旅遊新聞

[航空消息] 日本空中通勤(JAC)及北海道空中系統(HAC)成為寰宇一家聯屬成員

日本空中通勤(JAC)及北海道空中系統(HAC)成為寰宇一家聯屬成員

日本航空(JAL)旗下嘅日本空中通勤(JAC)以及北海道空中系統(HAC),由今日(25/10)起加入成為寰宇一家聯屬成員!

此前,日航旗下嘅多間子公司當中,只有J-Air 以及日本越洋航空(JTA)已經加入成為寰宇一家嘅聯屬成員,分別覆蓋由大阪及沖繩出發嘅國內航線。

新加入嘅 JAC 於1983年成立,以鹿兒島為樞紐,提供鹿兒島縣以及九州一帶嘅接駁航班服務。至於 HAC 就係服務北海道及青森嘅地區航空公司,營運多條由札幌丘珠機場出發嘅航線。兩者合計喺超過20個航點提供服務,去年載客量仲接近90萬人次㖭!今次佢哋加入就為寰宇一家帶嚟四個新目的地,包括喜界 (KKX)、沖永良部島(OKE)、但馬(TJH)同屋久島(KUM)!

兩間航空公司加入成為聯屬成員後,寰宇一家會員可以喺乘搭 JAC 及 HAC 嘅航班時累積里數,亦可以用里數兌換由佢哋營運嘅航班~利用英航 Executive Club 訂位網頁已經能夠搜尋得到 JAC 同 HAC 嘅航班,但係暫時未能夠進行預訂,會彈出提示建議透過客戶服務中心預訂。

透過英航 Executive Club  嘗試預訂由丘珠前往釧路嘅HAC航班
透過英航 Executive Club 嘗試預訂由丘珠前往釧路嘅HAC航班

JAC 以及 HAC 所營運嘅航線飛行距離都比較短,所以相信大部份航班都會落入兌換表格中最短途嘅部份。以英航 Executive Club 兌換會係每程 6,000 里數,以國泰亞洲萬里通就會係每程 7,500 里數。兌換國內航線嘅稅項一般都非常低,所以如果購票價錢偏貴的話,用里數進行兌換相信係一個唔錯嘅選項。

資料來源:寰宇一家

0 個留言於 “[航空消息] 日本空中通勤(JAC)及北海道空中系統(HAC)成為寰宇一家聯屬成員

發表回覆

你的電郵地址並不會被公開。 必要欄位標記為 *