目的地介紹

[日本大阪] 2020年精選新酒店巡禮-難波 本町 心齋橋 大阪各區

日本 大阪 Osaka, Japan

注意:
因應武漢肺炎(新型冠狀病毒 COVID-19)疫情,全球多國仍然維持出入境限制及人流管理措施。有關措施可能隨時有所更改,故此預訂前應先留意有關更改或取消的條款及細則。除此之外,酒店亦可能因防疫或營運需要,更改開業日期,或修訂提供的服務及設施,文章內容只供參考。

介紹過東京名古屋福岡等地嘅新酒店之後,今次輪到同大家介紹2020年開幕嘅大阪新酒店!話晒大阪始終都係熱門旅遊目的地嘛!
大阪新酒店嘅款式好多元化,有商務酒店,亦有公寓式酒店,有國際品牌,亦有新登場嘅牌子~本町一帶繼續有唔少酒店開幕,當然難波、新大阪站等區域亦有新酒店!
依家就先同大家睇睇十二間今年喺大阪開幕嘅新酒店~想知更多嚟緊開幕嘅大阪酒店,就記得留意之後嘅更新啦!

重溫:
2019年大阪精選新酒店巡禮(上半年 | 下半年
2018年大阪精選新酒店巡禮(第一季 | 下半年



2020年1月18日開業
大阪難波馨樂庭酒店
Citadines Namba Osaka

馨樂庭 (Citadines) 係新加坡公寓集團雅詩閣 (Ascott) 旗下較為摩登嘅公寓品牌,單計日本,佢哋分別喺東京同京都有酒店,前前後後都開咗好幾間~
今次佢哋第一次嚟到大阪,落戶難波,離開難波車站大約十分鐘路程。酒店最特別嘅地方在於佢係由屬歷史建築嘅高島屋嘅東別館改建而成!同座仲有高島屋歷史博物館添~為咗突顯建築物嘅歷史,酒店內部都以 Art Deco 風格為主題作設計。
難波馨樂庭提供 313 間客房及套房,分為十二種房型。較大嘅房型都配備有廚房,亦有提供有廳有房嘅房型~最細嘅客房由 215 呎起。

地址:大阪府大阪市浪速區日本橋三丁目 5-25
鄰近車站:JR、近鐵、南海電鐵、大阪地下鐵 御堂筋線、四橋線、千日前線 難波站
電話:+81 06-6695-7150
立即訂房:Agoda / Booking.com / 酒店官網(英文)
參考價錢:連稅每晚約港幣 809 元

2020年1月18日開業
新大阪晴空塔WBF酒店
Hotel WBF Shin-Osaka Skytower

號稱「新大阪地區最高酒店」,有樓高32層嘅新大阪晴空塔WBF酒店~酒店離開新大阪站大約五分鐘路程,出入係要搭新幹線嘅話就尤其方便啦!
酒店夠高,唔單止房間可以欣賞到外面嘅景色,仲可以上到去頂樓嘅餐廳同戶外酒吧㗎!四百間客房分成三種樓層,特色樓層就有最高層嘅 Sky Floor 同女性專用嘅 Lady’s Floor~呢度有齊單人房、雙床房、雙人房、三人房同相連客房,基本上任何人數組合都好容易夾~客房面積由 129 呎起。

地址:大阪府大阪市淀川區西中島七丁目 4-20
鄰近車站:JR、地下鐵御堂筋線 新大阪站
電話:+81 06-6390-4690
立即訂房:Agoda / Booking.com / 酒店官網(日文)
參考價錢:連稅每晚約港幣 605 元

2020年2月27日開業
東急 Stay 大阪本町
Tokyu Stay Osaka Hommachi

東急 Stay 喺東京開咗十幾間之後,今年終於嚟到大阪啦~酒店位於本町,離開地鐵站只係一分鐘路程,要 Shopping 嘅話,心齋橋嘅核心地帶亦都只係一個站外!
今次開幕嘅東急 Stay 大阪本町有成十二種房型,當中仲有單人房添~不過要留意單人房唔係每隻房型都配備洗衣機同微波爐,要係雙人房以上先係基本配置嚟~有咗洗衣機同微波爐呢啲電器就住耐啲玩耐啲都 OK 啦!雙人房面積由 205 呎起,雙床房面積就由 215 呎起。

地址:大阪府大阪市中央區久太郎町二丁目 4-24
鄰近車站:大阪地下鐵中央線、堺筋線 堺筋本町站
電話:+81 06-6262-0109
立即訂房:Agoda / Booking.com / 酒店官網(英文)
參考價錢:連稅每晚約港幣 733 元

2020年2月27日開業
大阪難波威斯特酒店
Hotel Vista Osaka Namba

威斯特酒店嘅兩間大阪酒店分別先後喺2月同4月開幕~先開幕嘅一間位於難波,離開車站大約四分鐘路程,地標之一嘅道頓堀更加只係一分鐘左右!鐘意一落街就熱熱鬧鬧嘅話,相信呢間酒店嘅位置都幾適合你~
除咗無障礙客房之外,其餘所有房間嘅洗手間都採用乾濕分離設計~酒店提供六款不同房型,當中處於轉角位嘅豪華雙床房以及豪華三人房仲加可以加床,分別俾三人一房同四人一房㗎!客房面積由194呎起,都算唔錯。

