日本第一間 W 酒店-2021 年 W Osaka 大阪心齋橋開幕

大阪 W 酒店 - 內部一角
大阪 W 酒店 - 內部一角

W 酒店將會喺2021年正式登陸日本!來年3月16號,位於大阪心齋橋嘅 W Osaka 就會開幕,為大家帶嚟又一個新選擇!

萬豪旗下嘅 W 酒店,走時尚奢華路線,一直都深受大家歡迎㗎~佢哋喺全球已經有五十幾間酒店,2021年亦會有多間新酒店開幕。除咗大阪之外,墨爾本以及多倫多嘅 W 酒店都會喺出年同大家見面!

W Osaka 座落御堂筋,離開心齋橋地鐵站大約五分鐘路程。無論係要購物、吃喝玩樂,抑或係出差要到商業區一帶工作都方便~畢竟御堂筋係貫穿大阪南北嘅交通命脈!

相關文章:[日本大阪] 2020年精選新酒店巡禮-難波 本町 心齋橋 大阪各區

世界各哋嘅 W 酒店都有佢哋各自嘅主題~今次嚟到大阪就決定圍繞住「大人的遊樂場」呢個主題進行設計!酒店表示係由江戶時代嘅大阪商人得到靈感,繼而發展出今次嘅主題。

據說,當時江戶幕府禁止一切過份奢華、鋪張浪費嘅舉動。不過正所謂「你有張良計,我有過牆梯」,大阪商人並無因為禁令而停止佢哋嘅奢華享受。佢哋嘅應對方案係為享樂場所配上簡約嘅外觀,而內裡就繼續極度奢華嘅裝潢~

大阪 W 酒店
大阪 W 酒店

返到嚟21世紀,酒店喺設計上透過兩部分演繹上述嘅呢段歷史。外觀由日本建築師安藤忠雄設計,仿照將巨大礦石磨成嘅清澈結晶,簡約兼乾淨俐落。另一方面,已經多次同 W 合作嘅荷蘭工作室 Concrete Architectural Associates 就會負責打造閃鑠同玩味十足嘅內部空間!

大阪 W 酒店 - 客房
大阪 W 酒店 - 客房

大阪 W 酒店設有337間房,其中287間係客房,餘下50間屬套房,包括一間 Extreme WOW 套房以及兩間 WOW 套房。房間加上配備落地大玻璃,能夠隨時隨地欣賞到大阪嘅景色~設計方面亦當然一如其他 W 酒店咁色彩繽紛啦!

大阪 W 酒店 - 酒吧
大阪 W 酒店 - 酒吧

至於公共空間以及設施方面,健身室、泳池、水療設施等都有,仲有活動場地以及會議室,配合晒遊客同商務客人嘅需要。講到酒店,當然唔少得餐廳啦!不過酒店就只係賣個關子,提到已經邀請咗米芝蓮星級廚師坐鎮,具體資料留待不日公開~

身為萬豪集團一分子,大阪 W 酒店當然有參加 Marriott Bonvoy!酒店分類暫時編配為第六級(Category 6),兌換獎勵住宿嘅分數介乎每晚 40,000 至 60,000 分。而房價方面暫時見價位偏高,因為只有彈性房價供應。如果同樣以彈性房價比較,價格同位於天王寺,阿倍野HARUKAS內嘅萬豪都酒店(Osaka Marriott Miyako Hotel)其實差唔多,每晚近 $4,000。

依家預訂2021年嘅行程或者仲係早咗少少,不過做定功課為之後做準備就幾時都唔早~大家下次去大阪嘅時候就不妨考慮下 W Osaka 啦!

W Osaka (大阪 W 酒店)
官方網站:marriott.com
電話:+81 06-6361-7330
地址:大阪府大阪市中央區南船場四丁目 1-3
鄰近車站:大阪地下鐵御堂筋線、長堀鶴見綠地線 心齋橋站

開業日期:2021年3月16日(星期二)
參考價錢:彈性房價-連稅每晚 55,147 日圓(折合港幣 4,105 元)

資料及圖片來源:PR TIMES

發佈留言

你的電郵地址並不會被公開。 必要欄位標記為 *