目的地介紹

[新加坡] 喜園咖啡店 YY Kafei Dian

出名嘅新加坡美食,除咗辣椒炒蟹、海南雞飯同喇沙等等呢啲主菜之外,早餐同樣出色以及多元化!今日為大家介紹其中一間本地人都推薦嘅咖啡店,專賣咖椰多士同奶茶咖啡,早餐非常旺場㗎!

喜園咖啡店位於Beach Road大馬路旁邊,位處於店屋之內。店屋係其中一種新加坡常見嘅建築風格,排列整齊嘅店屋散發濃厚嘅傳統文化氣息,就好似返到去舊時歷史當中。雖然有唔少嘅店屋喺上世紀發展時被破壞或者拆除,但餘下嘅店屋如今已經得到政府嘅重視,投資保育呢一段南洋歷史。大家唔單止喺唐人街或者小印度會見到店屋,喺各區甚至市中心內都見得到,就好似喜園咖啡店呢度咁啦。

喺喜園咖啡店,早餐係無固定嘅套餐比大家嗌嘅,大家可以自由組合你想食嘅早餐,生熟蛋同咖椰多士等等。你鍾意食蛋唔食包又得,食包唔食蛋,數量同組合都係由你自己話事。除咗呢啲之外,仲會有各式各樣嘅炸物以及糕點,晏些少嘅時間仲會有海南雞飯同椰漿飯呢啲主菜供應㗎!我講咁多食評或者意見都無謂,大家睇相最實際!

喜園嘅環境當然唔能夠同商場裡面嘅餐廳比較,主要仲用緊吊扇,冷氣就只係輔助,相對地原始。咖啡店除咗裡面雅座之外,你亦都可以選擇坐出少少靠近啲馬路,一邊嘆茶一邊睇人生百態。

夜晚雖然無日頭咁旺場,不過呢度仲會做埋小菜同煲仔菜等等㗎。雖然我就未食過,不過網上食評都話相當不錯,大家若果夜晚諗唔到食咩好嘅話,喜園都可以係你選擇之一嚟架!

除咗今日推介嘅咖椰多士之外,肉骨茶亦都係新加坡早餐名物之一嚟㗎!下次再介紹新加坡嘅時候,為大家介紹好飲嘅肉骨茶啦!記得留意住我哋更新啦!

營業時間:平日及公眾假期:08:00 至 22:00

地址:37 Beach Road #01-01, Singapore

交通:
乘搭新加坡地鐵 MRT 東西線或南北線:前往政府大廈站 (City Hall, EW13/NS25),經Raffles City商場前往Beach Road,向萊佛士酒店方向步行約5分鐘即達。

東西線或濱海市區線:前往武吉士站 (Bugis, EW12/DT14),經Bugis Junction 商場前往North Bridge Road,靠左直行往國家圖書館方向,左轉入Purvis Street,往盡頭即達。

環線:前往濱海中心站 (Esplanade, CC3),經South Beach前往Beach Road,轉右沿萊佛士酒店正門大馬路步行約5分鐘即達。

0 個留言於 “[新加坡] 喜園咖啡店 YY Kafei Dian

發表回覆

你的電郵地址並不會被公開。 必要欄位標記為 *