[台灣台北] 松山意舍酒店 amba Taipei Songshan

台北酒店選擇多的是，選擇的確花多眼亂。不論你追求簡約設計，抑或交通方便，都總會有酒店啱你。而集呢啲優點於一身嘅酒店亦都比比皆是，今次就為大家介紹一下我親身住過嘅松山意舍酒店～

松山意舍酒店位於松山車站上蓋嘅多用途大樓內，而松山車站就集捷運台鐵以及巴士服務於一身，算係一個小型嘅交通樞紐嚟㗎～由桃園機場嚟到松山呢度，不論你搭巴士轉捷運，抑或捷運轉捷運，都只係需要轉一次車，一啲都唔麻煩㗎！

意舍酒店隸屬於台灣國賓大飯店集團，係2012年先創立嘅年輕品牌，一改以往經營嘅豪華飯店風格，意舍主張一切從簡，融合天然元素於設計當中～酒店大堂除咗有特高樓底同落地玻璃窗之外，外面仲見到台北101㗎。酒店大堂閒坐區除咗有各式雜誌睇之外，仲有部玩得嘅足球機㗎！回返帶，達哥都曾經拍過片同台灣小朋友係呢度玩過～

酒店房根據唔同房型會望到唔同嘅景觀，有啲係望中庭、有啲望基隆河、有啲就望台北101。今次住嘅雙人房就係望基隆河以及市民大道，景觀開揚得嚟又唔會太荒涼。酒店房間隔唔算多，一眼就可以睇晒所有嘅置物空間，Check Out 嘅時候就唔需要擔心漏咗嘢係櫃桶或者啲古惑位度～廁所屬於乾濕分離嘅設計，馬桶以及沖涼嘅地方分為兩部分。不過要注意返兩格都無門鎖，大家關係唔夠親嘅話可能會覺得尷尬。

房間設備同樣值得大家留意，皆因每間房內都有一部Nespresso咖啡機，有3個免費嘅膠囊請你飲㗎。除此之外，藍牙喇叭同Wi-Fi Router都係每房一部，唔駛同人爭Wi-Fi訊號之餘，仲可以有閒情聽下歌添～酒店仲有好多其他嘢可以提供或借俾大家用，不過我未試過就唔多作介紹啦，大家可以參考返官網嘅清單。

酒店附近雖然唔夠西門町呢啲區熱鬧，不過附近亦都有唔少地方可以去。著名嘅饒河夜市距離酒店只係大約5分鐘路程，咁近就可以食到好味又抵食街頭小食，買返上房嘆都唔成問題！饒河夜市旁邊嘅基隆河同時係彩虹橋嘅所在地，夜晚嚟影比起日頭更加有感覺㗎～

不得不提酒店嘅服務質素，雖然呢間唔係5星級豪華酒店，亦都唔係日資酒店，但係員工時刻以禮相待之餘，亦都相當熱情，一啲都唔比其他國際品牌遜色。優秀嘅員工，再加上親民嘅價格以及方便嘅地點，松山意舍酒店絕對係值得推薦嘅酒店之一。

下次到訪台北，值得再住。

松山意舍酒店 amba Taipei Songshan
酒店官網：www.amba-hotels.com/tc/songshan/
電話：+800 0088 2828

參考價錢：每晚台幣3100元 (折合約港幣805元)
地址：台灣台北市南港區市民大道七段8號
交通：乘搭台北捷運松山新店線到總站松山，經出口4A前往台鐵松山車站，轉上扶手電梯進入Citylink松山店，經2樓行人天橋直達酒店升降機大堂。直接搭乘由台灣各地搭乘台鐵前往松山車站亦可。