[機鐵減價] 曼谷機場快線推出三個月限定特惠票價 25泰銖入市區

^{_{文章初版錯誤指出特惠票價需使用 Rabbit 智能卡付款，正確內容應為使用機場鐵路專用的智能卡，編輯謹此致歉。}}

曼谷機場快線 (Airport Rail Link, ARL) 由2020年3月起將會推出特惠票價，喺指定時段乘搭機場快綫可以獲六折車資優惠，25 泰銖（港幣 6.2 元）就可以由蘇凡納布機場搭到入市區啦！

對照返車資表嘅資料，今次優惠搭得越遠越抵！搭一個站收費 15 泰銖（港幣 3.7 元）、兩個站收費 20 泰銖（港幣 5 元）、三個站或以上劃一收費 25 泰銖（港幣 6.2 元）。前兩者同平日收費一樣，但後者最高收費達 45 泰銖（港幣 11.1 元），實際折扣幅度可以高達五五折！

根據泰國英文媒體鮮新聞（Khaosod English）報道，優惠有兩個主要條件，包括需要於非繁忙時間乘車，以及使用機場鐵路嘅智能卡。如果使用單程車票就需要繳付原價車資啦！有關智能卡每張收費 230 泰銖，如果常去曼谷玩都可以考慮買返張。唔單止係咁，近日仲有消息話各間公司嘅智能卡將會喺今年六月起互相通用。

特惠票價條件

• 非繁忙時段乘搭機場快線 （05:30－07:00／09:00－17:00／20:00－24:00）
• 使用機場鐵路智能卡繳付車資

優惠將會試行三個月，希望能夠刺激客量，鼓勵大家使用公共交通工具～如果遇上塞車嘅話，大家更加應該搭火車，話晒搭機鐵 26 分鐘就入到總站 Phaya Thai 嘛！

如果大家嚟緊三、四、五月會到曼谷嘅話，就不妨考慮下乘搭機場快線出入市區啦！

^{_{封面圖片由 My Train Pix 拍攝，並根據 CC BY-SA 2.0 許可協議於本篇文章內使用，特此鳴謝。}}