英國由今日（6月8日）起，要求入境人士提供旅程相關資料，並於入境後進行為期14日嘅自我隔離。
新推行嘅入境規定並不適用於由愛爾蘭 (Ireland)、海峽群島 (Channel Islands) 或 曼島 (Isle of Man) 赴英，並且已經喺上述三地逗留至少十四日嘅人士。另外仲有其他指明群體可以獲得豁免，詳情可以參考英國政府相關宣布。
一. 申報赴英旅程資訊
由預定入境時間前48小時起，每名十八歲或以上的人士都需要透過網上系統，填寫一份名為 Public Health Passenger Locator Form 嘅表格進行申報。除咗十八歲以下人士可以跟同行成人共用一份表格，其餘人士都需要各自填寫表格。需要申報嘅資料包括：
- 護照資料（名字、國籍等等）
- 負責旅行社的名字（適用於旅行團）
- 機票、車票或船票的預訂參考編號
- 預定抵達的關口（機場、車站或碼頭）
- 預定抵達的日期
- 乘搭的航空公司、火車或渡輪服務公司的名字
- 乘搭的航班、火車或渡輪班次編號
- 抵達英國後首十四天的住處地址
- 緊急聯絡人資料
乘搭歐洲之星或經由英法海底隧道前往英國的話，指引建議旅客填寫「Eurostar」或者「Eurotunnel」以及預定出發時間於「航班、火車或渡輪班次編號」的欄位。
入境英國嘅時候，邊境檢查站人員將會檢查你是否已經完成申報。入境人士需要透過手機展示已經填妥嘅表格，出示列印嘅實體表格亦都可以。未完成申報或者拒絕申報的話，可以被罰款 100 英鎊，或者被拒絕入境。
二. 到達英國後自我隔離14日
抵達英國後，無病徵人士需要直接前往於表格上申報嘅隔離處所。必要的話亦可以於中途點留宿，但就需要作出申報。當局並不建議國民或旅客於入境後利用公共交通工具前往隔離處所，所以最好就安排的士或者接送服務。
自我隔離令並無限制進行隔離嘅處所，自己嘅住所、朋友或親人嘅住所，以及酒店或旅舍等都可以。資料指出，同住嘅家人或者朋友如果無喺旅途上同行，而你於隔離期間無病徵的話，佢哋無需要進行自我隔離。
以英格蘭嘅要求為例，自我隔離期間只有六種指定情況可以獲准外出，例如尋求緊急醫療服務、履行法律責任或遇上緊急情況等等。如果你喺英格蘭違反自我隔離規定，將會被罰款 1,000 英鎊。倘若你無申報準確嘅旅程資料（包括有改動後無作出更正），更加可以被罰款最多 3,200 英鎊。
現時各國政府都建議國民延遲或取消所有不必要海外行程。如果你需要於短期內前往英國，請記得留意以上關於自我隔離嘅資訊，預先做好準備。至於要更改或取消機票及酒店預訂嘅話，可以睇睇我哋整合相關資料～
相關文章：
[武漢肺炎] 一文盡覽各大航空公司最新票務安排
[武漢肺炎] 一文盡覽各大酒店及訂房網站最新安排
封面圖片由 Eva Dang 拍攝，特此鳴謝。
0 個留言於 “[疫情快報] 英國實施規例要求入境人士自我隔離14日”