行。

呢度嘅沙灘海岸線全長近8公里，分東西兩部分，兩邊可以話各有用途㗎！西面除咗係白石碼頭嘅所在地之外，亦都係唔少人選擇落水玩嘅地方，所以相對上比較熱鬧。東面就係家庭聚會以及野餐嘅好地方，氣氛會較為輕鬆同悠閒～有時間當然去晒兩邊好啦，如果唔係就要諗諗自己想喺白石呢度體驗啲咩啦～

當你喺西面嘅沙灘行緊嘅時候，記得要留意途中嘅一舊大石頭，而且係白色嘅大石頭！無錯，呢舊大石頭就係「白石」呢個名嘅起源啦～其實呢舊係漂礫 (Erratic) 嚟，估算係冰河時期嘅時候漂流到嚟呢到，輾轉被噴上白色油漆之後促成「白石」呢個名嘅誕生。呢舊「白石」據講重486噸，成架滿載嘅飛機都未必夠佢重呀！

白石市雖然面積細細哋，人口又少少哋，但係呢度風光明媚，生活節奏悠閒，係放鬆一下嘅好地方～當你諗唔到去邊度好嘅時候，一於嚟呢度休息下，幫自己叉一叉電！

Explore White Rock 官網：explorewhiterock.com

地址：加拿大卑詩省白石市
交通：乘搭捷運加拿大線前往橋港站 (Bridgeport)，轉乘351號巴士可直達白石市 (車程約 40至 45分鐘)。