地址:大阪府大阪市中央區宗右衛門町 1-1
鄰近車站:大阪地下鐵堺筋線、千日前線 日本橋站、近畿鐵道 近鐵日本橋站
電話:+81 06-4708-5519
立即訂房:Agoda / Booking.com / 酒店官網
參考價錢:連稅每晚約港幣 559 元

2020年3月16日開業
大阪御堂筋皇家花園標誌酒店
The Royal Park Hotel Iconic Osaka Midosuji

皇家花園酒店喺唔少大城市都有,今次喺大阪推出新系列「Iconic」~作為公司嘅新旗艦品牌,自然就係主打高檔市場,期望以質素取勝。酒店位於御堂筋,離開地鐵站只係大約三分鐘路程~
酒店位於大樓嘅十五至二十五樓,所有客房都位於十六樓或以上,窗外可以欣賞市區景色~而且房間設計係以御堂筋嘅標誌-「銀杏」作為主題添㗎!酒店一共提供十種不同房型,部份房型可以加床成三人房,雙人房房間面積由228呎起,雙床房就由280呎起。

地址:大阪府大阪市中央區平野町四丁目 2-3
鄰近車站:大阪地下鐵御堂筋線 淀屋橋站 及 大阪地下鐵御堂筋線、中央線 本町站
電話:+81 06-4707-1111
立即訂房:Agoda / Booking.com / 酒店官網(英文)
參考價錢:連稅每晚約港幣 1,183 元

2020年4月7日開業
大阪本町威斯特高貴酒店
Hotel Vista Premio Osaka Hommachi

另一間今年開幕嘅威斯特酒店屬高一檔次嘅 Premio 系列,加入成為本町眾多新開業酒店嘅行列~由堺筋本町站到酒店大約係三分鐘路程左右,亦都可以步行到心齋橋商店街位於本町呢邊嘅入口。
比起另一間威斯特,本町威斯特提供較多房型選擇,甚至仲有套房添~而且客房面積都大少少,由205呎起。不過呢一間就無提供四人房,最多只有雙床房提供加床服務。另外套房暫時未見有喺訂房網站供應,有興趣的話就要直接向酒店查詢啦~

地址:大阪府大阪市中央區本町一丁目 5-10
鄰近車站:大阪地下鐵中央線、堺筋線 堺筋本町站
電話:+81 06-4708-4466
立即訂房:Agoda / Booking.com / 酒店官網
參考價錢:連稅每晚約港幣 841 元

2020年6月5日開業
大阪本町都城市酒店
Miyako City Osaka Hommachi

都酒店喺大阪除咗為萬豪以及喜來登合辦酒店之外,亦都有佢哋嘅自家品牌㗎~今次開業嘅屬於「都城市」系列嘅酒店,以「城市綠洲」為主題!位置交通方便,步行大約兩分鐘就到地鐵站啦~
酒店二樓設有住客休息室,每日供應免費飲品同小食。除此之外,最有特色嘅莫過於佢哋嘅轉角房型~每層只設有一間轉角雙人房同轉角雙床房,兩者都配備特大露台以及全景落地玻璃!想要隨時隨地望出窗欣賞城市景觀嘅話,就記得要留意轉角房型~客房面積由226呎至291呎都有~

地址:大阪府大阪市中央區北久寶寺町一丁目 8-7
鄰近車站:大阪地下鐵中央線、堺筋線 堺筋本町站
電話:+81 06-6263-0385
立即訂房:Agoda / Booking.com / 酒店官網
參考價錢:連稅每晚約港幣 1,032 元

2020年6月21日開業
名鐵 Inn 新大阪站東口
Meitetsu Inn Shin-Osaka-Eki Higashiguchi

名鐵 Inn 今年將版圖延伸到嚟大阪,喺新大阪站附近開設佢哋關西地區第一間酒店~由新大阪站東口行過嚟酒店,路程大約三分鐘左右。若然係多搭 JR 出入周邊地區的話,住近多特急列車嘅新大阪站就比較方便啦!
酒店屬於商務定位,一如其他同級酒店,都係提供雙人房以及雙床房為主。入門級別雙人房面積偏細,約140呎大,不過就勝在抵住,見到最平可以平過四百蚊一晚。雙床房面積較闊落,至少由215呎起~

地址:大阪府大阪市東淀川區東中島一丁目 21-4 (地番)
鄰近車站:JR、地下鐵御堂筋線 新大阪站
電話:+81 06-6324-3434
立即訂房:Agoda / Booking.com / 酒店官網(日文)
參考價錢:連稅每晚約港幣 566 元

2020年7月1日開業
大阪難波萬楓酒店
Fairfield by Marriott Osaka Namba

商務定位嘅萬楓系列,將會由今年起陸續喺多個日本城市開業~打頭陣分別有位於札幌同大阪嘅萬楓酒店先開業,位於大阪嘅一間落戶難波,離開JR同南海電鐵難波站都係五分鐘路程左右~
酒店房型分類比較簡單,雙人房同雙床房各設兩個級別,大致係因應層數同景觀作分類,皆因全部客房面積劃一都係約226呎。酒店亦有配備健身室,旅行時都可以繼續Keep Fit~萬楓價位不嬲都幾親民,呢間嘅位置重要相當方便,值得大家留意下㗎!

