今期同大家講下里數方面嘅攻略～千祈唔好俾標題裡面嘅「埃及航空」嚇親，因為以下落嚟介紹攞金卡嘅方法係唔需要搭埃及航空，都一樣可以做得到㗎！
埃及航空係星空聯盟成員之一，而星空聯盟係世界三大航空公司聯盟之一，成員包括大家較熟悉嘅ANA全日空、長榮航空同新加坡航空等等。同屬星空聯盟令佢哋嘅會員計劃互通，搭乘其他航空公司一樣可以累積到里數。不過今日嘅重點唔在於儲里數換機票，而係在於儲里數攞金卡！
首先要講吓埃及航空金卡有咩用先。先前講到埃及航空係星空聯盟成員，所以佢嘅金卡比照星空聯盟金卡，搭乘其他星空聯盟航班時可以享受同等福利，例如商務艙櫃檯Check-in，額外寄艙行李限額，入貴賓室同優先登機等等。
一般嚟講，大部分嘅會員計劃都會每個年度作一次結算，一年內達唔到護級要求就要新一年由頭再嚟過。只不過埃及航空嘅計劃係每兩年先結算一次，所以唔需要擔心一年飛得唔夠多，你有兩年時間努力。而第一次升級更加係無限期，3年先儲夠分都可以㗎～
埃及航空提供家庭計劃比最多5名家庭成員齊齊儲分，而呢個家庭計劃特別在於可以容許會籍積分亦都可以一齊儲㗎！所有積分都會累積到主戶口，所以之後攞到嘅銀卡金卡會籍都係主戶口持有人所有。
舉個例就係爸爸開戶口後，加入媽媽同仔女一齊儲分，咁所有積分都會累積到爸爸嘅戶口啦，達到指定積分之後爸爸就會得到銀卡或者金卡會籍啦。
家庭計劃必須要事前向埃及航空嘅客戶服務部申請，出發前一星期之前一定要辦妥，如果唔係之後先申請家庭計劃會浪費咗之前嘅里數㗎～詳細申請方法係留意返官網嘅呢一頁。
順帶一提，埃及航空呢個計劃係少有仲有實體卡㗎，只要有分數入帳就會寄卡俾你啦，實體卡買少見少，當記念都好呀～今日介紹住咁多先，下個星期為大家講解有啲咩渠道儲分同埋點樣計累積到幾多里數！
最後呢度放返個會籍一覽嘅表格俾大家參考～
Pingback: 加拿大航空新版 Aeroplan 即將推出 － 計劃特點逐個睇 - Flyerlog