目的地介紹

[日本福岡] 2020年精選新酒店巡禮-博多 中洲 天神 福岡各區

日本 福岡

注意:
因應武漢肺炎(新型冠狀病毒 COVID-19)疫情,全球多國仍然維持出入境限制及人流管理措施。有關措施可能隨時有所更改,故此預訂前應先留意有關更改或取消的條款及細則。除此之外,酒店亦可能因防疫或營運需要,更改開業日期,或修訂提供的服務及設施,文章內容只供參考。

福岡之前兩年都一直有唔少新酒店,今年亦都唔例外㗎!2020年福岡市有至少八間新酒店開業,分佈博多、中洲同天神等等嘅中心地帶~
今年喺福岡開業嘅新酒店絕大部分都係當地品牌,包括Hotel Forza、Hotel Wing 以至係三井花園酒店系列都有所擴充!心儀國際品牌嘅話,亦都有新嘅 Best Western ~
雖然疫情打亂咗部份酒店開業時間嘅部署,不過大家睇吓當做定功課先,預先鎖定心水都好吖~即刻睇吓今次介紹嘅八間新開業福岡酒店!

重溫:
[日本福岡] 2018年精選新酒店巡禮
[日本福岡] 2019年精選新酒店巡禮



2020年1月24日開業
Hotel Forza 博多站筑紫口二館
Hotel Forza Hakataeki Chikushi-Guchi II

去過博多站一帶嘅朋友,可能已經見過,甚至住過 Hotel Forza 系列嘅酒店啦!今年佢哋就開佢哋喺博多站嘅第三間酒店,開設「筑紫口二館」,離開JR站大約3分鐘路程左右,地鐵站更加只係1分鐘路程添咋。
Forza 喺意大利文嘅意思係「能量」,所以酒店好貼心咁預備咗唔少設備俾大家盡情放鬆同休息~雖然二館無好似一館咁間間房都有 iPad 玩,但呢度就有智能電視,夜晚可以投射電話嘅靚相出嚟欣賞~每間房仲設有按摩咕????添!酒店合共提供八種房型,當中包括家庭房~至於房間面積就由194呎起。

地址:福岡縣福岡市博多區博多駅東一丁目 13-3
鄰近車站:JR、福岡地下鐵空港線-博多站
電話:+81 092-473-7114
立即訂房:Agoda / Booking.com / 酒店官網(英文)
備註:休業中,暫時停止接受預訂

2020年2月1日開業
福岡一五別墅
The OneFive Villa Fukuoka

中洲一帶嘅河景,再加上夜晚熱鬧嘅屋台,相信係唔少人必到嘅地方嚟~2月開業嘅 The OneFive Villa Fukuoka 就喺運河城對岸,係該帶少數位於河邊第一排嘅酒店嚟!酒店離開中洲川端站大約8分鐘路程左右,而運河城同天神亦喺步行範圍內。
酒店只係設有50間客房,一共分成四個房型。兩款房型可以欣賞河景,其中一種更加係配有露台嘅房型嚟,夠晒特色!呢度嘅房亦都偏大一啲,最細嘅房型都已經有334呎大啦~除此之外,佢哋每日設有特別嘅「Villax Time」,將特選甜點送到房俾你嘆~

地址:福岡縣福岡市中央區春吉三丁目 4-6
鄰近車站:福岡地下鐵空港線-中洲川端站
電話:+81 0570-005-015
立即訂房:Agoda / Booking.com / 酒店官網(英文)
參考價錢:連稅每晚約港幣 844 元

2020年3月1日開業
THE BASICS FUKUOKA

福岡凱悅酒店原址經過大約1年裝修後,由Hotel Forza 嘅管理公司以自家品牌-「THE BASICS FUKUOKA」為名重新開業~酒店離開博多站大約7分鐘路程,由機場國際線客運大樓直接搭的士就10分鐘車程左右。
酒店以「Intellectual Stimulation」為主題。要啟發智慧,書本相信係必不可少嘅一件物品,所以酒店由大堂到客房設計,甚至係客房分類嘅命名,都融入同書本有關嘅元素在內。三大種類客房合共提供19種房型,當中入門級別客房不論床型面積均由215呎起。

地址:福岡縣福岡市博多區博多駅東二丁目 14-1
鄰近車站:JR、福岡地下鐵空港線-博多站
電話:+81 092-412-1234
立即訂房:Agoda / Booking.com / 酒店官網(日文)
參考價錢:連稅每晚約港幣 1,092 元

2020年3月10日新棟(北翼 North Wing)開業
博多站前WING國際精選酒店
Hotel Wing International Select Hakata Ekimae

博多站前WING國際精選酒店早喺2016年已經開業,不過今年佢哋就新興建咗北翼部份,加多咗唔少客房~佢哋位置交通方便,離開博多站只係4分鐘路程左右,附近亦都有唔少嘢食,仲可以行過去運河城~
酒店每一層都以唔同國家嘅城市為主題,去旅行嘅時候再去多個小旅行~新翼層數較多,所以新增咗兩個新城市,分別係芬蘭嘅赫爾辛基以及越南嘅胡志明市。Hotel Wing 嘅價位比較實惠,所以客房面積會比較細,最細嘅一款得129呎大。

