[航空消息] 阿聯酋航空推出全新特選經濟艙

阿聯酋航空（Emirates）啱啱喺今日（29/12）正式推出佢哋嘅特選經濟艙（Premium Economy）啦！雖然世界各地嘅航空公司都已經引入特選經濟艙多時，不過連同阿聯酋航空在內嘅「中東三寶」就一直都無提供，所以今次都算係一個突破嚟～

A380 可以話係阿聯酋航空嘅皇牌，所以今次嘅新客艙產品亦率先喺呢個雙層珍寶上登場。特選經濟艙設於下層最前方嘅部份，一行八個位，以 2-4-2 形式排列，合共提供56個座位。

據航空公司嘅資料顯示，坐距最多可達40吋，而座位本身就闊約19.5吋，亦可以向後躺約8吋。頭枕腳踏等都可以調較，方便乘客休息。另外，每個座位均配置13.3吋螢幕以及一張闊餐桌。

今次最矚目嘅固然係全新推出嘅特選經濟艙，不過其他等級嘅客艙產品亦都同樣有更新㗎！各個客艙嘅配色都略有更改，頭等艙以及商務艙都改用較低調嘅香檳色，經濟艙就加入一啲木嘅元素。除此之外，機上酒吧以至係淋浴設備亦都有翻新過嘅設計～

阿聯酋航空喺接收呢一架配備全新客艙產品嘅 A380 之後，仲有5架新嘅 A380 會喺2021至2022年之間加入佢哋嘅機隊。特選經濟艙除咗會喺呢六架 A380 上安裝之外，仲會喺2023年加入嘅波音 777X 上安裝。至於現有 A380 會唔會安裝呢套全新客艙產品就有待確認～

喺今年疫情爆發前，阿聯酋航空每日營運接近四對來回航班往返香港以及杜拜，當中仲有成三班機都會用到 A380，所以呢套新產品話唔定唔使幾耐就會嚟到香港，大家可以密切留意啊～

資料及圖片來源：阿聯酋航空（英文）