旅遊新聞

加拿大航空新版 Aeroplan 即將推出 - 計劃特點逐個睇

加拿大航空新版 Aeroplan

需要頻繁往返加拿大嘅朋友,相信大家身邊總有一兩個,事關加拿大係移民熱門目的地,又多人前赴當地讀書,所以大家都唔會對加拿大航空 (Air Canada) 太陌生。

加航去年完成收購里數計劃 Aeroplan,正式將佢併回航空公司架構內。即使今年疫情大流行令到好多計劃部署被打亂,Aeroplan 嘅改革計劃如期會係今年推出,定於 11 月 8 日登場。

新計劃有三大焦點,當中包括兌換表格、兌換相關費用以及全家桶計劃,以下為大家一一探討。

全新兌換表格 + 單程兌換亦可停留 (Stopover)

新計劃將兌換表格分區簡化,由原來14個分區,合併成四大分區(北美洲、南美洲、大西洋以及太平洋)。

  • 四大分區
    • 北美洲(例子:加拿大、墨西哥、巴拿馬、美國)
    • 南美洲(例子:阿根廷、巴西、智利、秘魯)
    • 大西洋(例子:阿聯酋、歐洲、印度、南非)
    • 太平洋(例子:澳洲、日本、韓國、台灣)
加拿大航空 Aeroplan 兌換分區 Travel Zones (圖片來源:加拿大航空)
加拿大航空 Aeroplan 兌換分區 Travel Zones (圖片來源:加拿大航空

分區後再按照機票所往來嘅分區收費,往返不同分區各有表格,而部份表格會再按距離以及航空公司收費。

以香港飛往多倫多嘅航班為例,飛行距離大約為 7,810 英里。適用嘅表格係「北美洲往來太平洋 (Between North America and Pacific zones)」,可以見到表格按四個距離分類,當中再以加航航班同合作夥伴航班細分組別。

喺「7,500 – 11,000 英里」內,如果兌換加航商務艙,需要繳付 至少 85,000 里,至最多 200,000 里。假設轉機航班嘅飛行距離無大幅增,總數維持係同一組別的話,就劃一 85,000 里。

加拿大航空 Aeroplan 北美洲分區往來太平洋分區的兌換表格 (圖片來源:加拿大航空)
加拿大航空 Aeroplan 北美洲分區往來太平洋分區的兌換表格 (圖片來源:加拿大航空

由上述嘅表格可以睇到,加航維持對自家航班採用浮動定價,亦即係熱門嘅航班或者出發日期會收貴啲。比起無上限嘅浮動價格,喺表格有訂明嘅區間會比較清楚透明。

另外,我認為「南美洲內 (Within South America)」係一張比較值得留意嘅表格,因為佢係唯一一張無按距離細分組別嘅表格。如果能夠兌換到飛行距離較長嘅行程,相信都不失為一個唔錯嘅選項~

除此之外,加航喺新版 Aeroplan 裡面提供付費停留 (Stopover) 嘅選項。即使兌換單程機票,只要繳付 5,000 里就可以喺中途站停留。由於上述嘅兌換表格未見加航有明確限制路線,所以由亞洲出發前往北美洲行程,或者唔一定要經由日韓等地轉機,大家隨時可以係停留澳紐,甚至係歐洲等地㗎!

兌換自家航班免收附加費 + 合作夥伴航班訂位費

相信唔少人兌換機票嘅時候,都好討厭各種航空公司附加費,尤其係燃油附加費~當中部份外國航空公司嘅附加費隨時佔咗機票總價格嘅八九成都唔出奇,令到兌換機票嘅成本大大提高。

市面上有部份里數計劃都免收航空公司附加費,而依家加航亦都加入呢個行列,免除兌換自家航班時嘅相關附加費用。至於兌換合作夥伴航班會否繼續收取相關費用,就要待計劃正式推出時再測試先能夠確定啦!

加拿大航空 Aeroplan 免收航空公司附加費(圖片來源:加拿大航空)
加航 Aeroplan 免收航空公司附加費(圖片來源:加拿大航空

不過有好消息亦都有壞消息-喺新計劃下兌換合作夥伴航班,加航將會收取每位 39 加元(港幣 227 元)嘅訂位費。預訂短途廉價航班就相對地無咁抵。

全家桶家庭計劃 - Aeroplan Family Sharing

星空聯盟內有好幾間航空公司提供全家桶里數計劃,例如係全日空、韓亞航空,以至之前介紹過埃及航空,依家就有埋加拿大航空~全家桶嘅好處,自然就係集多人之力,更容易賺取足夠里數進行兌換。

加拿大航空 Aeroplan Family Sharing 全家桶里數計劃(圖片來源:加拿大航空)
加航 Aeroplan Family Sharing 全家桶里數計劃(圖片來源:加拿大航空

Aeroplan Family Sharing 容許最多八名成員一組。每名成員創建或者加入群組後,需要至少等待三個月先能夠離開,離開後亦不得喺六個月內創建或者加入其他群組。條款亦限定群組成員需要有親戚關係,但就無規定需要同住於同一地址或地區。

雖然 Aeroplan 唔似 EGYPTAIR Plus 咁可以集眾人嘅里數升級會籍,不過亦有會籍等級相關嘅禮遇。介紹頁面列明,只要群組內有成員設有加航聯營信用卡或者獲得指定會籍等級,群組內其他成員同樣能夠享受優惠兌換標準。

小結

雖然有部份細節仍然有待釐清,不過計劃嘅整體改動都頗為正面!遺憾地,亞太區內能夠賺取加航里數嘅渠道唔多,要到美加方面先有較多信用卡能夠將積分兌換成加航里數,所以會首先推薦俾持有北美信用卡,以及係喺美加居住嘅朋友。希望佢哋稍後亦都能夠喺亞洲有更多嘅合作,提供多一個選擇俾大家~

資料來源:加拿大航空(來源 1 | 來源 2

0 個留言於 “加拿大航空新版 Aeroplan 即將推出 - 計劃特點逐個睇

發表回覆

你的電郵地址並不會被公開。 必要欄位標記為 *