地址:福岡縣福岡市博多區博多駅前三丁目 22-19
鄰近車站:JR、福岡地下鐵空港線-博多站
電話:+81 092-476-9111
立即訂房:Agoda / Booking.com / 酒店官網(中英文版尚未更新與北翼相關資訊)
參考價錢:連稅每晚約港幣 503 元

2020年4月1日開業
福岡蒙特利酒店
Hotel Monterey Fukuoka

蒙特利系列今年亦會喺福岡擴展版圖,開辦第三間酒店,選址近住天神,位於渡辺通地鐵站旁~作為主品牌嘅代表,酒店設備比起之前兩間自然更加齊全,呢度配備有溫泉同桑拿設施,最啱行完一日街之後去舒緩疲勞~亦都唔少得洗衣機同乾衣機,方便帶少兩套衫嘅輕便旅客。
酒店提供五種房型,包括雙人房、雙床房同三人房等等,亦都有提供和洋室,如果想體驗和洋室嘅話就相當適合啦。入門級別客房屬雙床房房型,客房面積偏大,由258呎起,而和洋室就接近倍增至約484呎。

地址:福岡縣福岡市中央區渡辺通三丁目 4-13
鄰近車站:福岡地下鐵七隈線-渡辺通站
電話:+81 092-734-7111
立即訂房:Agoda / Booking.com / 酒店官網
參考價錢:連稅每晚約港幣 706 元

2020年7月1日開業
三井花園酒店福岡中洲
Mitsui Garden Hotel Fukuoka Nakasu

三井繼舊年初次登陸福岡後,今年旋即開第二間酒店,落戶中洲~今次呢間更接近天神一帶,離開最近嘅地鐵站更加只係兩分鐘路程咋!配合返中洲地段嘅特色,酒店嘅設計融合返「地」同「水」嘅元素喺裡面~
同祇園該間一樣,酒店頂樓設有大浴場同休息室~餐廳方面就邀請到著名居酒屋「小野の離」進駐~呢度八種不同房型合共提供 257 間客房,普通雙床房最多可以供三人入住,其餘客房全部都係屬二人一房。客房面積中規中矩,雙床房由193呎起。

地址:福岡縣福岡市博多區中洲五丁目 5-1
鄰近車站:福岡地下鐵空港線-中洲川端站
電話:+81 092-263-5531
立即訂房:Agoda / Booking.com / 酒店官網
參考價錢:連稅每晚約港幣 784 元

2020年8月1日開業
HOTEL TRAD HAKATA

以博多嘅多元化傳統為題,有 HOTEL TRAD HAKATA ~酒店喺空間打造方面結合咗三種不同風格,既有英國嘅沉實同日本嘅莊嚴,亦都有當代北歐嘅元素。位置離開博多站同天神較遠,酒店方面建議轉乘巴士,車程分別大約 5 分鐘同 8 分鐘左右。
房型分為四大類,主要分成雙人房及雙床房,當中以後者佔大多數,整體面積亦都較雙人房為大。雙人房面積由220呎起,雙床房面積就由268呎起,最大嘅豪華雙床房有577呎,仲最多可以四人入住添。

地址:福岡縣福岡市博多區住吉三丁目 12-1
鄰近車站:JR、福岡地下鐵空港線-博多站(轉乘巴士約 5 分鐘)
電話:+81 092-710-7675
立即訂房:Agoda / Booking.com / 酒店官網(日文)
參考價錢:連稅每晚約港幣 769 元

2020年10月1日開業(預計)
福岡天神最佳西方 Fino 酒店
Best Western Plus Hotel Fino Fukuoka Tenjin

Best Western 今年將會首度登陸九州,喺福岡開設酒店~酒店位於天神南近那珂川,雖然離開天神中心地帶有八至十分鐘距離,不過就近啲中洲,變相有更多地方食同買~受疫情影響,原定6月開業日期已經推遲,按照現時訂房資料顯示,初步預計要到10月先會正式開業。
酒店分別提供雙人房、雙床房、三人房以及四人房,啱晒各類型嘅旅客~無論係一家大細,抑或三五成群,都一樣可以輕鬆搵到適合嘅配搭。客房面積以Best Western 價位嚟講亦算比較大,最細都有191呎大~

地址:福岡縣福岡市中央區春吉三丁目 13-19
鄰近車站:福岡地下鐵空港線-天神站 或 福岡地下鐵七隈線-天神南站
電話:+81 092-718-7700
立即訂房:Booking.com / 酒店官網(日文)
參考價錢:連稅每晚約港幣 534 元


今次先為大家介紹住咁多先,下次再為大家介紹更多世界各地嘅新酒店,記得留意我哋更新啊~


相關文章:
[日本] 2020年中部精選新酒店巡禮-名古屋 金澤 高山
[日本] 2020年關東精選新酒店巡禮-橫濱 箱根 日光 東京周邊
[日本東京] 2020年精選新酒店巡禮-淺草 新宿 上野 東京各區

封面圖片由 DEAR 拍攝,特此鳴謝。

0 個留言於 “[日本福岡] 2020年精選新酒店巡禮-博多 中洲 天神 福岡各區

發佈留言

發佈留言必須填寫的電子郵件地址不會公開。 必填欄位標示為 *