地址:大阪府大阪市浪速區元町二丁目 3-25
鄰近車站:JR、近鐵、南海電鐵、大阪地下鐵 御堂筋線、四橋線、千日前線 難波站
電話:+81 06-6649-4111
立即訂房:Agoda / Booking.com / 酒店官網(英文)
參考價錢:連稅每晚約港幣 887 元

2020年7月15日開業
Zentis Osaka

東京皇宮酒店係日本老牌酒店之一,不過今年就初次衝出關東,嚟到大阪開設時尚型嘅 Zentis Osaka~酒店離開大阪站大約12分鐘路程,而且周邊仲有多個地鐵站,要去唔同地方玩都好方便。
Zentis 請咗來自英國嘅 Tara Bernerd 作為設計師,打造一個摩登又豪華嘅空間~用色方面就以天然色系為主,配合各種不同嘅天然材料,所以望落零舍舒服~酒店房間分類比較簡單,分為三大房型,分別係 Studio、Corner Studio 同 Suite。除咗 Studio 之外,其餘房型都係配備兩張單人床~房間面積偏大,入門級別嘅已經由270呎起。

地址:大阪府大阪市北區堂島濱一丁目 4-26
鄰近車站:JR 北新地站、大阪地下鐵御堂筋線 淀屋橋站、大阪地下鐵四橋線 肥後橋站
電話:+81 06-4796-0111
立即訂房:Agoda / Booking.com / 酒店官網(英文)
參考價錢:連稅每晚約港幣 1,490 元

2020年8月1日開業
大阪新梅田大和皇家酒店 D-Premium
Daiwa Royal Hotel D-Premium Osaka Shin-Umeda

大和系列嘅商務酒店深受大家歡迎,不過佢哋近嚟都開多咗高級酒店~繼金澤以及奈良之後,D-Premium 系列會由夏季起進駐大阪,落戶福島區,離開大阪站大約10分鐘路程左右。
酒店以大阪為主題,將大阪嘅街景帶入酒店~所以佢嘅設計既有懷舊嘅部份,亦都有摩登嘅部份,希望能夠展現出大阪多元化嘅一面~酒店提供六種房型,包括雙人房、雙床房以及三人房,最多可以容納四人一房㗎。至於客房面積中規中矩,入門級別客房面積由199呎起。

地址:大阪府大阪市福島區福島六丁目 16-1
鄰近車站:JR 福島站、JR 大阪站
電話:+81 06-4797-6186
立即訂房:Agoda / Booking.com / 酒店官網
參考價錢:連稅每晚約港幣 928 元

2020年8月1日開業
大阪 Resol Trinity 酒店
Hotel Resol Trinity Osaka

另一個新加入大阪酒店業嘅,有 Hotel Resol 系列~之前同大家介紹過佢哋位於京都嘅新酒店,今次佢哋再喺關西擴張嘅時候就嚟到大阪!大阪 Hotel Resol Trinity 位於淀屋橋、北濱附近,離開兩個地鐵站各大約4分鐘路程~
Trinity 係集團裡面較高檔嘅品牌嚟~酒店以日本傳統美學為主題,由大堂到大浴場,以至係客房都貫徹和式風格,用上唔少木材。呢度只有提供雙人房及雙床房,未有提供三人房等較大嘅房型。客房面積由194呎至226呎。

地址:大阪府大阪市中央區高麗橋二丁目 6-7
鄰近車站:大阪地下鐵御堂筋線 淀屋橋站、大阪地下鐵堺筋線 北濱站
電話:容後補上
立即訂房:Agoda / Booking.com / 酒店官網(日文)
參考價錢:連稅每晚約港幣 920 元


今次先同大家介紹住咁多先~如果大家仲想知道更多大阪新酒店嘅資料,就記得 Bookmark 定呢版,留意之後嘅更新啦~


相關文章:
[日本福岡] 2020年精選新酒店巡禮-博多 中洲 天神 福岡各區
[日本] 2020年中部精選新酒店巡禮-名古屋 金澤 高山
[日本東京] 2020年精選新酒店巡禮-淺草 新宿 上野 東京各區

封面圖片由 Mike Swigunski 拍攝,特此鳴謝。

0 個留言於 “[日本大阪] 2020年精選新酒店巡禮-難波 本町 心齋橋 大阪各區

發表回覆

你的電郵地址並不會被公開。 必要欄位標記為 *