綜合多家媒體報導，卡塔爾及沙特阿拉伯達成協議，兩國將重開邊境及容許卡塔爾航機飛越沙特領空，受禁令影響而大幅繞道嘅卡塔爾航空有望受惠，重新獲准飛越沙特。
2017年中，巴林、埃及、沙特阿拉伯及阿聯酋四國指責卡塔爾「支持恐怖活動」，因此對卡塔爾實施封鎖，當中包括禁止卡塔爾航機飛越四國的領空。因此，卡塔爾航空嘅航班被逼繞道，並且需要暫停往來上述四國的航線。繞道飛行令部分原本頗為直接嘅飛行路線變得迂迴曲折，大幅增加飛行時間。
華盛頓郵報於禁飛令生效後曾經追蹤由卡塔爾飛往蘇丹的航班，調查發現航程由原先的3小時39分鐘，大幅增加至接近6小時。航班飛行路綫由直接飛越沙特阿拉伯的1600英里，改成需要飛行近3000英里，環繞半個阿拉伯半島飛行嘅路線。
卡塔爾一方一直主張上述封鎖措施屬於「非法」，並且要求國際民航組織作出裁決，雙方繼而鬧上國際法庭。最終，國際法院去年裁定國際民航組織有權就封鎖作出裁決，而後者預定於今年內作出裁決。如今雙方喺科威特斡旋下自行解決爭議。
海灣合作委員會峰會即將喺沙特阿拉伯舉行，卡塔爾領導人亦會出席，預料雙方將於會上正式簽署協議。暫時未知餘下三國會否跟隨撤銷禁令。不過可以肯定係禁令解除後，採用更直接路線將可以為乘客節省寶貴嘅時間，同時減少燃油消耗，減少浪費。
資料來源：路透社、香港電台
圖片來源：Juke Schweizer，按照 CC BY-SA 4.0 授權
影片來源：華盛頓郵報
0 個留言於 “沙特與卡塔爾重開邊境及領空 卡塔爾航空有望同獲解封”